ខេត្តព្រះសីហនុ៖ ប្រជាពលរដ្ឋមានទំនាស់ធ្លីរាំរ៉ៃចំនួន ៦នាក់ រស់នៅសហគមន៍អូរខ្សាច់ ស្ថិតក្នុងភូមិ៤ ឃុំអូរត្រេះ ស្រុកស្ទឹងហាវ ខេត្តព្រះសីហនុនៅរសៀលថ្ងៃចន្ទ ទី៧ ខែឧសភា ឆ្នាំ២០១៨នេះ ត្រូវបានកម្លាំងកងរាជអាវុធហត្ថខេត្តនេះ ចាប់បញ្ជូនទៅកាន់សាលាដំបូងខេត្តព្រះសីហនុ ដើម្បីបន្ត នីតិវិធី តាមបណ្តឹង របស់លោកឧកញ៉ា តាន់ តាត់ អ្នកមានទ្រព្យដ៏ល្បីល្បាញម្នាក់រស់នៅខេត្តព្រះសីហនុ។
បន្ទាប់ពីត្រូវបានតុលាការសាកសួរនៅរសៀលថ្ងៃនេះ ប្រជាពលរដ្ឋទាំង ៦នាក់ ត្រូវបានបញ្ជូនចេញពីសាលាដំបូងខេត្តព្រះសីហនុ ទៅកាន់បញ្ញាការដ្ឋានកងរាជអាវុធហត្ថខេត្តព្រះសីហនុ រង់ចាំបន្តនីតិវិធី នៅថ្ងៃស្អែក ជាបន្តទៀត។
ពាក់ព័ន្ធការចាប់ខ្លួននេះ ប្រជាពលរដ្ឋទាំង ៦នាក់ ដែលត្រូវកម្លាំងកងរាជអាវុធហត្ថខេត្តព្រះសីហនុ ចាប់ឃាត់ខ្លួន កាលពីល្ងាចថ្ងៃអាទិត្យ ទី៦ ខែឧសភា ឆ្នាំ២០១៨ និងបានបញ្ជូនខ្លួនទៅកាន់សាលាដំបូងខេត្តព្រះសីហនុ នៅរសៀលថ្ងៃចន្ទ ទី៧ ខែឧសភានេះ បានអះអាងថា ពួកគេ មានឯកសារកាន់កាប់ដី ដែលលោកឧកញ៉ា តាន់ តាត់ អះអាងថា ជាកម្មសិទ្ធិខ្លួននោះ ដូចគ្នាដែរ។
ពលរដ្ឋរងគ្រោះទាំង ៦នាក់ ដែលត្រូវកម្លាំងកងរាជអាវុធហត្ថ ចាប់ដាក់ខ្នោះដៃ បញ្ជូនទៅសាលាដំបូង នៅរសៀលថ្ងៃចន្ទ ទី៧ ខែឧសភានេះ បានសំណូមពរដល់ សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា និងសម្តេច ប៊ុន រ៉ានី ឲ្យជួយរកយុត្តិធ៌មលើទំនាស់ដីធ្លី ជូនប្រជាពលរដ្ឋរស់ នៅសហគមន៍អូរខ្សាច់ ស្ថិតក្នុងភូមិ៤ ឃុំអូរត្រេះ ស្រុកស្ទឹងហាវ ឲ្យទទួលបានយុត្តិធ៌ម ដោយក្តីអនុគ្រោះផង។
2D4E274B-6F0F-4AB4-A478-A36F9DB572B6 D6F155ED-7F0F-4FD2-88DA-DDCD61621F1E 3BB29413-222C-4ACB-95AF-5DF243FC8C35
