ភ្នំពេញ៖ ក្រសួងមហាផ្ទៃនៅថ្ងៃទី៧ ខែឧសភា ឆ្នាំ២០១៨នេះ បានបង្ហាញបញ្ជីឈ្មោះគណបក្សនយោបាយចំនួន៣៨ ដែលបានចុះបញ្ជីឈ្មោះគណបក្ស នៅក្រសួងមហាផ្ទៃ ស្របតាមច្បាប់ស្តីពី គណបក្សនយោបាយ។
សូមជម្រាបថា រហូតដល់ថ្ងៃនេះមានរយៈពេល៨ថ្ងៃហើយ នៃការចុះបញ្ជីបោះឆ្នោតនៅគណៈកម្មាធិការជាតិរៀបចំការបោះឆ្នោត (គ.ជ.ប) ដែលមានគណបក្សនយោបាយចំនួន៤ បានចុះបញ្ជីរួចរាល់ រួមមានគណបក្សយុវជនកម្ពុជា គណបក្សប្រជាជនកម្ពុជា គណបក្សសញ្ជាតិកម្ពុជា និងគណបក្សខ្មែររួបរួមជាតិ។ រហូតដល់ថ្ងៃទី៧ ខែឧសភា ឆ្នាំ២០១៨នេះ មានគណបក្សនយោបាយចំនួន២១ហើយ បានទៅយកឯកសារពី គ.ជ.ប បំពេញ និងមានគណបក្សនយោបាយចំនួន៨ បានតម្កល់ប្រាក់នៅរតនាគារជាតិ ដើម្បីត្រៀមចូលរួមក្នុងការបោះឆ្នោត។ រយៈពេល នៃការចុះបញ្ជីគណបក្សនយោបាយឈរឈ្មោះបោះឆ្នោត និងបញ្ជីឈ្មោះបេក្ខជនតំណាងរាស្ត្រ សម្រាប់ការបោះឆ្នោតជ្រើសតាំងតំណាងរាស្ដ្រ នីតិកាលទី៦ ឆ្នាំ២០១៨ មានចំនួន១៤ថ្ងៃ ចាប់ពីថ្ងៃទី៣០ ខែមេសា ដល់ថ្ងៃទី១៤ ខែឧសភា ឆ្នាំ២០១៨៕ ដោយ ៖ បញ្ញាស័ក្តិ