សកម្មភាពបុរសម្នាក់ដែលស្រវឹងធ្លាក់ភ្នែក ហើយបើកបរម៉ូតូតែម្នាក់ឯង រ៉េពេញតែផ្លូវជាតិ ស្ថិតក្នុងតំបន់ជនបទស្រុកស្រែ បានធ្វើឲ្យអ្នកទស្សនាស្រៀវសាច់ជំនួសជាខ្លាំង ព្រោះតែបារម្ភខ្លាចគាត់ជិះចូលរថយន្តគេ ។
វីដេអូ៣នាទីជាង ដែលត្រូវបានថតដោយអ្នកដំណើរតាមរថយន្ត១គ្រឿង ត្រូវបានដឹងថា បានកើតឡើងស្ថិតនៅលើផ្លូវជាតិលេខ៦៤ ជិតដល់ខេត្តព្រះវិហារ ។ វីដេអូបានបង្ហាញបុរសម្នាក់បើកបរក្នុងស្ថានភាពស្រវឹងខ្លាំង ដោយបានជិះម៉ូតូរ៉េពេញផ្លូវ ក្នុងចម្ងាយច្រើនគីឡូដី ទម្រាំដល់កន្លែង «ចុះចត» របស់គាត់នៅក្នុងព្រៃនៃចិញ្ចើមផ្លូវ ។ ប៉ុន្តែ សំណាងណាស់ ដែលផ្លូវជាតិនោះមានរថយន្តបើកបរឆ្លងកាត់មួយៗ និងពុំសូវជាលឿនទេ ពុំសោតនឹងមិនដឹងថាជាយ៉ាងម៉េចយ៉ាងម៉ា ។
តាមរយៈវីដេអូនេះផងដែរ ក៏មានមតិរិះគន់ទៅលើអ្នកបើកឡានថតពីក្រោយ ហេតុអ្វីមិនព្រមចុចស៊ីផ្លេ ដើម្បីពញ្ញាក់ស្ថារតីបុរសរូបនោះ ឬ ឃាត់គាត់កុំឲ្យបន្តធ្វើចរាចរណ៍លើដងផ្លូវទៀត បែរជានាំគ្នាបើកឡានតាមថតសើចស្បាយទៅវិញ ។ ព្រោះថា សកម្មភាពបើកបរម៉ូតូក្នុងស្ថានភាពបែបនេះរបស់បុរសនោះ នឹងពុំត្រឹមតែប្រឈមនឹងគ្រោះថ្នាក់ខ្លួនឯងគាត់ប៉ុណ្ណោះទេ និងក៏អាចបង្កគ្រោះថ្នាក់ដល់អ្នកដទៃទៀតផង ៕ ចន្ទី
