កណ្ដាលៈ នគរបាលស្រុកស្អាង បានបង្ក្រាបល្បែងស៊ីសងខុសច្បាប់ (អាប៉ោង) ដោយបានឃាត់ខ្លួនសង្ស័យចំនួន៣នាក់។ ក្នុងឱកាសនោះដែរ នគរបាលស្រុកស្អាង ធ្វើការចាប់ខ្លួនបុរសម្នាក់ បន្ទាប់ពីបុរសសង្ស័យបានជេរប្រមាថទៅលើមន្ត្រីសាធារណៈ ខណៈដែលមន្ត្រីមានសមត្ថកិច្ច កំពុងចុះបំពេញការបង្ក្រាបលកបែងស៊ីសងខុសច្បាប់ ។
ហេតុការណនេះកើតឡើង នៅថ្ងៃអាទិត្យ ទី៦ ខែឧសភា ឆ្នាំ២០១៨ វេលាម៉ោង១៣និង២៥នាទី នៅចំណុចផ្ទះ សេន តឿ ស្ថិតក្នុងភូមិតាគល់ ឃុំក្រាំងយ៉ូវ ស្រុកស្អាង ខេត្តកណ្តាល។
ជនសង្ស័យ ល្បែងស៊ីសងខុសច្បាប់ ចំនួន៣នាក់ដែលត្រូវឃាត់ខ្លួន ឈ្មោះភុម ផុន ភេទ ប្រុស អាយុ៤៥ ជនជាតិ ខ្មែរ មុខរបរ កសិករ ។ ឈ្មោះសុខ ផុន ភេទ ប្រុស អាយុ៤៣ ជនជាតិខ្មែរ មុខរបរកសិករ ។ ឈ្មោះឡាយ វុទ្ធី ភេទ ប្រុស អាយុ២៨ឆ្នាំ ជនជាតិខ្មែរ មុខរបរ កម្មកររោងចក្រ។ អ្នកទាំង៣មានទីលំនៅ ភូមិ តាគល់ ឃុំក្រាំងយ៉ូវ ស្រុកស្អាង ខេត្តកណ្តាល។
វត្ថុតាងចាប់យក កម្រាលចាក់អាប៉ោងចំនួន ១ មេអាប៉ោងចំនួន១គ្រាប់ ចានបាញ់អាប៉ោងចំនួន១ ជើងទម្រចំនួន១ គ្របចាន អាប៉ោងចំនួន១ ប្រាក់ចំនួន១១១៥០០រៀល ម៉ូតូចំនួន៥គ្រឿង រួមមាន៖ ម៉ូតូម៉ាកសង់កូរ៉េពណ៌ព្រីងទុំលាយក្រហមស្លាកលេខភ្នំពេញ1S.0156ចំនួន១គ្រឿង ម៉ូតូម៉ាកSL ពណ៌ទឹកប្រាក់ពាក់ផ្លាកលេខភ្នំពេញ1FF.5219ចំនួន១គ្រឿង ម៉ូតូម៉ាកគប់ជ្រុង70ពណ៌ទឹកប៊ិចគ្មានផ្លាកលេខចំនួន១គ្រឿង ម៉ូតូម៉ាកគប់មូល៩០ពណ៍សំបកឪឡឹកគ្មានផ្លាកលេខចំនួន១គ្រឿង ម៉ូតូម៉ាកគប់មូល៥០ពណ៌សំបកឪឡឹកពាក់ផ្លាកលេខកណ្តាល1T.6279ចំនួន១គ្រឿង។
នគរបាលបានឲ្យដឹងថា នៅថ្ងៃខែឆ្នាំវេលាម៉ោងកើតហេតុខាងលើ ក្រោយពេលទទួលបានព័ត៌មាន ពីប្រជាពលរដ្ឋល្អថា មានសកម្មភាពលេងល្បែងស៊ីសង (អាប៉ោង) នៅចំណុច ផ្ទះឈ្មោះ សេន តឿ ស្ថិតនៅភូមិ តាគល់ ឃុំក្រាំងយ៉ូវ ស្រុកស្អាង ខេត្តកណ្តាល ភ្លាមនោះ សមត្ថកិច្ចនគរបាលស្រុកស្អាង បានទៅដល់កន្លែងកើតហេតុ បង្ក្រាបបានជនសង្ស័យចំនួន៣នាក់ រួមនឹងវត្ថុតាងខាងលើ រួចបញ្ជូនមកអធិការដ្ឋាននគរបាលស្រុកស្អាង ដើម្បីសាកសួរ។
