កណ្តាល ៖ យ៉ាងហោចណាស់មានមនុស្សចំនួន៣នាក់ បានរងរបួសស្រាល ដោយសាររថយន្តបែនដឹកដីមួយគ្រឿង ធ្លាក់ក្រឡាប់ដោយខ្លួនឯង ដោយសារតែបើកគេចក្មេងរត់ឆ្លងផ្លូវ បណ្តាលឲ្យឆេះខូចខាតទាំងស្រុង។ ហេតុការណ៍គ្រោះថ្នាក់ខាងលើកើតឡើងនៅរសៀលថ្ងៃទី៨ ខែឧសភា ឆ្នាំ២០១៨ នៅចំណុចផ្លូវជាតិលេខ៥ ចន្លោះគីឡូម៉ែត្រលេខ២៦-២៧ ភូមិពញាឮ ឃុំពញាឮ ស្រុកពញាឮ ខេត្តកណ្ដាល។
មន្ត្រីនគរបាលមូលដ្ឋានស្រុកពញាឮ បានឲ្យដឹងថា មានរថយន្តម៉ាក NISSAN ពណ៌ស ទ្រុងខៀវ ពាក់ស្លាកលេខ ចង្កូតស្តាំ PP-1739 បើកបរក្នុងទិសដៅពីជើងទៅត្បូង លុះមកដល់កន្លែងកើតហេតុ បានបើកគេចក្មេង ដែលកំពុងរត់ឆ្លងផ្លូវ ពីកើតមកលិច ក៏ជ្រុលចង្កូតធ្លាក់ចូលទៅក្នុងប្រឡាយខាងស្ដាំ បណ្តាលឲ្យក្រឡាប់ផ្ទុះឆេះខូចខាត ស្ទើរតែទាំងស្រុង។ ចំណែកអ្នកបើកបរថយន្ត ឈ្មោះ រី ភេទប្រុស អាយុ២១ឆ្នាំ ស្នាក់នៅភូមិព្រែកក្ដី ឃុំព្រែកតាទែន ស្រុកពញាឮ ខេត្តកណ្ដាល រងរបួសស្រាល និងអ្នករួមដំណើរ២អ្នកមិនទាន់ស្គាល់អត្តសញ្ញាណ រងរបួសស្រាល៕ ដោយ ៖ បញ្ញាស័ក្តិ