ភ្នំពេញ៖ ក្រោយហេតុកាណ៍ផ្ទុះធុងហ្គាសនៅហាងយីហោ ស៊ែរ អ៊ីប៉ាន់យ៉ាប រហូតដល់មានការបាញ់ពន្លត់ ស្រាប់តែថៅកែបានរាយការណ៍ទៅសមត្ថកិច្ចថា បាត់បុគ្គលិកស្រីម្នាក់ សង្ស័យស្លាប់នៅកន្លែងហេតុការណ៍។ ភ្លាមៗនោះសមត្ថកិច្ចបានបន្តស្រាវជ្រាវនៅកន្លែងកើតហេតុ ក៏បានប្រទះឃើញសាកសពនារីម្នាក់បានដេកស្លាប់ក្នុងបន្ទប់ឡៅតឿ។
សាកសពមានឈ្មោះ អ៊ិន ស្រីម៉ៅ ភេទស្រី អាយុ១៧ឆ្នាំ មកស្នាក់នៅជាមួយមីងនៅសង្កាត់ផ្សារកណ្តាល២ ខណ្ឌដូនពេញ។ សូមជម្រាបថា សាកសពឈ្មោះ អ៊ិន ស្រីម៉ៅ បានចូលធ្វើការនៅហាងយីហោ ស៊ែរ អ៊ីប៉ាន់យ៉ាបទើបតែបាន២ថ្ងៃប៉ុណ្ណោះ នេះបើតាមការបញ្ជាក់របស់ស្ត្រីជាម្តាយមីង។ ហេតុការណ៍ផ្ទុះធុងហ្គាសខាងលើបានកើតឡើង នៅថ្ងៃទី៨ ខែឧសភា ឆ្នាំ២០១៨វេលាវេលាម៉ោង ៩៖៣០នាទីព្រឹក ស្ថិតនៅភោជនីយដ្ឋានយីហោ ស៊ែរអ៊ី ប៉ាន់យ៉ាប នៅចំណុចផ្ទះលេខ១៦E0 ផ្លូវលេខ១៣០ សង្កាត់ផ្សារកណ្តាលទី១ ខណ្ឌដូនពេញ។
បើតាមសមត្ថកិច្ចបានឲ្យដឹងថា ក្រៅពីប្រទះឃើញ សាកសពខាងលើ ហេតុការណ៍នេះក៏បានបណ្តាលឲ្យមានមនុស្សរងរបួសចំនួន៤នាក់/ស្រី១នាក់ ជនបរទេសចំនួន២នាក់ និងបណ្តាលឲ្យខូចខាតទ្រព្យសម្បត្តិក្នុងភោជនីយដ្ឋាន មួយចំនួន និង ប្រើប្រាស់រថយន្តពន្លត់អគ្គិភ័យចំនួន៦ គ្រឿង ក្រុមអន្តរាគមន៍ឡានពន្លត់អគ្គិភ័យ ជួយពន្លត់បានភ្លាមៗដោយបាញ់ទឹកឲ្យរលត់ទៅវិញ នៅវេលាម៉ោង ១០នាថ្ងៃដដែល។
បច្ចុប្បន្នសាកសពឈ្មោះ អ៊ិន ស្រីម៉ៅ ត្រូវបានសមត្ថកិច្ច យកទៅតម្កល់នៅវត្តទួលសង្កែ ដើម្បីរង់ចាំក្រុមគ្រួសារ សពមកទទួលយកធ្វើបុណ្យតាមប្រពៃណីនៅឯស្រុកកំណើត៕ ដោយ៖បញ្ញាស័ក្តិ