ភ្នំពេញ ៖ ព្រឹកនៅថ្ងៃទី៩ ខែឧសភា ឆ្នាំ២០១៨ ក្រសួងប្រៃសណីយ៍ និងទូរគមនាគមន៍ បានដាក់ឲ្យដំណើរការជាផ្លូវការ ប្រព័ន្ធអ៊ីនធើណិតសាធារណៈ (Public Wifi) ដែលអាចឲ្យប្រជាពលរដ្ឋទូទៅអាចប្រើប្រាស់ដោយឥតគិតថ្លៃ នៅសួនច្បារសម្ដេច ហ៊ុន សែន និងសួនច្បារមុខព្រះបរមរាជវាំង ក្រោមអធិបតីភាពលោករដ្ឋមន្ត្រី ត្រាំ អ៊ីវតឹក រដ្ឋមន្ត្រីក្រសួងប្រៃសណីយ៍ និងទូរគមនាគមន៍។
លោក សុខ ពុទ្ធិវុធ អនុរដ្ឋលេខាធិការក្រសួងប្រៃសណីយ៍ និងទូរគមនាគមន៍ បានថ្លែងថា បងប្អូនប្រជាពលរដ្ឋអាចប្រើប្រាស់ សេវាអ៊ីនធើណិត Public Wi-Fi ដោយឥតគិតថ្លៃ ដោយគ្រាន់តែជ្រើសរើសយក TC Free Wi-Fi នៅតាមបណ្តោយសួនច្បារវិមានឯករាជ្យ ដល់ស្ពានឆ្លងទៅកោះពេជ្រ និងសួនច្បារមុខព្រះបរមរាជវាំង ក្នុងរាជធានីភ្នំពេញ។
Public Wi-Fi ជាអ៊ីនធើណិតល្បឿនលឿន និងបច្ចេកវិជ្ជាទំនើប ក្រោមកិច្ចសហប្រតិបត្តិការ ជាមួយសាជីវកម្ម ទូរគមនាគមន៍កូរ៉េ (Korea Telecom) នៃសាធារណរដ្ឋកូរ៉េ និងក្រសួងប្រៃណីយ៍ និងទូរគមនាគមន៍ នៃកម្ពុជា។
លោកបានបន្តថា គម្រោង Public Wifi និង Digital Conectivity for School ត្រូវដំឡើងនៅទីតាំងចំនួន៥រួមមាន៖
ទី១៖ សួនច្បារសម្ដេច ហ៊ុន សែន ទី២៖ សួនច្បារមុខព្រះបរមរាជវាំង រាជធានីភ្នំពេញ ទី៣៖ វិទ្យាល័យ ហ៊ុន សែន កំពង់លែង ស្រុកកំពង់លែង ខេត្តកំពង់ឆ្នាំង ទី៤៖ វិទ្យាល័យ ហ៊ុន សែន ទួលខ្ពស់ ស្រុកទឹកផុស ខេត្តកំពង់ឆ្នាំង និងទី៥៖ នៅវិទ្យាល័យអ៊ីវ៉ាស្រង់ ស្រុកគងពិសី ខេត្តកំពង់ស្ពឺ៕ ដោយ៖បញ្ញាស័ក្តិ
