អត្តពលិកស្រីវ័យក្មេងម្នាក់ ដែលបានចូលរួមក្នុងការរត់ប្រណាំងមួយ នៅក្នុងទីក្រុង Jogjakarta ភាគកណ្តាលកោះ Java ប្រទេសឥណ្ឌូនេស៊ី ត្រូវបានរំលោភបំពានផ្លូវភេទ នៅលើផ្លូវរត់ក្នុងភូមិមួយ ខណៈនាងកំពុងប្រឈមមុខជាមួយអ្នកស្រុកប្រុសៗមួយក្រុម ដែលបានខឹងសម្បារទៅលើការស្លៀកពាក់ «មិនសមរម្យ» របស់នាង ។ ហើយវីដេអូនៃហេតុការណ៍នេះ បានរីករាលដាលលើប្រព័ន្ធផ្សព្វផ្សាយសង្គម កាលពីចុងសប្តាហ៍មុននេះ ។
នារីរងការយាយីដែលពាក់អាវយឺតខ្មៅ និងខោកីឡីខ្លីពណ៌ខ្មៅ គឺអ្នករត់ម្នាក់ក្នុងចំណោមអ្នករត់ជាច្រើនទៀត ដែលបានចូលរួមក្នុងព្រឹត្តិការណ៍រត់ប្រណាំងនេះកាលពីថ្ងៃអង្គារ នៅលើដងផ្លូវឆ្លងកាត់ភូមិ Mlangi ក្នុងតំបន់ Sleman នៃទីក្រុង Jogja ។ ទោះយ៉ាងណា នាងហាក់ជាគោលដៅតែម្នាក់ ដែលបានអូសទាញកំហឹងអ្នកស្រុកនៅទីនោះតែម្តង ដោយម្នាក់ក្នុងចំណោមពួកគេ សូម្បីទាញដំបងវែងមួយ និងគំរាមកំហែងធ្វើឲ្យនាងឈឺចាប់ទៀតផង ។
ព្រឹទ្ធបុរសនៃមហាវិទ្យាល័យសុខាភិបាល UNISA លោក Ruhiyana បាននិយាយថា៖ «ប្រហែលចាស់ទុំអភិរក្សក្នុងតំបន់ចង់ក្រើនរំលឹកដល់អ្នករត់នេះថា សម្លៀកបំពាក់សិចស៊ីដែលនាងស្លៀក គឺពុំសមរម្យទេ ។ ប៉ុន្តែ ទង្វើវាយដំមកលើនាង គឺក៏ពុំសមរម្យនោះដែរ» ។
លោក Ruhiyana និយាយថា បន្ទាប់ពីហេតុការណ៍នេះ ស្ត្រីរងការយាយី និងអ្នករត់ដទៃជាច្រើនទៀត បានសម្រេចចិត្តដកខ្លួនចេញពីការប្រណាំងនេះ ដើម្បីចៀសវាងពីការប្រឈមមុខបន្ថែមទៀត ខណៈបុរសចំណស់ម្នាក់ ត្រូវបានចោទប្រកាន់ថាបានវាយនារីអ្នករត់នោះ ទៅលើសម្លៀកបំពាក់របស់នាង ៕ ចន្ទី
