ត្បូងឃ្មុំ ៖ សម្តេច សាយ ឈុំ បានឲ្យដឹងថា ការបោះឆ្នោតជ្រើសតាំងតំណាងរាស្ត្រ នីតិកាលទី៦ ខាងមុខនេះ គ្មានការចូលរួមពីអតីតគណបក្សសង្គ្រោះជាតិនោះទេ ហើយសម្តេច ក៏បានក្រើនរំលឹកដល់ប្រជាពលរដ្ឋ កុំឲ្យជឿពាក្យញុះញង់របស់បក្សប្រឆាំង ដែលមិនឲ្យពលរដ្ឋទៅបោះឆ្នោត ព្រោះពួកប្រឆាំងកាន់តែចាញ់កាន់តែពិសពុល។
ព្រោះគណបក្សនេះត្រូវបានតុលាការកំពូលចេញសាលដីការរំលាយរួចហើយ គ្មានការពន្យាការបោះឆ្នោតនោះទេ ព្រោះខុសនឹងរដ្ឋធម្មនុញ្ញផង។ កុំស្របតាមការឃោសនាអកុសលរបស់ពួកប្រឆាំង ដែលញ៉ុះញ៉ុងមិនឲ្យប្រជាជនទៅបោះឆ្នោត ព្រោះនេះជាទង្វើដែលផ្ទុយនឹងរដ្ឋធម្មនុញ្ញ ផ្ទុយនឹងច្បាប់ជាធរមាន ត្រូវអនុត្តទៅតាមវិធានការច្បាប់ ចំពោះជនល្មើសណាដែលបានប្រព្រឹត្តជាក់ស្តែង និងមានភស្តុតាងគ្រប់គ្រាន់។
ក្នុងពេលជួបសំណេះសំណាល ជាមួយសមាជិក-សមាជិកា គណបក្សប្រជាជនកម្ពុជា ខេត្តត្បូងឃ្មុំ នាថ្ងៃទី៥ ខែឧសភា ឆ្នាំ២០១៨ នៅសម្តេចវិបុលសេនាភក្តី សាយ ឈុំ អនុប្រធានគណបក្សប្រជាជនកម្ពុជា បានក្រើនរំលឹកដល់មន្ត្រីរាជការ ប្រជាពលរដ្ឋ កម្មករនិយោជិត សូមកុំលង់ជឿតាមពាក្យញុះញង់របស់ក្រុមបក្សប្រឆាំង ដែលឃោសនាមិនឲ្យប្រជាពលរដ្ឋទៅបោះឆ្នោត ព្រោះពួកប្រឆាំងកាន់តែចាញ់ ឧបាយកលរបស់ពួកគេកាន់តែពិសពុល និងគ្រោះថ្នាក់សម្រាប់ជាតិ។
សម្តេចវិបុលសេនាភក្តី សាយ ឈុំ បានមានប្រសាសន៍ថា សមាជិក-សមាជិកាគណបក្សទាំងអស់ ត្រូវជម្រុះចោលនូវសតិអារម្មណ៍ដែលយល់ថា ការបោះឆ្នោតលើកនេះអស់គូប្រកួតខ្លាំងហើយ ឬក៏យល់ថាសម្តេចប្រធានគណបក្ស បានចុះជួបសំណេះសំណាលជាមួយកម្មករ លោកគ្រូអ្នកគ្រូ ប្រជាពលរដ្ឋគ្រប់មជ្ឈដ្ឋានបានច្រើនហើយ ដូច្នេះយើងមិនបាច់ប្រឹងក៏ឈ្នះដែរ។ ពួកប្រឆាំងកាន់តែចាញ់ ឧបាយកលកាន់តែពិសពុល ដែលនេះជាប្រការដែលត្រូវតែកាន់ប្រុងប្រយ័ត្នខ្ពស់បំផុត ហើយទាំងអស់គ្នាត្រូវខិតខំប្រឹងប្រែងរួមចិត្តមួយថ្លើមមួយឲ្យខ្លាំងជាងនេះ រហូតសម្រេចជ័យជម្នះនៅទីចុងបំផុត៕ ដោយ ៖ បញ្ញាស័ក្តិ
