ខេត្តកំពង់ចាម ៖ ដោយមានកិច្ចសហការរវាងនគរបាលខេត្តកំពង់ចាមនិងនគរបាលខេត្តព្រះវិហារ ចាប់ខ្លួនបុរសម្នាក់ដោយតាមដីកាបង្គាប់ឲ្យចាប់ខ្លួនរបស់ក្រុមប្រឹក្សាជំនុំជម្រះនៃសាលាដំបូងខេត្តកំពង់ចាមពីបទរំលោភលើសេចក្តីទុកចិត្ត និងបទក្លែងបន្លំឯកសារសាធារណៈ និងដកហូតកាំភ្លើងខ្លី១ដើម និងគ្រាប់២០០គ្រាប់។
សមត្ថកិច្ចនគរបាល បានឲ្យដឹងថា លោកឧត្តមសេនីយ៍ត្រី ហេង វុទ្ធី ស្នងការរងទទួលផែនព្រហ្មទណ្ឌខេត្តកំពង់ចាម បានដឹកនាំកម្លាំងការិយាល័យនគរបាលព្រហ្មទណ្ឌកម្រិតស្រាល និងការិយាល័យនគរបាលព្រហ្មទណ្ឌកម្រិតធ្ងន់ សហការជាមួយកម្លាំងជំនាញរបស់ស្នងការដ្ឋាននគរបាលខេត្តព្រះវិហារ កាលពីថ្ងៃទី៣ខែឧសភា ឆ្នាំ២០១៨ ចុះទៅដល់ភូមិស្រអែម ឃុំស្រអែម ស្រុកជាំក្សាន្ត ខេត្តព្រះវិហារ ដើម្បីអនុវត្តដីកាបង្គាប់ឲ្យចាប់ខ្លួនលេខ១៩១៥ត.ព្រ ចុះថ្ងៃ៥ខែមេសា ឆ្នាំ២០១៨ ចេញដោយលោក សួន សំណាង ប្រធានក្រុមប្រឹក្សាជំនុំជម្រះនៃសាលាដំបូងខេត្តកំពង់ចាម ចាប់ខ្លួនឈ្មោះ មាស សំអឿន ភេទប្រុស អាយុ៣៤ឆ្នាំ មានទីលំនៅភូមិអណ្ដូងជា ឃុំជីរោទ៍២ ស្រុកត្បូងឃ្មុំ ខេត្តត្បូងឃ្មុំ ពីបទរំលោភលើសេចក្តីទុកចិត្តដោយអភិបាល និងបទក្លែងបន្លំឯកសារសាធារណៈ ប្រព្រឹត្តកាលពីថ្ងៃទី២៩ ខែមីនា ឆ្នាំ២០១៨ នៅភូមិទី១៥ សង្កាត់កំពង់ចាម ក្រុងកំពង់ចាម ខេត្តកំពង់ចាម ។ ក្នុងពេលចាប់ខ្លួនឈ្មោះ មាស សំអឿន សមត្តកិច្ចបានដកហូតកាំភ្លើងខ្លីមួយដើមម៉ាក BERETTA U.S.A CORP លេខ៦៩២៨៣១បង់២ គ្រាប់ចំនួន២០០គ្រាប់ និងនាំខ្លួនជនសង្ស័យមកកាន់ស្នងការដ្ឋាននគរបាលខេត្តកំពង់ចាម ដើម្បីចាត់ការតាមនីតិវិធី។
នគរបាលបានបង្ហើបប្រាប់ថា ការចាប់ខ្លួនបុរសរូបនេះ ដោយសារលួចបើកលុយក្នុងធនាគារ រាប់សែនដុល្លារ ហើយរត់គេចខ្លួន៕ ដោយ ៖ បញ្ញាស័ក្តិ