ឧទ្ធម្ភាគចក្រដែលដឹកកកូនក្រមុំសញ្ជាតិប្រេស៊ីលម្នាក់ បានធ្លាក់នៅក្បែរកន្លែងប្រារព្ធពិធី នៅចំពោះមុខភ្ញៀវដែលមកចូលរួម ប៉ុន្តែប្រការដ៏អស្ចារ្យបានកើតឡើងខណៈពេលកូនក្រមុំដ៏មានសំណាងរូបនេះ នៅមានជីវិត ហើយគ្មានរបួស។
ឧទ្ធម្ភាគចក្រឆាបឆេះ ក្រោយពេលធ្លាក់។
ហេតុការណ៍នេះត្រូវបានស្ថានីយ៍ RT បង្ហោះផ្សាយនៅថ្ងៃទី ៦ ខែឧសភា ។ ករណីនេះបណ្តាលឲ្យមនុស្ស៣នាក់នៅលើយន្តហោះ អ្នកបើកបរ អ្នកថតរូប និងក្មេងម្នាក់រងរបួសស្រាល ហើយក្រោយពីបានទទួលការថែទាំ ក៏បន្តចូលរួមមង្គលការនោះបានដែរ ។
ដោយឡែកកូនក្រមុំនាងពុំមានរងការប៉ះទង្គិចអ្វីទាំងអស់ និងថែមទាំងអាចបន្តចូលរួមពិធីមង្គលការរបស់ខ្លួន រៀបចំឡើងនៅចម្ការទំពាំងបាយជូរមួយ នៅ Sao Paulo ដូចការគ្រោងទុក ។
ខ្សែវីដេអូ ដែលចែករំលែកលើអនឡាញបង្ហាញឲ្យឃើញឧទ្ធម្ភាគចក្រនេះ ប៉ែលប៉ោលលែងគ្រប់គ្រងបានហើយធ្លាក់ចុះមកដីក្បែរកន្លែងប្រមូលផ្តុំរបស់ភ្ញៀវ ។ វាបានផ្ទុះហើយភ្ញៀវទាំងឡាយក៏ត្រូវបានជម្លៀសចេញ ។
សំណល់ចុងក្រោយគួរឲ្យខ្លាច ។
រឿងដែលគួរឲ្យកត់សម្គាល់នោះគឺប្តីរបស់ស្ត្រីឈ្មោះ Udirley Damasceno វ័យ ៣២ឆ្នាំខាងលើ ពុំដឹងថាភរិយាខ្លួនជិះឧទ្ធម្ភាគចក្រមកទេ ដោយអង្គុយរង់ចាំ ហើយថែមទាំងពុំដឹងពីហេតុការណ៍គ្រោះថ្នាក់គួរឲ្យរន្ធត់នេះភ្លាមៗឡើយ ។
បច្ចុប្បន្នប៉ូលិសកំពុងបើកការស៊ើបអង្កេតរកមូលហេតុ ៕