ភ្នំពេញ៖ ភោជនីយដ្ឋានមួយកន្លែងយីហោ ស៊ែរ អ៊ី ប៉ាន់យ៉ាប នៅចំណុចផ្ទះលេខ១៦E0 ផ្លូវលេខ១៣០ សង្កាត់ផ្សារកណ្តាលទី១ ខណ្ឌដូនពេញ នៅវេលាម៉ោង ៩៖៣០នាទី ព្រឹកថ្ងៃទី៨ ខែឧសភា ឆ្នាំ២០១៨ ត្រូវបានអគ្គិភ័យឆាបឆេះ បណ្តាលឲ្យមនុស្ស៤នាក់រងរបួសធ្ងន់ ហើយក៏ត្រូវបានគេដឹកទៅសង្គ្រោះនៅមន្ទីរពេទ្យភ្លាមដែរ ហើយ មូលហេតុត្រូវគេអះអាងថាផ្ទុះធុងហ្គាស់ ។
ភ្លាមៗនោះ កម្លាំងគណៈបញ្ជាការឯកភាពខណ្ឌ សហការជាមួយ ក្រុមអន្តរាគមន៍រថយន្តពន្លត់អគ្គិភ័យ បានចុះដល់កន្លែងកើតហេតុ ដើម្បីជួយពន្លត់ភ្លាមៗដែរ ដោយបាញ់ទឹកឲ្យរលត់ទៅវិញ នៅវេលាម៉ោង ១០ព្រឹកនាថ្ងៃដដែល ។
ហេតុការណ៍នេះ បណ្តាលឲ្យមានមនុស្សរងគ្រោះចំនួន៤នាក់ ក្នុងនោះស្រី១នាក់ (ជនបរទេសចំនួន២នាក់ ខ្មែរ២នាក់) និងបណ្តាលឲ្យខូចខាតទ្រព្យសម្បត្តិ ក្នុងភោជនីយដ្ឋាន មួយចំនួន និង ប្រើប្រាស់រថយន្តពន្លត់អគ្គិភ័យចំនួន៦ គ្រឿងផងដែរ ៕ ដោយ៖បញ្ញាស័ក្តិ
