ក្រចេះ៖ ករណីផ្ទុះជំងឺបណ្តាលឲ្យមានមនុស្សស្លាប់ និងរបួសយ៉ាងច្រើននាក់នោះ នៅថ្ងៃទី៨ ខែឧសភា ឆ្នាំ២០១៨នេះ អាជ្ញាធរស្រុកចិត្របុរី និងក្រុមការងារក្រសួងឧស្សាហកម្ម និងសិប្បកម្ម សហការជាមួយកងរាជអាវុធហត្ថខេត្ត នគរបាលព្រហ្មទណ្ឌ ដឹកនាំដោយលោក ប៉ែន លីណាត អភិបាលរងខេត្តក្រចេះ ចុះទៅពិនិត្យទីតាំងផលិតស្រាស នៅក្នុងភូមិកើតហេតុ ហើយបានសម្រេចបិទទីតាំងបិតស្រាសមួយចំនួន។
ក្រុមការងារចម្រុះ បានចុះទៅពិនិត្យផ្ទះប្រជាពលរដ្ឋឈ្មោះ ឆី ទ្រី ហៅថេង ទ្រី នៅភូមិស្រែនន ដោយបានធ្វើកិច្ចសន្យា បញ្ឈប់ការបិតស្រាសជាបណ្ដោះអាសន្ន និងបានប្រមូលយកសំណាកគំរូស្រាស ចំនួន២កាន ស្មើនឹង៦០លីត្រ ដើម្បីយកទៅពិសោធន៍។ ក្រុមការងារដដែល ក៏ចុះទៅពិនិត្យនៅផ្ទះប្រជាពលរដ្ឋមួយទៀត ឈ្មោះ ខុន ចាន់ធី ដោយម្ចាស់ផ្ទះមិននៅ ព្រោះមានជំងឺដោយសារពុលសារធាតុគីមីនេះដែរ និងបានទៅសម្រាកព្យាបាលនៅមន្ទីរពេទ្យ ដោយមានសមាជិកភូមិជួយដឹងឮ ហើយបានប្រមូលយកស្រាស ចំនួន៧កាន ស្មើនឹង២១០លីត្រ ដើម្បីពិសោធន៍ និងបានឲ្យសមាជិកភូមិ ជួយហាមឃាត់កុំឲ្យម្ចាស់ផ្ទះ ផ្អាកការបិតស្រាសជាបណ្ដោះអាសន្នសិន មុននឹងក្រសួងឧស្សាហកម្ម ចេញលទ្ធផលនៃការធ្វើពិសោធន៍៕ ដោយ៖បញ្ញាស័ក្តិ