បាត់ដំបង៖ គិតពីឆ្នាំ១៩៩២ រហូតមកដល់ខែមីនា ឆ្នាំ២០១៨ ស៊ីម៉ាក់បានសម្រេចលទ្ធផលដោយបានរុករក និងកម្ទេចចោលគ្រាប់មីនប្រឆាំងមនុស្សជាង៥១៧.០២៧គ្រាប់ មីនប្រឆាំងរថក្រោះជាង១០.៦៤៨គ្រាប់ គ្រាប់យុទ្ធភណ្ឌមិនទាន់ផ្ទុះគ្រប់ប្រភេទបានចំនួន២.៣០២.៥៦០គ្រាប់ សរុបរួមទាំងអស់ទាំងគ្រាប់មីន និងយុទ្ធភណ្ឌមិនទាន់ផ្ទុះ គឺ២.៦៩៩.០៩២គ្រាប់ ក្នុងនោះបានធ្វើការបោសសម្អាតផ្ទៃមានមីន បានចំនួនជាង៩៤៣គីឡូម៉ែត្រក្រឡា។
នៅព្រឹកថ្ងៃ៨ ខែឧសភា ឆ្នាំ២០១៨នេះនៅទីបញ្ជាការដ្ឋានស៊ីម៉ាក់ ខេត្តបាត់ដំបង បានប្រារព្ធពិធីផ្ទេរ-ប្រគល់គ្រឿងចក្រ និងសម្ភារៈបោសសម្អាតមីន ដល់មជ្ឈមណ្ឌលសកម្មភាពកម្ចាត់មីនកម្ពុជា (CMAC) សម្ភារៈបច្ចេកទេសបោសសម្អាតមីន រួមមាន៖ គ្រឿងចក្រកម្ទេចមីនធុនធ្ងន់ចំនួន៥គ្រឿង គ្រឿងបន្លាស់គ្រឿងចក្រ និងតង់ជម្រកស្នាក់នៅអ្នកដោះមីនចំនួន៣៨តង់ សរុបទឹកប្រាក់មានចំនួន ៤៦៤.៣០០.០០០យ៉េន ឬជិត៥លានដុល្លារអាមេរិក ក្រោមអធិបតីភាព លោកបណ្ឌិត ហ៊ុន ម៉ាណែត និងលោក ហូរិនូឈិ ហិដេហិសា (H.E Mr. Horinouchi Hidehisa) ឯកអគ្គរាជទូតជប៉ុន ប្រចាំព្រះរាជាណាចក្រកម្ពុជា ។
លោក ហូរិនូឈិ ហិដេហិសា បានថ្លែងថា ការបោសសម្អាតមីន ពិតជាមានសារសំខាន់ ក្នុងការថែរក្សាសុវត្ថិភាពរបស់ប្រជាជន និងកសិករដែលរស់នៅ និងធ្វើការនៅជុំវិញចំការមីន ដែលអាចនាំឲ្យមានការរីកចម្រើន សេដ្ឋកិច្ចតាមរយៈការអភិវឌ្ឍជនបទ ហើយរដ្ឋាភិបាលជប៉ុនគាំទ្រយ៉ាងសកម្មក្នុងសកម្មភាពកម្ចាត់មីននៅកម្ពុជាតាំងពីឆ្នាំ១៩៩៨ ជាមួយនឹងជំនួយរបស់រដ្ឋាភិបាលជប៉ុន CMAC បាននិងកំពុងជំរុញសកម្មភាពបោសសំអាតមីន យ៉ាងសកម្ម។
លោកឯកអគ្គរដ្ឋទូតបានសង្ឃឹមយ៉ាងមុតមាំថា គ្រឿងចក្រនឹងសម្ភារៈបោសសំអាតមីន ដែលបានប្រគល់ទាំងនេះនឹងជួយឲ្យ CMAC អាចធ្វើសកម្មភាពបោសសំអាតមីនកាន់តែមានសុវត្ថិភាព និងប្រសិទ្ធភាពជាងមុនទៀត។
លោក ហេង រតនា អគ្គនាយកមជ្ឈមណ្ឌលសកម្មភាពកម្ចាត់មីនកម្ពុជា បានថ្លែងអំណរគុណចំពោះការគាំទ្ររបស់រដ្ឋាភិបាល និងប្រជាជនជប៉ុន ក្នុងការផ្តល់ជំនួយដល់សកម្មភាពបោសសម្អាតមីននៅកម្ពុជា។ លោកបញ្ជាក់ថា ស៊ីម៉ាក់តែងតែទទួលបានការគាំទ្រយ៉ាងពេញទំហឹងពីរដ្ឋាភិបាលជប៉ុន ក្នុងការផ្តល់សម្ភារៈបច្ចេកទេស ដើម្បីឱ្យស៊ីម៉ាក់សំរេចផែនការបានជោគជ័យ ជាពិសេសគ្រឿងចក្រកម្ទេចមីនធុនធ្ងន់ បានជួយពន្លឿនល្បឿន និងប្រសិទ្ធភាពនៃកិច្ចប្រតិបត្តិការថែមទៀត៕ ដោយ៖បញ្ញាស័ក្តិ