ភ្នំពេញ៖សម្តេចតេជោ ហ៊ុន សែន នាយករដ្ឋមន្ត្រីកម្ពុជា បានមានប្រសាសន៍ចោទសួរ ទៅលោកសម រង្ស៊ី អតីតមេដឹកនាំ អតីតគណបក្សសង្គ្រោះជាតិថា តើប្រទេសណាមួយជាសហគមន៍អន្តរជាតិ ដែលនឹងមិនទទួលស្គាល់លទ្ធផលបោះឆ្នោត ឬ ដាក់សម្ពាធលើកម្ពុជា។
សម្តេចតេជោ ហ៊ុន សែន បានថ្លែងបែបនេះនៅព្រឹកថ្ងៃចន្ទ ទី៧ ខែឧសភា ឆ្នាំ២០១៨នេះ ក្នុងឱកាសអញ្ជើញបើកការដ្ឋានពង្រីក និងលើកកម្រិតគុណភាព (ពី DBST ទៅ AC) កំណាត់ផ្លូវជាតិលេខ៣ ប្រវែងសរុបជិត ១៣៥គីឡូម៉ែត្រ ដោយគ្រោងចំណាយថវិកាជាង ២០០លានដុល្លារ។ ពាក់ព័ន្ធការលើកឡើងរបស់ក្រុមអ្នកនយោបាយបាត់សិទ្ធិធ្វើនយោបាយថា អង្គការសហប្រជាជាតិនឹងដកអាសនៈពីអង្គការសហប្រជាជាតិនោះ សម្តេចតេជោ បានបញ្ជាក់ថា អង្គការសហប្រជាជាតិនៅតែត្រូវការកម្ពុជាបញ្ជូនកងកម្លាំងទៅចូលរួមក្នុងបេសកកម្មរក្សាសន្តិភាព។
សម្តេចតេជោ បានថ្លែងដែរថា គណបក្សនយោបាយខ្លះងាប់ តែលទ្ធិប្រជាធិបតេយ្យ នៅកម្ពុជា មិនស្លាប់នោះឡើយ ការបោះឆ្នោតនៅតែមានតាមកាលកំណត់។” អ្នកខ្លះតាំងខ្លួនថា បើសិនជាគណបក្សគេមិនបានចូលរួមបោះឆ្នោត សហគមន៍អន្តរជាតិ ក៏មិនទទួលស្គាល់ ខ្ញុំចង់និយាយថា អ្វីទៅជាសហគមន៍អន្តរជាតិ សូមផ្តល់ជាចម្លើយឱ្យបានត្រឹមត្រូវ នរណាជាតួរអង្គពិតប្រាកដនៃសហគមន៍អន្តរជាតិ ត្រូវនិយាយគ្នាឱ្យច្បាស់ត្រង់ចំណុចនេះ ដើម្បីកុំឱ្យអីបន្តិច សហគមន៍អន្តរជាតិ សម្ពាធអន្តរជាតិ។ អ្នកឯងមានប្រទេស១ ប្រទេស២ ស្រែកគាំទ្រអ្នកឯង តែកុំភ្លេចថា មានប្រទេសច្រើនណាស់ ដែលគាំទ្ររដ្ឋាភិបាលសព្វថ្ងៃ ហើយបន្តការងារធ្វើការជាមួយ រដ្ឋាភិបាលសព្វថ្ងៃ ហើយបានបន្តការងារធ្វើការជាមួយរដ្ឋាភិបាលកម្ពុជាសព្វថ្ងៃ ចិន ឥណ្ឌា កូរ៉េខាងត្បូង ជប៉ុន ឬប្រទេសដទៃ ក្នុងសហគមន៍អាស៊ាន តើគេមិនសហគមន៍ អន្តរជាតិទេឬអី? សម្តេចតេជោ នាយករដ្ឋមន្ត្រី បានបញ្ជាក់បន្ថែមយ៉ាងដូច្នេះ។
ការប្រតិកម្មខ្លាំងពីសំណាក់សម្តេចតេជោបែបនេះ ក្រោយពេលដែលអតីតមេដឹកនាំអតីតគណបក្សសង្គ្រោះជាតិ បានលើកឡើងថាខ្លួននឹងពហិការការបោះឆ្នោតនាថ្ងៃទី២៩ ខែកក្កដា ឆ្នាំ២០១៨ ខាងមុននេះ ហើយអវត្តមានរបស់ខ្លួនក្នុងការប្រកួតប្រជែងការបោះឆ្នោតថ្នាក់ជាតិ នោះសហគមន៍អន្តរជាតិនឹងមិនទទួលស្គាល់នោះទេ ។
សម្តេចនាយករដ្ឋមន្ត្រី បានបញ្ជាក់ថា ការអំពាវនាវរបស់លោក សម រង្ស៊ី កុំឲ្យប្រជាពលរដ្ឋទៅបោះឆ្នោត គឺជាការបំពានសិទ្ធិរបស់ប្រជាពលរដ្ឋ ។ បើគណបក្សប្រឆាំងរបស់លោក សម រង្ស៊ីមិនចូលរួមការបោះឆ្នោត សហគមន៍អន្តរជាតិនឹងមិនទទួលស្គាល់ការបោះឆ្នោត និងរាជរដ្ឋាភិបាល កុំស្អីតិចសម្ពាធអន្តរជាតិ ឆ្លើយមកសហគមន៍អន្តរជាតិជាអ្នកណា?៕ ដោយ៖បញ្ញាស័ក្តិ