ភ្នំពេញ ៖ កងកម្លាំងនគរបាល២រូប ដែលទារលុយ២០ដុល្លារ ពីជនជាតិវៀតណាម ដែលជិះបំពានភ្លើងសញ្ញាចរាចរណ៍ មិនត្រូវបានបណ្តេញចេញពីក្របខ័ណ្ឌ ដោយគ្រាន់តែដាក់ពិន័យតាមច្បាប់របស់នគរបាលជាតិ។
សូមបញ្ជាក់ថា មន្ត្រីនគរបាលទាំងពីររូបនេះ ត្រូវបាននាយឧត្តមសេនីយ៍ ជួន សុវណ្ណ ស្នងការរាជធានីភ្នំពេញ គ្រោងនឹងស្នើសុំសម្តេចក្រឡាហោម ស ខេង ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ បញ្ឈប់ពីក្របខ័ណ្ឌ បន្ទាប់ពីពួកគេបានរងការរិះគន់យ៉ាងខ្លាំង ព្រោះតែការទារលុយ ២០ដុល្លារពីជនជាតិវៀតណាម ដែលជិះម៉ូតូបំពានភ្លើងសញ្ញាចរាចរណ៍។
ជាមួយនឹងករណីនេះដែរ បើតាមការផ្សាយលើផេកហ្វេសប៊ុកផ្លូវ លោកឈឿន ប៊ុនឆន ជាមន្ត្រីនគរបាលក្រសួងមហាផ្ទៃ បានសរសេរថា “ប្រសិនបើផ្តន្ទាដល់កម្រិតនេះខ្ញុំថា “លើស” ។ ខ្ញុំសប្បាយចិត្តនិងគាំទ្រការដាក់ពិន័យធ្ងន់ៗចំពោះមន្ត្រីធ្វើខុស ។ ចុះករណី បាញ់គេ? រកស៊ីដឹកឈើ? យកលុយបទល្មើសគ្រឿងញៀន? ។ល។?? មិនដេញដែរទៅ? ក៏ប៉ុន្តែបើសិនជាបើកសករាជ “ខុសគឺដេញចោលគ្មានយោគយល់ ដេញឲ្យស្មើភាព” ខ្ញុំសុំគាំទ្រ ១០០ ភាគរយ ។
ខ្ញុំបញ្ចេញមតិ ក្នុងនាមខ្ញុំក៏ជាមន្ត្រីអនុវត្តច្បាប់មួយរូបដែរ ខុសឆ្គងក៏មិនដឹងធ្វើម៉េចដែរ ។ នៅនិយាយ និងជួយបញ្ចេញមតិ មានន័យថាបេះដូងនៅស្រឡាញ់”៕ ដោយ៖បញ្ញាស័ក្តិ