ក្រចេះ៖ពាក់ព័ន្ធនឹងករណីប្រជាពលរដ្ឋផ្ទុះជំងឺបណ្តាលឲ្យស្លាប់ជាបន្តបន្ទាប់ នៅចំណុចទេចម្លងឧបសម្ព័ន្ធភូមិស្រែនន និងចំណុចយ៉ែភូមិអាលច ឃុំកន្ទួត ស្រុកចិត្របុរី ខេត្តក្រចេះ ក្រសួងសុខាភិបាល បានបញ្ជាក់ថាលទ្ធផលនៃការពិនិត្យរបស់មន្ទីរពិសោធន៍ជាតិសុខាភិបាល លើសំណាកស្រាមួយចំនួន ដែលក្រុមការងារបានផ្ញើមកពីភូមិពាក់ព័ន្ធបានបង្ហាញថា ស្រាទាំងនោះមានផ្ទុកជាតិមេតាណុលខ្ពស់ដែលធ្វើឲ្យពុល ។ ដោយឡែក ការវិភាគសំណាកទឹកដែលផ្ញើមកពីភូមិពាក់ព័ន្ធ ពុំទាន់ទទួលបានលទ្ធផលនៅឡើយ។
តាមរបាយការណ៍របស់ក្រុមការងារជំនាញថ្នាក់កណ្តាល និងមន្ទីរសុខាភិបាលខេត្តក្រចេះ គិតត្រឹមម៉ោង៥និង៣០នាទីព្រឹកថ្ងៃទី៧ខែឧសភា ឆ្នាំ២០១៨នេះគឺ មានអ្នកជំងឺសរុបចំនួន១៤៩នាក់ ដែលក្នុងនោះមាននារីចំនួន ៧៣នាក់។ ក្នុងចំណោមនោះ មានអ្នកស្លាប់ចំនួន១១នាក់ គិតចាប់តាំងពីថ្ងៃទី៣ ខែឧសភា មក។ អ្នកស្លាប់ទាំងនោះ មានអាយុចាប់ពី២៤ឆ្នាំដល់៧៣ឆ្នាំ។ រហូតមកដល់ពេលនេះ នៅមន្ទីរពេទ្យខេត្តក្រចេះ មានអ្នកជំងឺកំពុងសម្រាកចំនួន១៣៤នាក់ ដែលកំពុងទទួលបានការព្យាបាលដោយយកចិត្តទុកដាក់បំផុតពីក្រុមគ្រូពេទ្យជំនាញសង្រ្គោះថ្នាក់ជាតិ និងថ្នាក់ខេត្ត ដែលអ្នកជំងឺភាគច្រើនបានធូរស្រាលជាបណ្តើរៗហើយបានបញ្ជូនអ្នកជំងឺធ្ងន់សរុបចំនួន១២នាក់ ទៅមន្ទីរពេទ្យកាល់ម៉ែត ក្នុងនោះមានម្នាក់ស្ថិតក្នុងស្ថានភាពធ្ងន់ធ្ងរខ្លាំងមែនទែន។ អ្នកជំងឺដែលបានបញ្ជូនមកដល់មន្ទីរពេទ្យកាល់ម៉ែតទាំងអស់នោះសុទ្ធតែមានរោគសញ្ញាពុលស្រាដែលមានជាតិមេតាណុលខ្ពស់។
ជាមួយគ្នានោះដែរ លោកសាស្រ្តាចារ្យ ម៉ម ប៊ុនហេង រដ្ឋមន្រ្តីក្រសួងសុខាភិបាល បានអំពាវនាវដល់ប្រជាពលរដ្ឋនៅខេត្តក្រចេះ ក៏ដូចជានៅទូទាំងព្រះរាជាណាចក្រកម្ពុជា ដើម្បីចៀសវាងនូវបញ្ហាសុខភាព សូមប្រកាន់ខ្ជាប់នូវការអនុវត្តអនាម័យល្អ រស់នៅស្អាត ជាពិសេសអ្នុគោលការណ៍ការអនាម័យចំណីអាហារស្អាត ដោយបរិភោគទឹកស្អាត និងឆ្អិតល្អ ឧស្សាហ៍លាងសំអាតដៃដោយសាប៊ូនៅមុនពេល និងក្រោយពេលចម្អិតម្ហូបអាហារ និងក្រោយពេលបន្ទោបង់សម្អាតបន្លែផ្លែឈើ និងត្រីសាច់ឲ្យបានត្រឹមត្រូវ ទុកដាក់ម្ហូបអាហារនៅដាច់ដោយឡែកពីគ្នាកុំឲ្យច្របូលច្របល់ និងកុំរក្សាម្ហូបទុកយូរនាំឲ្យផ្អូម និងអាចមានមេរោគ។
ក្រសួងសុខាភិបាល បានចេញសេចក្តីជូនព័ត៌មាន ស្តីពីករណីពុលស្រា និងសង្ស័យពុលទឹកនៅខេត្តក្រចេះ នៅថ្ងៃទី៧ខែឧសភានេះ ៖ វិធានការដែលបានដាក់ចេញរបស់អាជ្ញាធរមូលដ្ឋានរួមមាន ការបញ្ឈប់ការបិត និងលក់ស្រាសក្នុងមូលដ្ឋាន បំរាមប្រជាជនក្នុងភូមិកុំឲ្យប្រើប្រាស់ទឹកអូរក្នុងតំបន់សង្ស័យ និងជួយដឹកទឹកស្អាតផ្គត់ផ្គង់ដល់អ្នកភូមិ និងអប់រំអនាម័យរស់នៅ និងហូបស្អាតដល់ប្រជាជនក្នុងភូមិ៕ ដោយ៖បញ្ញាស័ក្តិ
