ខេត្តរតនគិរី ៖ បុរសជាប្តីបានផឹកស្រាស្រវឹងខ្លាំងរហូតវង្វេងវង្វាន់ ហើយក៏មានជម្លោះជាមួយប្រពន្ធ ហើយបានយកកាំបិតមកអារកប្រពន្ធបណ្តាលរងរបួសជាទម្ងន់។ បុរសម្នាក់នេះត្រូវកម្លាំងអាវុធហត្ថស្រុកចាប់ខ្លួនពីបទបង្កហិង្សាចាប់ប្រពន្ធអារក កើតឡើងកាលពីវេលាម៉ោង៥ល្ងាចថ្ងៃទី៤ ខែឧសភា ឆ្នាំ២០១៨ ស្ថិតនៅត្រង់ចំណុចការដ្ឋានលេខ៥ របស់ក្រុមហ៊ុន ហងអាញលំផាត់ ក្នុងភូមិ៣ ឃុំស្រែអង្គ្រង ស្រុកកូនមុំខេត្តរតនគិរី ។ ជនរងគ្រោះត្រូវបានបញ្ជូនទៅព្យាបាលនៅមន្ទីរពេទ្យបង្អែកស្រុក។
សមត្ថកិច្ចកម្លាំងអាវុធហត្ថស្រុកកូនមុំបានឱ្យដឹងថា ជនសង្ស័យ ឈ្មោះសុំ ហឿន អាយុ៣២ឆ្នាំ រស់នៅភូមិ-ឃុំកើតហេតុខាងលើ ។ រីឯស្ត្រីរងគ្រោះឈ្មោះកេន ចន្នី អាយុ៣៥ឆ្នាំ រងរបួសត្រង់បំពង់កជាទម្ងន់ ។ ជម្លោះអំពើហិង្សានេះ ដោយសារប្តីផឹកស្រាស្រវឹងខ្លាំវង្វេងវង្វាន់ស្មារតី ហើយក៏បានយកកាំបិត និងចាប់ប្រពន្ធរបស់ខ្លួន មកអារកប៉ងសម្លាប់តែម្តង ប៉ុន្តែត្រូវបានអ្នកជិតខាង មកជួយអន្តរាគមន៍ទាន់ពេលវេលា ។ បន្ទាប់ពីកើតហេតុ ជនសង្ស័យ ត្រូវបានកម្លាំងអាវុធហត្ថស្រុកកូនមុំ ដែលនៅប្រចាំការក្រុមហ៊ុន ឃាត់ខ្លួននាំយកមកទីបញ្ជាការដ្ឋានអាវុធហត្ថខេត្ត កសាងសំណុំរឿងបញ្ជូនខ្លួនបន្ត ទៅសាលាដំបូងខេត្តចាត់ការតាមច្បាប់៕ ដោយ៖បញ្ញាស័ក្តិ
