កំពង់ចាម ៖ បុរសម្នាក់ជាអ្នកចែកចាយថ្នាំញៀន ដែលមានថ្នាំញៀន និងកាំភ្លើងខ្លីមួយដើមផងនោះ ត្រូវបានកម្លាំងជំនាញផ្នែកប្រឆាំងគ្រឿងញៀន ស្រុកពញាក្រែក សហការជាមួយកម្លាំងប៉ុស្តិ៍នគរបាលរដ្ឋបាលឃុំកណ្តោលជ្រុំ ដឹកនាំដោយលោកអនុសេនីយ៍ឯក ប៊ុម សុធន ចុះបង្ក្រាបមុខសញ្ញាជួញដូរថ្នាំញៀនដោយយោងតាមដីកា នៅចំណុចភូមិបទទន្លា ឃុំកណ្តោលជ្រុំ ស្រុកពញាក្រែក ខេត្តត្បូងឃ្មុំ នៅថ្ងៃទី៦ ខែឧសភា ឆ្នាំ២០១៨ វេលាម៉ោង១៥និង៤០នាទី។
ជនសង្ស័យមានឈ្មោះ យី រុំ ភេទប្រុស អាយុ៣៧ឆ្នាំ ជនជាតិខ្មែរ រស់នៅភូមិក្រញូង ឃុំវាលម្លូ ស្រុកពញាក្រែក ខេត្តត្បូងឃ្មុំ ដកហូតបានម្សៅក្រាមពណ៌សថ្លា សង្ស័យថ្នាំញៀន ចំនួន១កញ្ចប់ ជញ្ជីងអេឡិចត្រូនិចសម្រាប់ថ្លឹងថ្នាំញៀន២គ្រឿង សម្ភារៈវេចខ្ចប់ថ្នាំញៀនមួយចំនួន កាំភ្លើង១ដើម ម៉ាក K59 និងគ្រាប់៤គ្រាប់ ។ ឈ្មោះ យី រុំ មានដីកាបង្គាប់ឲ្យចាប់ខ្លួនលេខ ១៥១ ចុះថ្ងៃទី៤ ខែសីហា ឆ្នាំ២០១៧ ចេញដោយលោក ឈិត វិនា ចៅក្រមស៊ើបសួរសាលាដំបូងខេត្តត្បូងឃ្មុំ ។
ជនសង្ស័យ ត្រូវបាននាំមកធ្វើការសាកសួរនៅអធិការដ្ឋាននគរបាលស្រុកពញាក្រែក ដើម្បីកសាងនីតិវិធីបញ្ជូនទៅតុលាការ ៕ ដោយ៖បញ្ញាស័ក្តិ
