ភ្នំពេញ ៖ លោក ឈាង វុន ប្រធានគណៈកម្មការកិច្ចការបរទេស សហប្រតិបត្តិការអន្តរជាតិ ឃោសនាការ និងព័ត៌មាន នៃរដ្ឋសភា និងជាប្រធានក្រុម មិត្តភាពសភាកម្ពុជា-ជប៉ុន បានទទួលជួបជាមួយ លោក FUJITA Yukihisa សមាជិកព្រឹទ្ធសភាប្រទេសជប៉ុន នារសៀលថ្ងៃទី៤ ខែឧសភា ឆ្នាំ២០១៨នេះ នៅវិមានរដ្ឋសភា ខណៈដែលលោកសមាជិកព្រឹទ្ធសភាមកបំពេញទស្សនកិច្ចនៅកម្ពុជា។
នៅក្នុងជំនួបនោះ លោក ឈាង វុន បានថ្លែងអំណរគុណចំពោះប្រទេសជប៉ុន ដែលតែងតែជួយកម្ពុជានៅគ្រប់កាលៈទេសៈ ពិសេសការស្វែងរក សន្តិភាព។ លោកបានលើកឡើងថា អ្វីដែលកម្ពុជាមាននៅពេលនេះ គឺមិនអាចកាត់ផ្តាច់បានពីជំនួយរបស់ប្រទេសជប៉ុននោះទេ។ កម្ពុជាបានហែលឆ្លងទុក្ខលំបាកជាច្រើន ទំរាំកសាងបាននូវប្រទេសជាតិមួយដែលមានសុខសន្តិភាព សេរីភាព ប្រជា ធិបតេយ្យ និងវឌ្ឍនភាព។
លោកប្រធានគណៈកម្មការបានជម្រាប លោក FUJITA Yukihisa ថា ជាមួយសន្តិភាពពេញផ្ទៃប្រទេស សេដ្ឋកិច្ចកម្ពុជាបានកើនឡើងជាលំដាប់ ក្នុងរង្វង់៧ភាគរយ នៅរៀងរាល់ឆ្នាំ។ មន្ត្រីរាជការកម្ពុជាមានប្រាក់បៀវត្សរ៍ជាមធ្យម៤០០ដុល្លារ ភាពក្រីក្របានកាត់បន្ថយមកនៅសល់តែត្រឹមជាង១០ភាគរយ ប៉ុណ្ណោះ។
ដោយឡែកនៅក្នុងដំណើរការលទ្ធិប្រជាធិបតេយ្យវិញ កម្ពុជានឹងរៀបចំការបោះឆ្នោតជ្រើសរើសសមាជិករដ្ឋសភានីតិកាលទី៦ នាចុងខែកក្កដាខាងមុខ នេះ។ លោក ឈាង វុន បានគូសបញ្ជាក់ថា នេះជាការអនុវត្តលទ្ធិប្រជាធិបតេយ្យ ជាការផ្តល់សិទ្ធិសេរីភាព និងអំណាចជូនប្រជាពលរដ្ឋក្នុងការ សម្រេចចិត្តជ្រើសរើសមេដឹកនាំ។ នៅក្នុងដំណើរការរៀបចំការបោះឆ្នោតនេះ ក្នុងពេលបច្ចុប្បន្ននេះ គណៈកម្មាធិការជាតិរៀបចំការបោះឆ្នោត បាននឹង កំពុងទទួលចុះឈ្មោះគណបក្សនយោបាយចូលរួមប្រកួតប្រជែង ហើយបើតាមការប៉ាន់ស្មាន គឺនឹងមានគណបក្សនយោបាយជាច្រើន ចូលរួមការ បោះឆ្នោត ដែលក្នុងនោះទំនងមិនតិចជាង៣០គណបក្សឡើយ។
លោក ឈាង វុន ក៏បានថ្លែងអំណរគុណដល់ប្រទេសជប៉ុន ដែលនៅតែបន្តជួយគាំទ្រ ដល់គណៈកម្មាធិការជាតិរៀបចំការបោះឆ្នោត ក្នុងការដំណើរ ការរៀបចំបោះឆ្នោតនោះ ។
លោក FUJITA Yukihisa ជាសមាជិកព្រឹទ្ធសភា ដែលបានមកបំពេញទស្សនកិច្ចនៅកម្ពុជា ជាច្រើនលើកមកហើយ។ លោកមានភាពស្និទ្ធស្នាល ជាមួយសមាជិករដ្ឋសភា សមាជិករាជរដ្ឋាភិបាលកម្ពុជា ហើយអដ្ឋិធាតុកូនប្រុសរបស់លោកមួយរូប ត្រូវបានយកមកដម្កល់ទុកនៅកម្ពុជាមួយចំណែកដែរ។ លោកបានគូសបញ្ជាក់ថា” លោកមានមនោសញ្ចេតនា ជាមួយប្រជាជនកម្ពុជា ដូច្នេះលោកបានប្តេជ្ញាហើយថា នឹងខិតខំចូលរួមចំណែក ក្នុងការអភិវឌ្ឍប្រទេសកម្ពុជា”។
នៅក្នុងដំណើរទស្សនកិច្ចនៅកម្ពុជានាឱកាសនេះ លោក FUJITA Yukihisa គ្រោងជួបពិភាក្សាការងារ ជាមួយមន្ត្រីជាន់ខ្ពស់រដ្ឋសភា និងរាជរដ្ឋាភិបាល ជាច្រើនរូបផងដែរ៕ ដោយ ៖ បញ្ញាស័ក្តិ