ភ្នំពេញ៖ រដ្ឋលេខាធិការក្រសួងពាណិជ្ជកម្ម លោកស្រីតឹករ៉េត កំរង បានស្នើដល់មន្ត្រីការទូតជាន់ខ្ពស់នៃប្រទេសរូម៉ានី ដែលជាសមាជិកមួយនៃសហគមន៍អឺរ៉ុប ធ្វើការគាំទ្រ និងពន្យល់ប្រមុខរបស់សហគមន៍នេះ អំពីសារសំខាន់នៃការបន្តផ្តល់ភាពអនុគ្រោះពន្ធ អ្វីៗគ្រប់យ៉ាងលើកលែងតែអាវុធ (EBA) ដល់កម្ពុជា ដើម្បីសម្រួលដល់ការធ្វើពិពិធកម្មវិស័យសេដ្ឋកិច្ច និងពាណិជ្ជកម្ម សំដៅកាត់បន្ថយភាពក្រីក្ររបស់ប្រជាជន។
លោកជំទាវរដ្ឋលេខាធិការ បានលើកសំណើនេះឡើង នៅក្នុងជំនួបពិភាក្សាជាមួយ លោកជំទាវ ម៉ូនីកា ហ្គេអូហ្គីតា (Monica Gheorghitta) អនុរដ្ឋមន្ត្រីការបរទេសនៃប្រទេសរូម៉ានី និងគណៈប្រតិភូ ដែលរៀបចំឡើងនៅទីស្តីការក្រសួងពាណិជ្ជកម្ម កាលពីព្រឹកថ្ងៃចន្ទ ទី៧ ខែឧសភា ឆ្នាំ២០១៨ ក្នុងគោលបំណងពង្រឹងកិច្ចសហប្រតិបត្តិការសេដ្ឋកិច្ច និងពាណិជ្ជកម្មទ្វេភាគីរវាងកម្ពុជា និងរូម៉ានី។
នៅក្នុងឱកាសនោះ លោកស្រី តឹករ៉េត កំរង បានជម្រាប អំពីសមិទ្ធផលសំខាន់ៗលើវិស័យសេដ្ឋកិច្ច និងពាណិជ្ជកម្ម នៅក្រោមការដឹកនាំដ៏ត្រឹមត្រូវរបស់រាជរដ្ឋាភិបាលកម្ពុជា។ លោកស្រីរដ្ឋលេខាធិការ ក៏បានថ្លែងអំណរគុណដល់លោកស្រី ម៉ូនីកា ហ្គេអូហ្គីតា ដែលបានអញ្ជើញមកស្វែងយល់អំពីស្ថានភាពពិតរបស់ប្រទេសកម្ពុជា និងបានចាត់ទុកបេសកកម្មនេះ ជាវឌ្ឍនភាពថ្មីមួយទៀតនៃការរឹតចំណងកិច្ចសហប្រតិបត្តិការរវាងកម្ពុជា និងរូម៉ានី លើវិស័យអទិភាពផ្សេងៗ រួមទាំងពាណិជ្ជកម្ម។
ជាការឆ្លើយតប លោកស្រី ម៉ូនីកា ហ្គេអូហ្គីតា បានថ្លែងអំណរគុណដល់លោកស្រីរដ្ឋលេខាធិការ ដែលបានចែករំលែកនូវព័ត៌មានស្តីពីសមិទ្ធផល និងវឌ្ឍនភាពសំខាន់ៗរបស់កម្ពុជា ហើយលោកស្រី ក៏បានយល់ស្រប និងបានកោតសរសើរចំពោះស្ថានភាពរីកចម្រើនរបស់កម្ពុជា ជាពិសេសការរក្សាបាននូវកំណើនសេដ្ឋកិច្ចរឹងមាំ ដែលជាបច្ច័យដ៏សំខាន់ ក្នុងការកាត់បន្ថយភាពក្រីក្រ និងការកសាងប្រទេសឡើងវិញ។
ទន្ទឹមគ្នានេះ លោកស្រីអនុរដ្ឋមន្ត្រីការបរទេសរូម៉ានី ក៏បានគាំទ្រការដឹកនាំរបស់រាជរដ្ឋាភិបាលកម្ពុជា និងបានជ្រាបកាន់តែច្បាស់អំពីស្ថានភាពរីកចម្រើនពិតរបស់កម្ពុជា ហើយលោកស្រីនឹងជម្រាបជូនប្រទេសជាសមាជិកអឺរ៉ុប និងប្រមុខនៃសហគមន៍អឺរ៉ុប ដើម្បីគាំទ្រការផ្តល់ភាពអនុគ្រោះពន្ធ EBA ដល់កម្ពុជាបន្តទៀត សំដៅរួមចំណែកជំរុញកំណើនសេដ្ឋកិច្ច ក៏ដូចជាការធ្វើពិពិធកម្មវិស័យការងារ និងបង្កើនប្រាក់ចំណូលជូនប្រជាជនកម្ពុជា ជាពិសេសកម្មករ-កម្មការិនី ដែលកំពុងបម្រើការងារក្នុងឧស្សាហកម្មវាយនភណ្ឌ៕ ដោយ៖បញ្ញាស័ក្តិ
