ខេត្តមណ្ឌលគីរី ៖ ប្រជាសហគមន៍រ៉ែមាសចុងផ្លាស់ បានជួបជុំគ្នាមុខសាលាឃុំចុងផ្លាស់ កាលពីល្ងាចថ្ងៃទី៨ ខែឧសភា ២០១៨ ដើម្បីស្នើសុំការអន្តរាគមន៍ពីប្រមុខរាជរដ្ឋាភិបាល និងថ្នាក់ដឹកនាំក្រសួងរ៉ែ និងថាមពល សុំការអនុញ្ញាតច្បាប់ធ្វើរ៉ែមាសលក្ខណៈគ្រួសារលើសពីជម្រៅ ២០ម៉ែត្រ ក្រោយពួកគាត់ប្រឈមការបាត់បង់ប្រាក់ចំណូលចិញ្ចឹមជីវិតគ្រួសារប្រចាំថ្ងៃ។
លោក លឹម គុន មេឃុំចុងផ្លាស់ បានឲ្យដឹងថា មូលដ្ឋាននេះ មានប្រជាពលរដ្ឋរស់នៅក្នុងភូមិពូទុង ឃុំចុងផ្លាស់ ស្រុកកែវសីមា មានចំនួនជិត ២០០០គ្រួសារ ដែលពឹងអាស្រ័យលើអាជីវកម្មជីករ៉ែមាសតាមបែបប្រពៃណីតាំងពីយូរលង់ណាស់មកហើយ។
លោកបន្តថា តំបន់ដែលពួកគាត់រស់នៅរាល់ថ្ងៃនេះ គឺជាប្រភេទដីថ្មភ្នំសុទ្ឋ គ្មានទឹក គ្មានជីវជាតិ មិនអាចបង្កបង្កើនផលបាននោះទេ ពោលគឺអាចរស់រានបានដោយជីករ៉ែ នឹងរបរលក់ដូរប៉ុណ្តោះ។
អ្នកភូមិ បាននិយាយថា ការជួបជុំគ្នានេះ មិនមានចេតនាណាមួយបង្កការលំបាកដល់អាជ្ញាធរនោះទេ ពោលគឺគាត់សុំត្រឹមការអនុញ្ញាតពីក្រសួងរ៉ែ និងថាមពល ឲ្យជួយបង្កភាពងាយស្រួលសម្រាប់ពួកគាត់ អាចប្រកបរបរជីករ៉ែ តាមបែបគ្រួសារ ដោយមិនមានការកំណត់ជម្រៅត្រឹម ២០ម៉ែត្រ ដូចសព្វថ្ងៃនោះទេ។ ព្រោះក្នុងជម្រៅនេះ ត្រូវបានគេជីកអស់រយៈពេល ២០ ទៅ ៣០ឆ្នាំមកហើយៗ បើនៅតែកំណត់ ២០ម៉ែត្រទៀត គាត់មិនអាចជីកបានផលឡើយ។
ក្រុមអ្នកភូមិ ដែលមានទាំងចាស់ក្មេងប្រុសស្រី បានទទូចស្នើរសុំដល់ សម្តេចតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា មេត្តាជួយពិនិត្យលទ្ធភាពដល់ប្រជាពលរដ្ឋ ដែលជាកូនជាចៅ របស់សម្តេច ដើម្បីអាចប្រកបរបររកស៊ីចិញ្ចឹមជីវិត ដោយរលូន ព្រោះបើនៅតែមានបម្រាមទៀតនោះ អ្នកភូមិទាំងនេះនឹងជួបការខ្វះខាតក្នុងជីវភាពជាខ្លាំង។អ្នកភូមិ ដដែលបានលើកឡើងថា «ទីកន្លែងនេះជាតំបន់ដែលពួកខ្ញុំរស់នៅ និងប្រកបមុខរបរធ្វើរ៉ែមាស តាមបែបបុរាណលក្ខណៈគ្រួសារតាំងពីឆ្នាំ១៩៨៨មកម្លេះ រហូតដល់ឆ្នាំ២០១៥ ទើបក្រសួងរ៉ែ និងថាមពល ផ្តល់សិទ្ធិស្របច្បាប់លើការធ្វើអាជីវកម្មរ៉ែមាស(ទ្រង់ទ្រាយតូច)ដល់សហគមន៍សិប្បកររ៉ែចុងផ្លាស់ របស់យើងខ្ញុំ ដោយកំណត់ជម្រៅមិនឲ្យលើសពី ២០ម៉ែត្រ។ប៉ុន្តែរយៈពេលពីរឆ្នាំជាងមកនេះ ក្រោយពីពួកយើងខ្ញុំ បានអនុវត្តន៍តាមការកំណត់ជម្រៅមិនឲ្យលើសពី ២០ម៉ែត្រ គឺពុំទទួលបានទិន្នផលរ៉ែនោះទេ»។ «ម្យ៉ាងវិញទៀតពួកយើងខ្ញុំជាប្រជាពលរដ្ឋរស់នៅតំបន់នេះ គឺពឹងផ្អែកទាំងស្រុងលើមុខរបរធ្វើអាជីវកម្មរ៉ែមាស ជាចម្បងសម្រាប់ដោះស្រាយជីវភាពប្រចាំថ្ងៃ ព្រោះថា ដីតំបន់នោះជាតំបន់មិនអាចធ្វើកសិកម្មបានទេ ជាងនេះក៏ ដើម្បីឲ្យមានថវិកាចំណូល ចូលជាតិ និងចំណូលសម្រាប់ពលរដ្ឋក្នុងខេត្តផង»។