នៅចំពោះមុខសមត្ថកិច្ចនគរបាល ឈ្មោះ សុខ ផុន បានសារភាពថា ខ្លួនពិតជាធ្វើមេបាញ់អាប៉ោង នៅចំណុចផ្ទះឈ្មោះ សេន តឿ ពិតប្រាកដមែន ចំណែកឈ្មោះភុម ផុននិងឈ្មោះឡាយ វុទ្ធី ខ្លួនជាអ្នកចូលរួមចាក់អាប៉ោង។ បច្ចុប្បន្នជនសង្ស័យទាំង៣នាក់ បានឃាត់ខ្លួននៅអធិការដ្ឋាននគរបាលស្រុកស្អាង ដើម្បីបន្តអនុវត្តតាមនីតិវិធី។
នគរបាលស្រុកស្អាងធ្វើការចាប់ខ្លួនបុរសម្នាក់ បន្ទាប់ពីបុរសសង្ស័យខាងលើជេរប្រមាថទៅលើមន្ត្រីសាធារណៈមន្ត្រីនគរបាលស្រុកស្អាងបានឲ្យដឹងថា ជនសង្ស័យម្នាក់ជេរប្រមាថសមត្ថកិច្ចកំពុងចុះបំពេញការបង្ក្រាបល្បែងស៊ីសងខុសច្បាប់ ដែលចាប់ខ្លួនបានមានឈ្មោះ ហៀងភានិត ភេទប្រុស អាយុ២៨ឆ្នាំ ជនជាតិខ្មែរ មុខរបរ កសិករ មានទីលំនៅភូមិតាគល់ ឃុំក្រាំងយ៉ូវ ស្រុកស្អាង ខេត្តកណ្តាល ។ ក្នុងការចាប់ខ្លួននេះដែរ សមត្ថកិច្ចធ្វើការដកហូតវត្ថុតាងទូរស័ព្ទដៃម៉ាក Iphone 6 ពណ៌ខ្មៅចំនួន១គ្រឿង ។
ប្រភពដដែលបន្តថា នៅថ្ងៃទី៦ ខែឧសភា ឆ្នាំ២០១៨ វេលាម៉ោង ១៣និង២៥នាទី សមត្ថកិច្ចនគរបាលស្រុកស្អាង សហការជាមួយនគរបាលប៉ុស្តិ៍រដ្ឋបាលក្រាំងយ៉ូវ ចុះប្រតិបត្តិការបង្ក្រាបមុខសញ្ញាលេងល្បែងស៊ីសងខុសច្បាប់(អាប៉ោង) នៅចំណុចកើតហេតុខាងលើ ខណៈនោះស្រាប់តែមានឈ្មោះ ហៀង ភានិត (ជនសង្ស័យ) បានមកដល់ រួចនិយាយប្រមាថមកលើសមត្ថកិច្ចនគរបាលថា “មកបង្ក្រាបមិនស្លៀកពាក់ឯកសណ្ឋាន មានច្បាប់មកពីណា” ភ្លាមនោះសមត្ថកិច្ចក៏បានប្រាប់ថា “បើស្លៀកពាក់ឯកសណ្ឋាន ចាប់មិនបានទេ” ប្អូនទៅផ្ទះវិញទៅ ។ ពេលជាមួយគ្នានោះជនសង្ស័យឈ្មោះ ហៀង ភានិត មិនព្រមស្ដាប់សមត្ថកិច្ចទេ ថែមទាំងយកទូរសព្ទ័ដៃម៉ាក iPhone របស់ខ្លួនមកថតសមត្ថកិច្ច ។ ភ្លាមនោះសមត្ថកិច្ចនគរបាលបានឃាត់មិនអោយថត ដោយសារខ្លួន (ជនសង្ស័យ)មិនមែនជាអ្នកសារព័ត៍មាន ខណៈនោះឈ្មោះ ហៀង ភានិត ក៏បានជេរប្រមាថសមត្ថកិច្ចទៀតដោយពោលពាក្យអសុរោះ ជាច្រើន រំពេចនោះសមត្ថកិច្ចនគរបាល ក៏បានឃាត់ខ្លួនឈ្មោះ ហៀង ភានិត បញ្ជូនមកអធិការដ្ឋាននគរបាលស្រុកស្អាង ដើម្បីកសាងសំណុំរឿងតាមនីតិវិធី ៕ ដោយ ៖ បញ្ញាស័ក្តិ