ខេត្តមណ្ឌលគិរី៖ រដូវប្រមូលផលផ្លែប័រ នៅខេត្តមណ្ឌលគិរី បានចូលមកដល់បណ្ដើរៗហើយ នៅគ្រាដែលកសិករ អះអាងថា ទិន្នផលដំណាំហូបផ្លែប្រភេទនេះ កំពុងមានទីផ្សារល្អខ្លាំងណាស់ ដោយមានឈ្មួញត្រៀមទទួលទិញអស់ៗគ្មានសល់ពីចំការ។ ប្រការនេះ ធ្វើឲ្យកសិកយល់ឃើញថា ដំណាំប័រជាប្រភេទដំណាំ ដែលងាយដាំ ហើយផ្លែប័រ ក៏ងាយក្នុងការលក់ចេញ ចំណែកឯតម្លៃវិញក៏ថ្លៃល្មមទទួលយកបាន ។
ម្ចាស់ចំការប័រ ប្រហែល ៥ហិកតា នៅភូមិឡៅការ សង្កាត់សុខដុម ក្រុងសែនមនោរម្យ ឈ្មោះ លោក ចាំ ចន បានឲ្យដឹងថា ការដាំដំណាំប័រ គឺមិនលំបាកទាល់តែសោះសម្រាប់កសិករ ព្រោះប័រ មិនទាមទារការស្រោចទឹកជាប់លាប់នោះទេ ស្ទើរតែមិនស្រោចទឹកក៏បាន សំខាន់ គឺដីមានជីវជាតិល្អ មានអាកាសធាតុត្រជាក់ តួយ៉ាងដូចខេត្តមណ្ឌលគិរីជាដើម។ កសិករ និយាយថា ដំណាំនេះ ប្រសិនបើដាំនៅតំបន់មានអាកាសធាតុក្ដៅ គឺមិនចេញផ្លែផ្កានោះទេ គឺចេញតែស្លឹកប៉ុណ្ណោះ ជាក់ស្ដែង លោកធ្លាប់បានផ្ដល់កូនដំណាំប័រ ទៅសាកល្បងដាំនៅខេត្តព្រះសីហនុ តែមិនចេញផ្លែនោះទេ ធ្វើឲ្យលោកគិតថា មានតែខេត្តមណ្ឌលគិរីមួយគត់ ដែលអំណោយផលខ្លាំងបំផុតសម្រាប់ការបង្កបង្កើនផលដំណាំប័រ ។
លោក ចាំ ចន បន្តថា សព្វថ្ងៃនេះមានឈ្មួញច្រើនណាស់ ដែលចាំទទួលទិញទិន្នផលប័រយកទៅលក់បន្ត ដោយទិន្នផលដែលមាននៅចំការ របស់លោក មិនអាចផ្គត់ផ្គង់ឲ្យគ្រប់តាមតម្រូវការទីផ្សារទេ ចំណែកតម្លៃវិញ គឺលោកអាចលក់បានប្រមាណ ៥ពាន់រៀល ក្នុង ១គីឡូក្រាម ទៅឲ្យឈ្មួញកណ្ដាល ហើយគេលក់បន្តបានប្រហែល ៧ពាន់ ឬ៨ពាន់ ទៅ ១ម៉ឺនរៀល ក្នុង ១គីឡូក្រាម ។
កសិករខាងលើ បានបញ្ជាក់ថា ក្នុងផ្ទៃដីដាំដុះដំណាំប័រ ៥ហិកតា របស់លោក បានផលទើបតែ ៣ហិកតាប៉ុណ្ណោះ ចំណែកទិន្នផល ដែលលោកទទួលបាន ក្នុង១ដើម គឺអាចទទួលបានចន្លោះពី ៣០ទៅ ៧០គីឡូ អាស្រ័យលើដើមប័រ ដែលមានអាយុតិច ឬច្រើន ដោយដំណាំនេះចាប់ផ្ដើមហុចផលនៅឆ្នាំទី៤ ប៉ុន្តែនៅឆ្នាំទី៥ ទី៦ ទើបទទួលបានផលច្រើន រីឯផ្លែផ្ការបស់វា គឺចេញមកក្នុង ១ឆ្នាំម្ដង និងមានម្ដងម្កាលចេញមក ២ដង គេហៅថាផ្លែខុសរដូវ ។
លោកបញ្ជាក់ទៀតថា ក្នុងឆ្នាំ២០១៨នេះ ដំណាំប័រ របស់លោកទើបហុចផលបានប្រហែលជាង ១តោនប៉ុណ្ណោះ ព្រោះរដូវប្រមូលផលពេញលេញតែម្ដងមិនទាន់ចូលមកដល់ ប៉ុន្តែបើគិតចាប់ពីឆ្នាំ២០១៦ គឺលោកប្រមូលផលបាន ៩តោនហើយមកដល់ឆ្នាំ២០១៧ ប្រមូលផលបាន ១១តោន ។
ជាមួយគ្នានេះដែរ កសិករដដែលក៏បានសម្ដែងក្ដីបារម្ភជុំវិញការនាំចូលផ្លែប៊័គីមីពីប្រទេសវៀតណាម មកលក់លើ ទីផ្សារយើងនាពេលបច្ចុប្បន្ននេះ ដោយផ្លែប័រ មកពីវៀតណាមត្រូវបានគេដាក់ជីគីមី ឲ្យចេញផ្លែរាល់ខែ និងមានរស់ជាតិមិនឈ្ងុយឆ្ងាញ់ដូចផ្លែប័រ ធម្មជាតិខេត្តមណ្ឌលគិរីនោះទេ ហើយព្រោះតែប័រធម្មជាតិ មណ្ឌលគិរី មិនអាចផ្គត់ផ្គង់ទីផ្សារគ្រប់គ្រាន់ ធ្វើឲ្យឈ្មួញខិលខូចមួយចំនួនតូច តែងយកផ្លែប័រវៀតតណាមមកបន្លំលាយជាមួយផ្លែប៊័រខេត្តមណ្ឌលគិរី លក់ចេញលើទីផ្សារដែលនេះជាទង្វើមួយធ្វើឲ្យខូចកេរ្តិ៍ឈ្មោះ របស់ផ្លែប័រធម្មជាតិពិតៗ របស់ខេត្តមណ្ឌលគិរី ។
ប្រធានមន្ទីរកសិកម្មរុក្ខាប្រមាញ់ និងនេសាទ ខេត្តមណ្ឌលគិរី លោក សុង ឃាង បានឲ្យដឹងដែរថា បច្ចុប្បន្នផ្ទៃដាំដុះដំណាំប័រ នៅខេត្តមណ្ឌលគិរី មានប្រហែល ១០០ហិកតា ក្នុងនោះមានដំណាំលក្ខណៈគ្រួសារខ្លះ និងជាប្រភេទចំការខ្លះ ចំណែកទីផ្សារវិញលោកយល់ថា មានតម្លៃល្អខ្លាំងណាស់ ចំពោះដំណាំប័រនេះ ។
លោកបញ្ជាក់ថា នៅក្នុងប្រទេសកម្ពុជា មានតែខេត្តមណ្ឌលគិរី និងខេត្តរតនគិរីប៉ុណ្ណោះ ដែលមានផ្ទៃដី និងអាកាសធាតុអំណោយផលដល់ការបង្កបង្កើនផលដំណាំប័រនេះជាងគេ ៕ ដោយ: សមុទ្រឈើ