ខេត្តកំពង់ស្ពឺ៖ មន្ត្រីសាលាដំបូងតុលាការខេត្តកំពង់ស្ពឺ បានអំពាវនាវដល់ពលរដ្ឋ ឲ្យគោរពច្បាប់ ដើម្បីជៀសវាងបង្កទំនាស់ នាំឲ្យខាតពេលវេលាលុយកាក់និងបាត់បង់ទំនាក់ទំនងល្អ ក្នុងនាមជាពលរដ្ឋក្នុងមូលដ្ឋាន។
ការអំពាវនាវបែបនេះ បន្ទាប់តុលាការខេត្តកំពង់ស្ពឺ បានចេញដីការជាច្រើនលើពលរដ្ឋ ដែលមានទំនាស់ និងគ្នារឿងដីឡូត៌មួយកន្លែង ស្ថិតនៅភូមិចេក ឃុំអូរ ស្រុកភ្នំស្រួច ខេត្តកំពង់ស្ពឺ ដែលមានទំហំដីក្បាល ១៥០០ម៉ែត្រការ៉េ បណ្តោយ១២៨ម៉ែត្រ ទទឹង១២ម៉ែត្រ។
ដីនោះដើមឡើង គឺជាកម្មសិទ្ធិ របស់ លោកយាយ សុខ ចំរើន អាយុ ៧២ ហើយត្រូវបានអ្នកជិតខាង រំលោភយកសង់ជារបង និងខ្ទមលើដីនោះ ដោយលោកស្រី បាន សារ៉ាត់ អាយុ ៥០ឆ្នាំ បច្ចុប្បន្ន ត្រូវបានសមត្ថកិច្ចឃាត់ខ្លួន ចាត់វិធានការទៅតាមនីតិវិធី ដោយសារតែមិនគោរពសាលក្រមតុលាជាច្រើនលើកច្រើនសារ។
ដំណើររឿងក្តីក្តាំនេះ បានអូសបន្លាយតាំងពីឆ្នាំ១៩៩៩ រហូតមកដល់ថ្ងៃទី៧ ខែឧសភា ឆ្នាំ២០១៨ ពោល គឺរយៈពេល ១៩ឆ្នាំហើយ ព្រោះតែភាគីទាំងពីរមិនសម្របសម្រួលគ្នាត្រូវ ដែលធ្វើអោយខាតពេលវេលា និងប្រាក់កាក់ រំខានដល់ការរកទទួលទានរៀងៗខ្លួន ដោយសារតែមិនព្រមគោរពច្បាប់ ដែលខាងតុលាការចេញដីកាបង្គាប់។ ពោលគឺភាគី លោកស្រី បាន សារ៉ាត់ មិនព្រមចូលតាមដីកាកោះ និងដីកាសម្រេច ប្រឆាំង និងសាលក្រមតុលារ ហើយតុលាការក៏បានទុកឳកាសយ៉ូហើយដែរ ក្នុងការឲ្យភាគីទាំងពីរ សម្របសម្រួលគ្នា តែភាគីលោកស្រី បាន សារ៉ាត់ នៅតែមិនអនុវត្តន៍ ទើបតុលារការសម្រេចចាត់វិធានការឃាត់ខ្លួនពីបទព្រហ្មទណ្ឌ (រំលោភលើសេចក្តីទុកចិត្ត រំលោភកាន់កាប់អចលនវត្ថុ និងធ្វើបាត់បង់ជំនឿលើសេចក្តីសម្រេច របស់តុលាការ) ដោយចាត់វិធានការទៅតាមនីតិវិធី។
ផ្តើមពីបញ្ហានេះហើយ ទើបសាលាដំបូងខេត្តកំពង់ស្ពឺ អំពាវនាវដល់ពលរដ្ឋឲ្យគោរពច្បាប់ ជៀសវាងបង្កទំនាស់ និងគ្នា នាំឲ្យខាតពេលវេលានិងប្រាក់កាក់ ពោលគឺត្រូវសម្របសម្រួលគ្នានៅនឹងមូលដ្ឋានឲ្យចប់ប្រសើរជាជាង យករឿងអូសបន្លាយមកផ្លូវតុលាការ កាលបើនៅតុលាការហើយនោះ គឺថា មានអ្នកឈ្នះ និងអ្នកចាញ់ហើយ បើអាចគួររកវិធីឈ្នះទាំងអស់គ្នានៅមូលដ្ឋានទើបប្រសើរជាង៕ ដោយ៖ តាយ៉ង
