ក្រចេះ ៖ យ៉ាងហោចណាស់មនុស្ស ៥នាក់ បានស្លាប់ និង១៥នាក់ផ្សេងទៀត កំពុងជួយសង្គ្រោះបន្ទាប់ពីបានផឹកទឹកអូរ ដែលមានជាតិពុល នៅថ្ងៃទី៤ ខែឧសភា ឆ្នាំ២០១៨។ ជនរងគ្រោះ បាននិងកំពុងជួយសង្គ្រោះពីក្រុមគ្រូពេទ្យនៅមន្ទីរពេទ្យបង្អែកខេត្ត។
បន្ទាប់មានហេតុការណ៍នេះកើតឡើង បានបង្កឲ្យមានការភ្ញាក់ផ្អើល នៅព្រឹកថ្ងៃទី៥ ខែឧសភា ឆ្នាំ២០១៨នេះ លោក វ៉ា ថន អភិបាលខេត្តក្រចេះ និងមន្រ្តីសុខាភិបាលខេត្តក្រចេះ បានចុះទៅដល់ភូមិកើតហេតុស្ថិតនៅភូមិស្រែនន ឃុំកន្ទួត ស្រុកចិត្របុរី ខេត្តក្រចេះ។
ទោះយ៉ាងណា មិនទាន់មានមន្រ្តីសុខាភិបាល អាចបញ្ជាក់ពីមូលពិតប្រាកដ ដែលបណ្តាលឲ្យមានមនុស្ស ជាច្រើននាក់ ស្លាប់និងរបួស យ៉ាងដូច្នេះទេ ប៉ុន្តែបើតាមពលរដ្ឋបាននិយាយប្រាប់ ការពុលនេះ បណ្តាលមកពីពួកគាត់ផឹកទឹក ដែលដងពីអូរ ដែលមានសារធាតុថ្នាំពុល។៕ ដោយ ៖ បញ្ញាស័ក្តិ