ក្រចេះ៖រហូតមកដល់ពេលនេះគិតត្រឹមម៉ោង១០នឹង៣០នាទី ថ្ងៃទី៨ ខែឧសភា ឆ្នាំ២០១៨នេះ ករណីពុលនៅខេត្តក្រចេះ មានអ្នកជំងឺដែលសម្រាកព្យាបាល បានធូរស្រាល ត្រូវបានអនុញ្ញាតឲ្យត្រឡប់ទៅលំនៅដ្ឋានវិញ ចំនួន ១២៣នាក់ ស្រី៤៩នាក់ និងកុមារ៥៨នាក់ ខណៈអ្នកស្លាប់កើនដល់១៣និងអ្នករងរបួសកើនឡើងជិត៣០០នាក់។
បើតាមរបាយការណ៍របស់មន្ទីរសុខាភិបាលខេត្តក្រចេះ នៅព្រឹកថ្ងៃទី៨ខែឧសភាឆ្នាំ២០១៨ ស្តីពីករណីពុលនៅឃុំកន្ទួត ស្រុកចិត្របុរី ខេត្តក្រចេះ។ លោកឈ្មាង សុវុត្ថា ប្រធានមន្ទីរសុខាភិបាលខេត្តក្រចេះ បានឲ្យដឹងថា ជាលទ្ធផលគិតត្រឹមម៉ោង៩ព្រឹកថ្ងៃទី៨ខែឧសភានេះ គឺមានជនរងគ្រោះសរុបចំនួន២៩៣នាក់ ស្រី១៧១នាក់ ក្នុងនោះចូលសម្រាកពេទ្យសរុបចំនួន២៣៧នាក់ ស្រី ១១៨នាក់ ។ យោងតាមការសិក្សារបស់ក្រុមជំនាញក្រសួងសុខាភិបាល និងអង្គការសុខភាពពិភពលោក និងមន្ទីរសុខាភិបាលខេត្តបានរកឃើញថាអ្នកជំងឺដែលមានរោគសញ្ញាទាក់ទងនិងការពុលចំនួន៥៨នាក់ ស្រី៣៥នាក់។ ស្លាប់ចំនួន១៣នាក់ ស្រី៨នាក់ ៕ ដោយ៖បញ្ញាស័ក្តិ