ភ្នំពេញ៖ ក្រសួងសាធារណការ បានប្រកាសថា ចាប់បានរថយន្តដឹកលើសទម្ងន់ ១២៣គ្រឿង និងពិន័យជាង ២រយលានរៀល ក្នុងខែមេសា ឆ្នាំ២០១៨ ហើយសូមកោតសរសើរ ដល់ក្រុមការងារជញ្ជីងចល័ត របស់ក្រសួង និងស្ថានីយជញ្ជីងទាំងអស់ ដែលតាមដាននឹងអនុវត្តន៍ ទប់ស្កាត់ ការដឹកជញ្ជូនលើសទម្ងន់កម្រិតកំណត់កន្លងមក។
ក្រសួងសាធារណការនិងដឹកជញ្ជូន បានប្រកាសក្នុងផេកហ្វេសប៊ុករបស់ខ្លួននៅថ្ងៃទី៤ខែឧសភាថា ក្នុងខែមេសា ឆ្នាំ២០១៨ លេខាធិការដ្ឋាន របស់គណៈកម្មាធិការសម្របសម្រួលអចិន្ត្រៃយ៍ នៃគណៈកម្មាធិការ ដឹកនាំការត្រួតពិនិត្យយានយន្ត ដឹកជញ្ជូនលើសទម្ងន់កម្រិតកំណត់ ចាប់បានរថយន្តដឹកទំនិញ លើសទម្ងន់កម្រិតកំណត់ ចំនួន ១២៣គ្រឿង និងពិន័យ បានថវិកាសរុបចំនួន ២៣៣.៣៤០.០០០ រៀល។
ប្រភពដដែល បានបញ្ជាក់ថា យើងសង្កេតឃើញថា ចំនួនរថយន្ត ដែលចាប់បានទាំងនេះ មានការថយចុះចំនួន ១១៧ គ្រឿង គឺពី ២៤០ គ្រឿង ក្នុងខែមីនា មក ១២៣ គ្រឿង ក្នុងខែមេសា ឆ្នាំ២០១៨ ។ ក្នុងចំណោមរថយន្តដែលចាប់បាននោះ ផ្ទុកលើសទម្ងន់ចាប់ពី ៥តោន រហូតដល់ ៤០តោន៕ ដោយ៖បញ្ញាស័ក្តិ
