ភ្នំពេញ៖ស្ពានដែកបាឡេ ដែលជាអំណោយរបស់សម្តេចតេជោ ហ៊ុន សែន នាយករដ្ឋមន្ត្រីកម្ពុជា ហើយសាលារាជធានីភ្នំពេញ ទើបតែសម្ពោធដាក់ឱ្យប្រើប្រាស់ កាលពីល្ងាចថ្ងៃទី៨ ខែឧសភានេះ ស្រាប់តែនៅវេលា ម៉ោង១០និង៣០នាទី យប់ មានជនសង្ស័យមួយក្រុមចោរមានគ្នាជិត៣០ទូក បានធ្វើសកម្មភាពលួចកាត់ដែកក្រោមស្ពាន តែត្រូវកម្លាំងសមត្ថកិច្ចឃាត់ខ្លួន ជនសង្ស័យចំនួន៤នាក់ ជាជនជាតិឥស្លាម និងទូកចំនួន៣គ្រឿង ។
ករណីដ៏គួរឱ្យហួសចិត្តបំផុតនេះ បានកើតឡើងនៅវេលា ម៉ោង១០និង៣០នាទីយប់ ថ្ងៃទី៨ ខែឧសភា ឆ្នាំ២០១៨ ក្រោយពីក្រុមសន្តិសុខដែលយាមនៅគល់ស្ពាន ប្រទះឃើញជនសង្ស័យកំពុងធ្វើសកម្មភាពហើយរាយការណ៍ទៅកម្លាំងសមត្ថកិច្ច ឱ្យជួយអន្តរាគមន៍។
ជនសង្ស័យទី១មានឈ្មោះ មោះ ម៉ូត ភេទប្រុស អាយុ៣០ឆ្នាំ ជនជាតិឥស្លាម មុខរបរនេសាទត្រី ស្នាក់នៅលើទូក។ជនសង្ស័យទី២មានឈ្មោះ ម៉ាត់ គ្រីយ៉ា ភេទប្រុស ជនជាតិឥស្លាម អាយុ៥៦ឆ្នាំ មុខរបរនេសាទត្រី ស្នាក់នៅលើទូក ស្រុកកំណើតនៅស្រុកកំពង់ត្របែក ខេត្តព្រៃវែង។ ជនសង្ស័យទី៣មានឈ្មោះ ទី ស្មាន់កោះ ភេទប្រុស អាយុ១៧ឆ្នាំ ជនជាតិឥស្លាម មុខរបរនេសាទត្រី ស្នាក់នៅលើទូក ។ និងជនសង្ស័យទី៤មានឈ្មោះ ទៀត អាតុ ភេទប្រុស ជនជាតិឥស្លាម មុខរបរនេសាទត្រី អាយុ១៧ឆ្នាំ ស្នាក់នៅសង្កាត់ជ្រោយចង្វា ខណ្ឌជ្រោយចង្វា។
បើតាមការឱ្យដឹងពីក្រុមសន្តិសុខដែលយាមនៅគល់ស្ពានបានឱ្យដឹងថា ទូកដែលមកធ្វើសកម្មភាពលួចកាត់ដែកក្រោមស្ពាន គឺមានរហូត២០ទៅ៣០ទូកឯណោះ តែសមត្ថកិច្ចឃាត់បានភ្លាមៗតែមួយទូកប៉ុណ្ណោះ និងមានដែកដែលកាត់រួចនៅក្នុងទូកមួយចំនួន ចំណែកទូកផ្សេងទៀតហើយគេចខ្លួនបាត់ ។
ក្រោយពីកើតហេតុ សមត្ថកិច្ចនៅតែបន្តតាមរកនៅតាមមាត់ច្រាំងទន្លេរហូតមកដល់មុខវត្តចាស់ ទើបឃើញទូកពីរគ្រឿង ដែលមានជនសង្ស័យបួននាក់ ដោយមានសង្ស័យទើបឃាត់សួរនាំនិងឆែកឆេរក៏ឃើញម៉ាសុីនកាត់ដែកនិងដែកមួយចំនួន ដែលជនសង្ស័យបោះទម្លាក់ចូលក្នុងទឹក នៅក្បែរនោះ រួចនាំខ្លួនជនសង្ស័យទាំងនោះយកទៅសួរ នាំនៅអធិការដ្ឋាននគរបាលខណ្ឌជ្រោយចង្វា ដើម្បីចាត់តាមនីតិវិធីច្បាប់៕ ដោយ៖បញ្ញាស័ក្តិ