ភ្នំពេញ ៖ ស្ពានបាឡេថ្មី ឆ្លងកាត់ទន្លេសាបពីចំណុចឃ្លាំងស្តុកប្រេងសូគីម៉ិច ផ្លូវជាតិលេខ៥ ក្នុងខណ្ឌឫស្សីកែវ ឆ្ពោះមកកាន់តំបន់អភិវឌ្ឍន៍ទីក្រុងរណបជ្រោយចង្វារ ខណ្ឌជ្រោយចង្វារ បានបើកសម្ពោធដាក់ឲ្យចរាចរណ៍ជាផ្លូវការ នារសៀលថ្ងៃទី៨ ខែឧសភា ឆ្នាំ២០១៨ នេះហើយ ក្រោយពីបាន ដំណើរការសាងសង់អស់រយៈពេល៦ខែ កន្លងមកនេះ ។
ពិធីនេះធ្វើឡើងក្រោមអធិបតីភាពលោក ឃួង ស្រេង អភិបាលរាជធានីភ្នំពេញ អាជ្ញាធរដែនដីនិងមន្ត្រីរដ្ឋបាលរាជធានីភ្នំពេញជាច្រើនរូបទៀត។
លោក ឃួង ស្រេងបានបញ្ជាក់អោយដឹងថា ស្ពានបាឡេថ្មី ឆ្លងកាត់ទន្លេសាបនេះ ក្រោយសម្ពោធដាក់អោយប្រើប្រាស់រួចក្រុមហ៊ុននឹងប្រគល់អោយរដ្ឋបាលរាជធានីភ្នំពេញធ្វើការគ្រប់គ្រង់បន្ត ហើយក្នុងអំឡុងនៃការគ្រប់គ្រងនេះ លោកបានបញ្ជាក់យ៉ាងច្បាស់ថា រដ្ឋបាលរាជធានីនឹងទុកអោយប្រជាពលរដ្ឋបានធ្វើដំណើរឆ្លងកាត់រហូតទ្រុឌទ្រោម ពោលគឺមិនកំណត់នៃការបរិច្ឆេតនៃការប្រើប្រាស់នោះទេ ។ ដែលនេះជាចំណងដៃថ្មីមួយទៀតរបស់សម្តេចតេជោ ហ៊ុន សែន ជូនប្រជាពលរដ្ឋ។
មន្ត្រីនៃមន្ទីរសាធារណការ និងដឹកជញ្ជូនរាជធានីភ្នំពេញ បានបញ្ជាក់ថា ស្ពានបាឡេឆ្លងកាត់ទន្លេសាប បានបញ្ចប់ការសាងសង់កាលពីថ្ងៃទី០៥ ខែឧសភា និងបានសាកល្បងធ្វើតេស្តទ្រទម្ងន់នៃស្ពាន ដើម្បីធានាសុវត្ថិភាពនៃការធ្វើចរាចរណ៍ ការដំឡើងស្លាកសញ្ញាចរាចរណ៍ ការលាបគំនូសចរាចរណ៍ និងដំឡើងភ្លើងស្តុបថ្មី ដែលឈានទៅដាក់ឲ្យដំណើរការធ្វើចរាចរណ៍នៅថ្ងៃ០៨ ឧសភានេះ ។ចំពោះការធ្វើដំណើរការឆ្លងកាត់ រថយន្តទម្ងន់លើសពី១៥តោន និងមានកម្ពស់លើស ២.៨ម៉ែត្រ មិនអនុញ្ញាតឲ្យឆ្លងកាត់ឡើយ។
លោកពង់ ឃាងសែអគ្គនាយកក្រុមហ៊ុន OCIC បានបញ្ជាក់ប្រាប់ឲ្យដឹងថា ស្ពានបាឡេថ្មីនេះមានទទឹង ១២ម៉ែត្រ និងបណ្ដោយ ៥០០ម៉ែត្រ ដោយចំណាយថវិកាសាងសង់ចំនួន ៩លានដុល្លារ ប្រើពេលសាងសង់រយៈពេល៦ខែនិង១១ថ្ងៃដោយធ្វើការស្ថាបនាទាំងយប់ទាំងថ្ងៃ ។
អ្នកឧកញ៉ា ពង់ ឃាងសែ បានបញ្ជាក់ថា ស្ពានបេតុងដែលគ្រោងស្ថាបនា នៅអមជាមួយស្ពានបាឡេនេះ មានប្រវែង៩២២ម៉ែត្រ ទទឹង២០,៥ម៉ែត្រ។ ចិញ្ចើមស្ពានសម្រាប់ថ្មើរជើង មានទទឹង១,២៥ម៉ែត្រសងខាង, កំពស់សរសរស្ពានសំរាបព្យួរខ្សែកាប ធៀបនឹងកំរាលស្ពាន៣៤ម៉ែត្រ សរសរសំរាប់ព្យួរខ្សែកាប មានសរសរចំនួន៤, គន្លងខ្សែយានយន្តទទឹង៣.៧៥ម៉ែត្រ, គន្លងធ្វើចរាចរ២ខ្សែទៅ២ខ្សែមក, កំពស់នាវាចរក្រោមស្ពានអតិបរមា នៅរដូវវស្សា១០,៥ម៉ែត្រ, កំពស់នាវាចរក្រោមស្ពានអប្បរមា នៅរដូវប្រាំង២០.៥ម៉ែត្រ បំពាក់បង្គោលភ្លើងបំភ្លឺ និងដាក់ស្លាកសញ្ញាចរាចរ ដោយចំណាយថវិកាចំនួន៣៥លានដុល្លារ ដែលជាថវិកាបានមកពីការវិនិយោគដីតំបន់អភិវឌ្ឍន៍ជ្រោយចង្វា។
ស្ពាននេះ មានតួនាទីសំខាន់ក្នុងការរួមចំណែករំដោះចរាចរលើផ្លូវជាតិលេខ៦ និងផ្លូវជាតិលេខ៥ ក៏ដូចជាច្រកចេញចូលរាជធានីភ្នំពេញ និងជាសមិទ្ធផលថ្មីមួយទៀត ជាចំណងដៃសម្រាប់រាជធានីភ្នំពេញ និងប្រជាពលរដ្ឋដែលបានឆ្លងកាត់ស្ពាន ក៏ដូចបង្កើនសរសៃឈាមសេដ្ឋកិច្ច តភ្ជាប់ពីបណ្តាខេត្ត មករាជធានីភ្នំពេញ និងពីរាជធានីភ្នំពេញ ទៅតាមបណ្តាខេត្តផងដែរ ក្រោមអនុសាសន៍របស់សម្តេចតេជោ ហ៊ុន សែន៕ ដោយ ៖ បញ្ញាស័ក្តិ