សៀមរាប៖ ដើម្បីឆ្លើយតបនឹងតម្រូវការ ក្នុងការធ្វើឱ្យមានសមភាព និងសមធម៌យេនឌ័រ និងដើម្បីបង្កើនឱ្យមានការចូលរួម កាន់តែប្រសើរថែមទៀត រវាងស្ត្រី និងបុរសក្នុងវិស័យបរិស្ថាននាថ្ងៃទី៤ ខែមេសា ឆ្នាំ២០១៨ ក្រសួងបរិស្ថាន បើកវគ្គបណ្តុះបណ្តាលស្តីពី”តួនាទីបុរស-ស្ត្រីក្នុងការគ្រប់គ្រងធនធានធម្មជាតិ “នៅខេត្តសៀមរាប ដោយមានការចូលរួមពីថ្នាក់ដឹកនាំ មន្ត្រីរាជការក្រសួងបរិស្ថាន តំណាងអាជ្ញាធរខេត្ត មន្ត្រីឧទ្យានុរក្ស និងគណៈកម្មការសហគមន៍ជាច្រើនាក់។
លោកស្រី ព្រំ សុភីអនុរដ្ឋលេខាធិការក្រសួងបរិស្ថាន វេទិកានេះរៀបចំឡើងក្នុងគោលបំណងផ្តល់នូវចំណេះដឹងជាមូលដ្ឋានអំពីទស្សនាទានយេនឌ័រ ការវិភាគយេនឌ័រដល់មន្ត្រីឧទ្យានុរក្ស និងសមាជិកសហគមន៍ និងជនបង្គោល ក្នុងការចូលរួមអនុវត្តការងារយេនឌ័រ ហើយចែករំលែក និងផ្លាស់ប្តូរបទពិសោធន៍ក្នុងការគ្រប់គ្រងសហគមន៍តំបន់ការពារធម្មជាតិ ដើម្បីបណ្តុះស្មារតី និងឆន្ទៈស្រឡាញ់បរិស្ថាន ទំនាក់ទំនង និងបង្កើនសាមគ្គីភាពរបស់យុវជនក្នុងការផ្សព្វផ្សាយពីសកម្ម ភាពអេកូទេសចរណ៍ក្នុងតំបន់ការពារធម្មជាតិផងដែរ។
លោកស្រី ព្រំ សុភី បានឱ្យដឹងថា ផែនការយុទ្ធសាស្ត្រ បញ្ជ្រាបយេនឌ័រក្នុងវិស័យបរិស្ថាន ឆ្នាំ២០១៦-២០២០ បាន រៀបចំឡើងដើម្បីឆ្លើយតបទៅនឹងតម្រូវការក្នុងការធ្វើឱ្យមានសមភាព និង សមធម៌យេនឌ័រ ដើម្បីបង្កើនឱ្យមានការ ចូលរួមកាន់តែប្រសើរថែមទៀតរវាងស្ត្រីនិងបុរសក្នុងវិស័យបរិស្ថាន ដើម្បីកែប្រែវិសមភាពលើទំនាក់ទំនងរវាងស្ត្រីនិងបុរសក្នុងការគ្រប់គ្រង និងធើ្វសេចក្តីសម្រេច ចិត្ត ដែលជាការផ្តល់លទ្ធភាពក្នុងការលើកកម្ពស់ស្ថានភាពស្ត្រី និងសមភាពយេនឌ័រ ដើម្បីដោះស្រាយនូវរាល់ឧបសគ្គនានាចំពោះស្ដ្រីក្នុងការបំពេញនូវតួនាទីជាអ្នកដឹកនាំ ជា ពិសេសក្នុងវិស័យគ្រប់គ្រងធនធានធម្មជាតិ និងបរិស្ថានដែលជាការងារស្នូលរបស់ក្រសួងបរិស្ថាន ទាំង នៅ ថ្នាក់ជាតិនិងថ្នាក់ក្រោមជាតិ។
លោកស្រីបានសង្កត់ធ្ងន់ដែរថា៖ រាជរដ្ឋាភិបាលកម្ពុជាក៏បានប្តេជ្ញាសម្រេចឱ្យបាននូវសមភាពយេនឌ័រ ការផ្តល់ភាពអង់អាចដល់ស្ត្រី តាមរយៈការបង្កើតបរិយាកាសអំណាយផល ដើម្បីឱ្យមានការផ្លាស់ប្តូរឥរិយាបទ និងអាកម្បកិរិយាវិជ្ជមាន តាមរយៈការរៀបចំយុទ្ធនាការណ៍ កម្មវិធី និងសកម្មភាពនៅគ្រប់កម្រិត សំដៅកែប្រែ និងធានាឱ្យមានសមភាពយេនឌ័រ កែប្រែនូវវិសមភាពលើទំនាក់ទំនងរវាងស្ត្រី និងបុរសក្នុងការគ្រប់គ្រង ចាត់ចែង និងការធ្វើសេចក្តីសម្រេចចិត្ត ដែលជាការផ្តល់លទ្ធភាពក្នុងការលើកកម្ពស់ស្ថានភាព និងសមត្ថភាពស្ត្រីក្នុងការបំពេញការងារក្នុងវិស័យ និងការងារស្នូលក្នុងអង្គភាព ដើម្បីឆ្លើយតបនឹងតម្រូវការក្នុងការធ្វើឱ្យមានសមភាព និងសមធម៌យេនឌ័រ និងដើម្បីបង្កើនឱ្យមានការចូលរួមកាន់តែប្រសើរថែមទៀតរវាងស្ត្រី និងបុរសក្នុងវិស័យបរិស្ថាន។
គួសបញ្ជាក់ថា៖សិក្ខាសាលាបណ្តុះបណ្តាលធ្វើនៅឧទ្យានជាតិព្រះជ័យវរ័ន្ម-នរោត្តម ភ្នំគូលែន ស្ថិតនិតនៅភូមិព្រះអង្គធំ ឃុំ ខ្នងភ្នំស្រុក ស្វាយលើខេត្តសៀមរាប រៀបចំដោយក្រុមការងារបច្ចេកទេសយេនឌ័រក្រសួងបរិស្ថាន កិច្ចសហការជាមួយ គម្រោងជំរុញភាពធន់ទៅនឹងការប្រែប្រួលអាកាសធាតុ របស់សហគម ការជួយគាំទ្រពីគម្រោងជំរុញភាពធន់ របស់សហគមជនបទ រស់នៅក្នុងតំបន់ ការពារធម្មជាតិ ទៅនឹងការប្រែប្រួលអាកាសធាតុនៅកម្ពុជា៕ ដោយ ៖ បញ្ញាស័ក្តិ