មេដឹកនាំកូរ៉េខាងជើងលោកគីម ជុងអ៊ុនបានទៅធ្វើទស្សនកិច្ចជាលើកទី២ រយៈពេល ២ថ្ងៃនៅក្នុងប្រទេសចិន។ ទស្សនកិច្ចលើកទី២ ក្នុងថ្ងៃចន្ទ និងថ្ងៃអង្គារ ទី៨ ឧសភាបានធ្វើឡើងនៅតាលានដែលជាទីក្រុងកំពង់ផែស្ថិតប៉ែកភាគឦសានប្រទេសចិន។ CCTV បានបង្ហាញឲ្យឃើញនូវរូបលោកគីម ជុងអ៊ុន និងរូបលោកស៊ី ជីនពីងដែលកំពុងដើរទន្ទឹមគ្នានៅក្នុងឧទ្យានមួយក្បែរមាត់សមុទ្រ និងបានអង្គុយជជែកគ្នាជុំវិញតុមួយ។
« ក្រោយពីជំនួបលើកទី១ ជាមួយសមមិត្តលោកគីម ជុងអ៊ុន ទំនាក់ទំនងរវាងចិន និងសាធារណរដ្ឋប្រជាមានិតប្រជាធិបតេយ្យកូរ៉េខាងជើងបានស្គាល់ភាពវិជ្ជមាន រួមទាំងស្ថានភាពនៅឧបទ្វីបកូរ៉េ។ ខ្ញុំសប្បាយចិត្តខ្លាំងណាស់ »-លោកស៊ី ជីនពីងសាទរ។ កាសែតស៊ីនហួរក៏បានស្រង់ចម្លើយរបស់លោកគីម ជុងអ៊ុនចំពោះលោកស៊ី ជីនពិងវិញយ៉ាងដូច្នេះថា « មានលទ្ធផលវិជ្ជមានជាច្រើននៅក្នុងជំនួបជាប្រវត្តិសាស្ត្ររវាងខ្ញុំ និងសមមិត្តអគ្គលេខាធិការស៊ី ជីនពីង »។
យ៉ាងណាក៏ដោយ ទស្សនកិច្ចលើកទី២ ក្នុងរយៈពេលតែ ១ខែកន្លះរបស់លោកគីម ជុងអ៊ុនក្នុងទឹកដីចិនពេលនេះជាផ្នែកមួយនៃកិច្ចខិតខំប្រឹងប្រែងរវាងចិន និងកូរ៉េខាងជើងដើម្បីបង្កើនភាពស្និទ្ធស្នាលរវាងគ្នា។ ភាពស្និទ្ធស្នាលដែលបានធ្លាក់ចុះដោយសារតែក្រុងប៉េកាំងបានគាំទ្រទណ្ឌកម្មអន្តរជាតិដាក់លើក្រុងព្យុងយ៉ាងក្នុងសំណុំរឿងនុយក្លេអ៊ែរ។ ទន្ទឹមគ្នានេះ ចិនក៏មិនចង់ស្ថិតនៅក្រៅសៃវៀននៃភាពល្អូកល្អឺនរវាងកូរ៉េខាងជើងជាមួយប្រទេសផ្សេង ពិសេសគម្រោងជំនួបជាប្រវត្តិសាស្ត្ររបស់លោកគីម ជុងអ៊ុន និងលោកប្រធានាធិបតីអាមេរិកដូណាល់ ត្រាំនាពេលខាងមុខដែរ៕ សូយន