សៀមរាប ៖ មុននេះបន្តិចឃើញមានការស៊ែរតៗគ្នាជាច្រើន ពីរូបភាពរបស់ជនជាតិចិនម្នាក់បានយកដែកអ្វីម្យ៉ាង មកខួងថ្មប្រាសាទនៅក្នុងតំបន់អង្គរ។ យោងតាមរូបភាព បង្ហាញឲ្យឃើញថាជនជាតិចិននោះមានឧបករណ៍ដូចជា ស្វាន ដែកដាប់ជាដើម និងមានឥវ៉ាន់នៅក្នុងកាតាបទៀត។
ជាមួយករណីនេះនគរបាលក្រុងសៀមរាប បានធ្វើការស្រាវជ្រាវរហូតឈានដល់ការឃាត់ខ្លួនជនជាតិចិនបានចំនួន៤នាក់កំពុងស្ថិតក្នុងខេត្តសៀមរាប នារសៀលថ្ងៃទី៧ខែឧសភាឆ្នាំ២០១៨នេះ។
ជនជាតិចិនទាំង៤នាក់ បានយកឧបករណ៍ស្វាន និងដែក ទៅខួងនៅតំបន់អង្គរ បានក្លាយជាប្រធានបទដ៏ក្ដៅគគុកមួយ និងមានការប្រតិកម្មយ៉ាងខ្លាំងពីសំណាក់ពលរដ្ឋខ្មែរ និងអ្នកប្រើបណ្ដាញសង្គមនៅកម្ពុជា។
ជនជាតិចិនមានសកម្មភាពយកដែកទៅស្វាននៅទក្សិណផ្នែកខាងត្បូង នៃប្រាសាទអង្គរវត្តមែន កាលពីថ្ងៃទី៦ ខែឧសភា ឆ្នាំ២០១៨ ម្សិលមិញនេះ ដោយសារតែពួកគេសង្ស័យថានៅទីនោះមានរ៉ែមានតម្លៃ។ លោកបានឲ្យដឹងថា ជនជាតិចិននោះមានគ្នា៤នាក់ បានយកដែកខួងថ្មកសិណ្សនៅផ្នែកខាងត្បូងមុខប្រាសាទអង្គរទំហំមុខកាត់ ១,៦ សង់ទីម៉ែត្រ (ប្រហែលប៉ុនប៊ិច) និងជម្រៅ ១១ សង់ទីម៉ែត្រ។ ក្រោយឃើញសកម្មភាពមិនប្រក្រតីនោះភ្លាម អាជ្ញាធរជាតិអប្សរា បានធ្វើការរាយការណ៍ភ្លាមៗ ទៅដល់នគរបាលបេតិកភណ្ឌ ដើម្បីបញ្ឈប់សកម្មភាពនោះជាបន្ទាន់។ ជនជាតិចិនទាំងនោះបានឆ្លើយថា ពួកគេខួងថ្ម ដើម្បីវាស់នីវ៉ូទឹក។
បច្ចុប្បន្ននេះជនជាតិចិនទាំង៤នាក់ត្រូវបានដោះលែងវិញហើយ ក្រោយពេលធ្វើកិច្ចសន្យាលាយលក្ខណ៍ បញ្ឈប់ការដើរខួងក្នុងតំបន់អង្គរទៀត៕ ដោយ៖បញ្ញាស័ក្តិ
