ភ្នំពេញ ៖ តុលាការកំពូល នៅព្រឹកថ្ងៃទី៧ ខែឧសភា ឆ្នាំ២០១៨នេះ ចាប់ផ្តើមបើកសវនាការជំនុំជម្រះ លើសំណុំប្តឹងប្រឆាំងនឹង ការពន្យារពេលឃុំខ្លួន លោក កឹម សុខា អតីតប្រធានគណបក្សសង្គ្រោះជាតិ ខណៈសវនការមិនមានវត្តមាន លោក កឹម សុខា។
លោកផែង ហេង មេធាវីជនត្រូវចោទកឹម សុខា បានថ្លែងឱ្យដឹងថា សវនាការនេះគឺបណ្តឹងប្រឆាំងនឹងដីកាពន្យារពេល នៃការឃុំខ្លួនជនត្រូវចោទ កឹម សុខា ។
បើតាមលោកម៊ុត ចន្ថា នាយកខុទ្ទកាល័យលោកកឹម សុខា បានសរសេរក្នុងផេកហ្វេសប៊ុកថា “នៅព្រឹកថ្ងៃចន្ទ ទី៧ ខែឧសភា អង្គុយចាំអ៊ុតលទ្ធផលជំនុំជម្រះលើអង្គច្បាប់ ស្តីពីបណ្តឹងសាទុក្ខការស្នើសុំដោះលែង ឯកឧត្តម កឹម សុខា ប្រធានគណបក្សសង្គ្រោះជាតិ នៅតុលាការកំពូល។ សូមអរគុណដល់មិត្តភក្តិដែលមានសមានចិត្តទាំងជនរួមជាតិ និងមិត្តភក្តិបរទេស មន្ត្រីទូត និងអ្នកសារព័ត៌មាន ដែលចូលរួមតាមដាន សង្កេតការណ៍ និងលើកទឹកចិត្ត”។
គួរបញ្ជាក់ថា លោក កឹម សុខា ត្រូវបានចោទប្រកាន់ពីបទ សន្ធិដ្ឋិភាពជាមួយបរទេស តាមមាត្រា ៤៤៣នៃក្រមព្រហ្មទណ្ឌ។ បទសន្ធិដ្ឋិភាពជាមួយបរទេស គឺជាអំពើត្រូវរ៉ូវគ្នាដោយសម្ងាត់ជាមួយរដ្ឋបរទេស ឬភ្នាក់ងារបរទេស ដើម្បីបង្កើតឱ្យមានអំពើប្រទូស្តរ៉ាយ ឬឱ្យមានអំពើឈ្លានពានប្រឆាំងនឹងព្រះរាជាណាចក្រកម្ពុជា។ បទល្មើសនេះ ត្រូវជាប់ពន្ធនាគារពី ១៥ឆ្នាំដល់៣០ឆ្នាំ។ លោក កឹម សុខា ត្រូវបានសមត្ថកិច្ចចាប់ខ្លួន នៅពាក់កណ្តាលអធ្រាត្រ ឈានចូលថ្ងៃទី៣ ខែកញ្ញា ឆ្នាំ២០១៧។ ក្រោយឃាត់ខ្លួន សមត្ថកិច្ចបានបញ្ជូនលោក កឹម សុខា ទៅឃុំបណ្តោះអាសន្ននៅពន្ធនាគារត្រពាំងផ្លុង ខេត្តត្បូងឃ្មុំ នៅថ្ងៃទី៤ ខែកញ្ញា ឆ្នាំ២០១៧៕ ដោយ ៖ បញ្ញាស័ក្តិ
