ខេត្តមណ្ឌលគិរី ៖ អភិបាលខេត្តមណ្ឌលគិរី បានអំពាវនាវដល់ក្រុមហ៊ុននានា ឲ្យងាកមកវិនិយោគលើសិប្បកម្មកិនថ្ម ព្រោះថា បច្ចុប្បន្ននេះខេត្តមណ្ឌលគិរី ពុំមានក្រុមហ៊ុន ឬសិប្បកម្មកិនថ្ម ដើម្បីបំរើឱ្យការអភិវឌ្ឍន៍ខេត្ត និងសំណង់បានគ្រប់គ្រាន់នោះទេ។
ការលើកឡើង របស់ ឯកឧត្តម ស្វាយ សំអ៊ាង អភិបាលខេត្តមណ្ឌលគិរី បែបនេះ គឺនៅក្នុងកិច្ចប្រជុំសាមញ្ញលើកទី៤៨ របស់ក្រុមប្រឹក្សាខេត្ត កាលពីថ្ងៃចន្ទ ៨រោច ខែពិសាខ ឆ្នាំច សំរឹទ្ធិស័ក ព.ស ២៥៦២ ត្រូវនឹងថ្ងៃទី៧ ខែឧសភា ឆ្នាំ២០១៨។
ឯកឧត្តម អភិបាលខេត្ត បានបន្ថែមថា នៅក្នុងខេត្តមណ្ឌលគិរី គឺមានការខ្វះខាតថ្មគ្រប់ប្រភេទ សម្រាបគម្រោងអភិវឌ្ឍន៍ខេត្ត និងតម្រូវការ របស់ពលរដ្ឋ ដោយបច្ចុប្បន្នរាល់គំរោងវិនិយោគ និងសាងសង់សំណង់នានា គឺត្រូវទិញថ្មពីបណ្តាខេត្តនានា យកមកប្រើប្រាស់ ដែលធ្វើឲ្យមានការលំបាកក្នុងការដឹកជញ្ជូន ជាពិសេសពលរដ្ឋ ដែលត្រូវការទិញថ្ម ក្នុងចំនួនតិចតួចយកមកប្រើ តែត្រូវចំណាយលើការដឹកជញ្ជូនឆ្ងាយ និងថ្លៃឈ្នួលច្រើន។
ឯកឧត្តម ស្វាយ សំអ៊ាង អភិបាល នៃគណៈអភិបាលខេត្តមណ្ឌលគិរី បានណែនាំថា មន្ទីរអង្គភាពជំនាញត្រូវពិភាក្សាគ្នា ធ្វើយ៉ាងណារិះរកដៃគូវិនិយោគបង្កើតឲ្យមានសិប្បកម្មកិនថ្មឡើង ក្នុងពេលឆាប់ៗខាងមុខនេះ ដើម្បីផ្ដល់ភាពងាយស្រួល និងឆ្លើយតបតាមតម្រូវការរបស់ពលរដ្ឋ និងក្រុមហ៊ុនសំណង់ផ្សេងៗ ដែលចាំបាច់ត្រូវប្រើថ្មមកសាងសង់រាល់សំណង់អ្វីមួយនោះ។
លោក ម៉ៅ ធនារក្ស ប្រធានមន្ទីរសាធារណៈការ និងដឹកជញ្ជូនខេត្ត បានលើកឡើងថា កន្លងមកមន្ទីរ ក៏បានដាក់ពាក្យស្នើសុំអាជ្ញាប័ណ្ណអាជីវកម្មកិនថ្ម ទៅក្រសួងរ៉ែ និងថាមពល តាមរយៈ មន្ទីររ៉ែ និងថាមពលខេត្តដែរ ប៉ុន្តែពុំទាន់មានការឆ្លើយតបនោះទេ។
ពាក់ព័ន្ធនឹងបញ្ហានេះដែរ មន្ត្រី មន្ទីររ៉ែ និងថាមពលខេត្ត បានបំភ្លឺថា មន្ទីរបានយកពាក្យស្នើសុំអាជ្ញាប័ណ្ណអាជីវកម្មកិនថ្ម របស់មន្ទីរសាធារណៈការ និងដឹកជញ្ជូនខេត្ត បញ្ចូនទៅក្រសួងរ៉ែ និងថាមពលរួចរាល់ហើយ រង់ចាំតែចេញសេចក្តីសម្រេចពីក្រសួងតែប៉ុណ្ណោះ។
លោក សុក សេរ៉ា នាយករងរដ្ឋបាលសាលាខេត្ត បានបញ្ជាក់ថា កន្លងមករាល់ដំណើរការលើគម្រោងអភិវឌ្ឍន៍ខេត្ត និងមន្ទីរជំនាញ ដូចជាការស្ថាបនា ផ្លូវ ស្ពាន លូ រួមទាំងសំណង់ផ្សេងៗរបស់ប្រជាពលរដ្ឋក្នុងខេត្ត គឺត្រូវទិញថ្មគ្រប់ប្រភេទ ពីខេត្តក្រចេះ និងខេត្តស្ទឹងត្រែង ដើម្បីយកមកប្រើប្រាស់។
លោកបន្ថែមថា បច្ចុប្បន្ននៅខេតមណ្ឌលគិរី មានក្រុមហ៊ុនមួយកំពុងស្នើសុំអាជ្ញាប័ណ្ឌ និងការអនុញ្ញាត បើកការដ្ឋានកិនថ្មនេះហើយ ប៉ុន្តែពុំទាន់បានដំណើរការនោះទេ៕ ដោយ៖ សមុទ្រឈើ