ទាក់ទិនបញ្ហានេះ មន្ត្រីសង្គមស៊ីវិលជាតិ–អន្តរជាតិ ប្រចាំខេត្តព្រះសីហនុ ក៏កំពុងតាម ឃ្លាំមើលការចាប់បញ្ជូន ខ្លួនប្រជាពលរដ្ឋទាំង ៦នាក់ ដែលមានទំនាស់ដីធ្លី ជាមួយឧកញ៉ា តាន់ តាត់ អ្នកមានទ្រព្យដ៏ល្បីម្នាក់ រស់នៅខេត្តព្រះសីហនុ នាសាលាដំបូងខេត្តនេះដែរ។
មន្ត្រីសង្គមស៊ីវិល បានឲ្យដឹងថា ក្នុងចំណោមប្រជាពលរដ្ឋទាំង ៦នាក់ ដែលត្រូវកម្លាំងកងរាជអាវុធហត្ថខេត្តព្រះសីហនុ ចាប់ខ្លួន ក៏មានអ្នកស្រី ឡុច ទូច ជាតំណាងពលរដ្ឋមានទំនាស់ដីធ្លី នៅសហគមន៍អូរខ្សាច់ ស្ថិតក្នុងភូមិ៤ ឃុំអូរត្រេះ ស្រុកស្ទឹងហាវ ដែលធ្លាប់ចេញមុខតវ៉ាលើទំនាស់ដីធ្លីរាំរ៉ៃនាពេលកន្លងមក។
បច្ចុប្បន្ន ប្រជាពលរដ្ឋមានទំនាស់ដីធ្លីទាំង ៦នាក់ខាងលើ ត្រូវបានមន្ត្រីកងរាជអាវុធហត្ថខេត្តព្រះសីហនុ ចាប់បញ្ជូន ទៅកាន់សាលាដំបូងខេត្តព្រះសីហនុ ដើម្បីបន្តនីតិវិធីទៅតាមបណ្តឹង របស់លោកឧកញ៉ា តាន់ តាត់ ដែលជាអ្នកមានទ្រព្យធនដ៏ល្បីម្នាក់។
អ្នកយកព័ត៌មានគេហទំព័រ WWW.CEN.COM ប្រចាំខេត្តព្រះសីហនុ មិនទាន់មានប្រភពទាក់ទង លោកឧកញ៉ា តាន់ តាត់ ដើម្បីស្នើការបំភ្លឺអំពីមូលហេតុ ដែលឈានដល់ប្តឹងមន្ត្រីកងរាជអាវុធហត្ថ ឲ្យចាប់ខ្លួន ប្រជាពលរដ្ឋទាំង ៦នាក់ នៅសហគមន៍អូរខ្សាច់ខាងលើបានទេ នៅរសៀលថ្ងៃចន្ទ ទី៧ ខែឧសភា ឆ្នាំ២០១៨។
ករណីនេះ មន្ត្រីសង្គមស៊ីវិលជាតិ និងអន្តរជាតិ ថ្លែងថា កំពុងតាមឃ្លាំ និងអង្គេតទៅលើសកម្មភាព នៃការចាប់ខ្លួនប្រជាពលរដ្ឋ មានទំនាស់ដីធ្លីទាំង ៦នាក់ នៅសហគមន៍អូរខ្សាច់ មានទីតាំងនៅភូមិ៤ ឃុំអូរត្រេះ ស្រុកស្ទឹងហាវ ខេត្តព្រះសីហនុនេះ ដោយយកចិត្តទុកដាក់។
អ្នកឃ្លាំមើលសង្គម បានអះអាងថា ការចាប់ខ្លួនប្រជាពលរដ្ឋមានទំនាស់ដីធ្លី រស់នៅសហគមន៍អូរខ្សាច់ខាងលើនេះ បានកើតមានជាថ្មី ស្របពេលតម្លៃទិញលក់ដី នៅខេត្តព្រះសីហនុ កំពុងមានហាងឆេងខ្ពស់ ដោយសារកំណើនអ្នកវិនិយោគទុនចិន ចូលមកមូលដ្ឋាននេះមានចំនួនច្រើនគួរឲ្យកត់សម្គាល់នាពេលបច្ចុប្បន្ននេះ៕ ដែន សីមា