មុននេះមិនយូរប៉ុន្មាន ក្មេងស្រីវ័យ ១៦ឆ្នាំម្នាក់ នៅឥណ្ឌា កំពុងស្ថិតនៅក្នុងផ្ទះម្នាក់ឯងស្រាប់តែមានបុរសមុខមាត់ចម្លែកចូលមកក្នុងផ្ទះចាប់យកចូលទៅក្នុងព្រៃ រួចប្តូរវេនគ្នារំលោភយ៉ាងព្រៃផ្សៃ។
សំណាងល្អដែលនៅមានជីវិតនាងលូនត្រឡប់មកផ្ទះវិញ ហើយយករឿងនេះទៅរាយការណ៍ប្រាប់ដល់ប្រធានភូមិ ។ មិនយូរប៉ុន្មានក្រោយមកពួកចាប់ជំរិត និងរំលោភលើក្មេងស្រី ត្រូវបានចាប់ខ្លួន ហើយក្រុមប្រឹក្សាភូមិវិញ បែរជាវិនិច្ឆ័យទោសតាមទំនើងចិត្ត ហើយពិន័យប្រាក់ ៥០.០០០រូបពី ។
ប៉ុន្តែសុបិន្តដ៏អាក្រក់របស់ក្មេងស្រីម្នាក់នេះ នៅពុំទាន់ចប់ឡើយ ពួកជនចាប់ជំរិត និងរំលោភនាងយ៉ាងព្រៃផ្សៃនោះ សម្រុកចូលក្នុងផ្ទះរបស់ក្មេងស្រី ហើយធ្វើការសងសឹងដ៏សាហាវ រកអ្វីប្រៀបផ្ទឹមគ្មាន ។ បន្ទាប់ពីវាយដំឪពុកម្តាយ របស់ក្មេងស្រីឲ្យដេកនៅក្នុងថ្លុកឈាម ពួកវាបានចាប់ចងក្មេងស្រីមក “សងសឹង” ដោយយកសាំងចាក់ រួចដុតសម្លាប់ទាំងរស់ ។ រួចរាល់ហើយពួកវានាំគ្នាចាកចេញទៅ ។ រំលឹកដល់រឿងនេះ លោក Ashok Ram ដែលជានាយប៉ូលិសប្រចាំតំបន់ឲ្យដឹងថា ប្រព័ន្ធតុលាការ នៅឥណ្ឌាទាមទារអ្នកប្តឹងត្រូវបង់ប្រាក់កម្រៃ ហេតុនេះពលរដ្ឋជាទូទៅតែងនាំគ្នារត់ទៅពឹងពាក់ក្រុមព្រឹទ្ធាចារ្យប្រចាំភូមិខ្លួនរស់នៅដើម្បីដោះស្រាយ ទោះបីគេដឹងថា វិធីនេះពុំស្របច្បាប់ក៏ដោយចុះ ។
រឿងរ៉ាវបានធ្វើឲ្យកក្រើករញ្ជួយព្រោះសន្ទុះកំហឹងរបស់សាធារណៈមតិ ភ្លាមៗនោះជនសង្ស័យពាក់ព័ន្ធ ១៤នាក់ ត្រូវបានចាប់ខ្លួន ។
អាស្រ័យដោយសោកនាដកម្មដ៏អណោចអធ័មរាប់ពុំអស់ ទើបថ្មីៗនេះ ច្បាប់នៅឥណ្ឌាបានកែប្រែជាក់ស្តែងគឺ ៖ ការចាប់រំលោភក្មេងអាយុក្រោម ១២ឆ្នាំ ជនល្មើសនឹងត្រូវកាត់ទោសប្រហារជីវិត ការចាប់រំលោភក្មេងក្រោម ១៦ឆ្នាំ ត្រូវជាប់គុកអស់មួយជីវិត ហើយចំពោះក្មេងអាយុ ១៦ឆ្នាំឡើង ជនល្មើសត្រូវជាប់ពន្ធនាគារ ២០ឆ្នាំ ៕