កណ្តាល៖ ប្រធានសាខា និងប្រធានទីផ្សាររបស់ធនាគារសហពាណិជ្ជទាំង២នាក់ កំពុងឃាត់ខ្លួនស្នងការនគរបាលខេត្តកណ្តាល ដើម្បីរៀបចំនីតិវិធី បញ្ជូនទៅតុលាការពាក់ព័ន្ធករណីសមគំនិតឆបោកប្រាក់ពលរដ្ឋ ដាក់ប្រាក់វិនិយោគជាមួយក្រុមហ៊ុន EBC ដែលសន្យាឲ្យការប្រាក់ច្រើន។
ការឃាត់ខ្លួនមនុស្ស២នាក់ជាប្រធានសាខា និងប្រធានទីផ្សារធនាគារសហពាណិជ្ជ ស្រុកខ្សាច់កណ្តាល ខេត្តកណ្តាល ដោយកម្លាំងនគរបាលខេត្តកណ្តាល នៅម៉ោង១០ ព្រឹកថ្ងៃទី០១ ខែវិច្ឆិកា ឆ្នាំ២០១៧នេះ ដោយបានអនុវត្តន៍ដីកាបញ្ជាឲ្យចូលខ្លួន របស់អយ្យការអមសាលាដំបូងខេត្តកណ្តាល ។
ប្រធានសាខា និងប្រធានទីផ្សារទាំង២នាក់នោះមានឈ្មោះ៖ ឈ្មោះ គៀត វុធី ភេទប្រុស សញ្ជាតិខ្មែរ ជាប្រធានសាខាធនាគារ និងឈ្មោះ អេង ផុន ភេទប្រុស ជាប្រធានផ្នែកទីផ្សារ ត្រូវអយ្យការអមសាលាដំបូងខេត្តកណ្តាល បញ្ជាឲ្យចូលខ្លួនមុនថ្ងៃទី៣០ ខែតុលា ឆ្នាំ២០១៧ ពាក់ព័ន្ធករណី៖ សមគំនិតក្នុងអំពើឆបោក ប៉ុន្តែពួកគេមិនបានចូលបំភ្លឺតាមការកំណត់ឡើយ ក៏ត្រូវសមត្ថកិច្ចអនុវត្តដីកាឃាត់ខ្លួន នៅព្រឹកថ្ងៃទី១ ខែវិច្ឆិកានេះតែម្តង។
បើតាមសមត្ថកិច្ចបានឲ្យដឹងថា អ្នកទាំងពីរនេះ ពាក់ព័ន្ធនឹងករណីសមគំនិតក្នុងអំពើឆបោក ដោយឃុបឃិតជាមួយនឹងក្រុមហ៊ុនវិនិយោគ EBC ក្នុងការផ្តល់ប្រាក់កម្ចីចំនួន៥ម៉ឺនដុល្លារ ក្នុងអ្នកខ្ចីម្នាក់ៗដូចៗគ្នាទាំងអស់ទោះវត្ថុធានាតូចក្តី ឬធំក្តី ដោយមិននបានសិក្សាពីប្រាក់ចំណូលរបស់អ្នកខ្ចី ថាអាចមានលទ្ធភាពបង់ប្រាក់សងវិញឬយ៉ាងណាឡើយ។ មុននឹងផ្តល់ប្រាក់កម្ចីមន្ត្រីធនាគារបានប្រាក់ថា ការផ្តល់ប្រាក់កម្ចីនេះ អាចយកទៅវិនិយោគបានជាមួយក្រុមហ៊ុនវិនិយោគ EBC តែប៉ុណ្ណោះ ដែលខ្ចីយកទៅរកស៉ីផ្សេង គឺមិនបានទទួលប្រាក់កម្ចីពីធនាគារឡើយ៕ ដោយ៖ជាលី
