ភ្នំពេញ៖ ដោយសារតែប្រទេសកម្ពុជាមានសក្តានុពលលើដំណាំស្រូវ-អង្ករ ដំឡូងមី ម្រេច ពោត កៅស៊ូ ស្វាយ និងស្វាយចន្ទី ជាដើមនោះ រដ្ឋមន្ត្រីក្រសួងពាណិជ្ជកម្ម បានស្នើសុំឲ្យក្រុមហ៊ុនជប៉ុន Idemitsu Saison Microfinance បន្តសហការឲ្យបានស្អិតល្មួត ជាមួយប្រជាកសិករ សហគ្រាសធុនតូច និងមធ្យម និងសមាគមន៍កសិកម្មមួយចំនួនថែមទៀត។
កាលពីរសៀលថ្ងៃសុក្រ ទី៤ ខែឧសភា ឆ្នាំ២០១៨ លោកប៉ាន សូរស័ក្ដិ រដ្ឋមន្ត្រីក្រសួងពាណិជ្ជកម្ម បានទទួលជួបសំណេះសំណាលជាមួយក្រុមហ៊ុនជប៉ុន Idemitsu Saison Microfinance ដែលបានមកបោះទុនវិនិយោគក្នុងវិស័យមីក្រូហិរញ្ញវត្ថុនៅកម្ពុជា។
នៅក្នុងឱកាសនោះ លោក Koichi Watanabe តំណាងរបស់ក្រុមហ៊ុន Idemitsu Saison Microfinance បានជម្រាបជូនលោករដ្ឋមន្ត្រី អំពីប្រវត្តិ និងចក្ខុវិស័យក្រុមហ៊ុនរបស់លោក ដែលផ្តោតសំខាន់ លើការចូលរួមពង្រីកឥណទាន សម្រាប់វិស័យកសិកម្ម តាមរយៈសេវាកម្មផ្ដល់ប្រាក់កម្ចីរយៈពេលវែង និងការប្រាក់ទាបដល់កសិករផ្ទាល់ ឬដល់សហគមន៍ណាមួយ ក្រោមរូបភាពដាក់ទ្រព្យបញ្ចាំ និងមិនមានទ្រព្យបញ្ចាំ។
ជាកិច្ចឆ្លើយតប លោករដ្ឋមន្ត្រី បានថ្លែងអំណរគុណលោក Koichi Watanabe ដែលបានរួមចំណែកជួយដល់វិស័យកសិកម្ម និងកសិករកម្ពុជា។ លោករដ្ឋមន្ត្រី បានគូសបញ្ជាក់ថា ការពង្រីកឥណទានក្នុងវិស័យកសិកម្ម គឺជាកិច្ចការអទិភាពមួយរបស់រាជរដ្ឋាភិបាល ហើយការវិនិយោគរបស់ក្រុមហ៊ុន Idemitsu Saison នឹងរួមចំណែកដោះស្រាយបញ្ហាដែលកសិករ និងម្ចាស់អាជីវកម្មខ្នាតតូចភាគច្រើនបានជួបប្រទះ ដោយសារតែឥណទានកសិកម្មមានសារៈសំខាន់ដល់ការពង្រីកមុខរបរ ក៏ដូចជាបង្កើនផលិតកម្មឲ្យស្របទៅនឹងតម្រូវការនៃទីផ្សារ។
លោករដ្ឋមន្ត្រី ក៏បានស្នើសុំឲ្យក្រុមហ៊ុន បន្តសហការឲ្យបានស្អិតល្មួតជាមួយប្រជាកសិករ សហគ្រាសធុនតូច និងមធ្យម និងសមាគមន៍កសិកម្មមួយចំនួនថែមទៀតដូចជា ស្រូវ-អង្ករ ដំឡូងមី ម្រេច ពោត កៅស៊ូ ស្វាយ និងស្វាយចន្ទី។ល។ ដោយសារតែរផលិតផលទាំងអស់នោះ មានសក្ដានុពលខ្ពស់សម្រាប់អភិវឌ្ឍន៍ខ្សែសង្វាក់តម្លៃ ដើម្បីធ្វើពិពិធកម្មការនាំចេញទៅកាន់ទីផ្សារអន្តរជាតិ៕ ដោយ ៖ បញ្ញាស័ក្តិ