កាលពីល្ងាចថ្ងៃទី៨ ខែឧសភា ឆ្នាំ២០១៨ តំណាងប្រជាពលរដ្ឋបានលើកឡើងក្នុងកិច្ចប្រជុំមួយរវាងអាជ្ញាធរខេត្ត និងសហគមន៍រ៉ែមាសថា «សូមអាជ្ញាធរជួយពិនិត្យនឹងដោះស្រាយលើករណីក្រុមហ៊ុនចិន ដែលកំពុងធ្វើកម្មភាពជីកខួងរណ្តៅរ៉ែមាស ចូលក្នុងតំបន់ដីប្រជាពលរដ្ឋ កាន់កាប់រហូតមានជម្រៅលើសពី ១០០ម៉ែត្រ ឲ្យបញ្ឈប់សកម្មភាពជីកនោះ ព្រោះបានធ្វើឲ្យប៉ះពាល់ដល់ការរស់នៅ និងកន្លែងជីករ៉ែ របស់ប្រជាពលរដ្ឋក្នុងភូមិ»។
តំណាងដដែល បាបន្តថា «ដីរបស់ក្រុមហ៊ុនចិន មានរហូតដល់ទៅជាង ១ ០០០ហិចតារ សម្រាប់ជីករករ៉ែមាស តែពួកគាត់នៅតែទន្ទ្រានចូលក្នុងដីសហគមន៍ ដែលមានមិនដល់ ៥០ហិចតារផងនោះ តើឲ្យអ្នកភូមិដែលមានចំនួនរាប់ពាន់នាក់រស់នៅ និងប្រកបរបរចិញ្ចឹមជីវិតដោយរបៀបណា»?
មិនត្រឹមតែប៉ុណ្ណោះប្រជាសហគមន៍ បានសុំឲ្យអាជ្ញាធរជួយចាត់វិធានការលើក្រុមហ៊ុនចិន ដែលបានរំលោភលើអណ្តូង របស់សហគមន៍ចំនួន ៤ទីតាំង កាលពីឆ្នាំ២០១៧រហូតមក ឲ្យបញ្ឈប់ការជីករុករកទៀត។ ជាងនេះ ក៏ស្នើឲ្យរដ្ខបាលខេត្ត ជួយពន្លឿនការចេញអាជ្ញាប័ណ្ណថ្មីដល់សហគមនន៍រ៉ែមាសចុងផ្លាស់។
ឆ្លើយតបជាមួយអ្នកភូមិ គេសង្កេតឃើញថា អាជ្ញាធរខេត្ត ដែលដឹកនាំដោយ លោក សុក សេរ៉ា នាយរងសាលាខេត្តមណ្ឌលគិរី បានត្រឹមសន្យាថា នឹងនាំយកសំណើរ របស់ប្រជាពលរដ្ឋ ដាក់ជូនទៅថ្នាក់ដឹកនាំជាអ្នកសម្រេច ព្រោះអាជ្ញាធរគ្មានលទ្ធភាពសម្រេចលើការអនុញ្ញាតច្បាប់ ជូនប្រជាពលរដ្ឋបាន ឬមិនបាននោះទេ។ ប៉ុន្តែអ្វីៗគឺត្រូវរង់ចាំមើលការចម្រេចចិត្តរបស់ក្រសួង និងថ្នាក់ដឹកនាំរដ្ឋាភិបាលជាមុនសិន។
យ៉ាងនេះក្តី លោក តែ គីមសាន្ត តំណាងឲ្យសហគមន៍រ៉ែ រំពឹងទុកថា ប្រមុខរាជរដ្ឋាភិបាលកម្ពុជា ដែលមាន សម្តេចតេជោ ហ៊ុន សែន ជានាយករដ្ឋមន្ត្រី នឹងមិនទុកឲ្យប្រជាពលរដ្ឋ របស់សម្តេច រស់នៅដោយពិបាកក្នុងការប្រកបរបរចិញ្ចឹមជីវិតឡើយ។ ក្នុងនាមលោកតំណាងឲ្យប្រជាពលរដ្ឋ រស់នៅក្នុងសហគមន៍ បានផ្ញើក្តីសង្ឈឹមនឹងជោគវាសនាទាំងស្រុង របស់ប្រជាជនឃុំចុងផ្លាស់ លើឯកឧត្តម ស៊ុយ សែម រដ្ឋមន្ត្រីក្រសួងរ៉ែ និងថាមពល ជាពិសេស សម្តេចនាយករដ្ឋមន្ត្រី ហ៊ុន សែន លើការអនុញ្ញាឲ្យប្រជាជនក្នុងមូលដ្ឋានអាចជីករករ៉ែមាស ឲ្យបានទូលំទូលាយជាបន្តទៅទៀតនៅថ្ងៃខាងមុខ៕ ដោយ៖ សមុទ្រឈើ
