រដ្ឋមន្ត្រីការបរទេសអាមេរិច Mike Pompeo បានទៅដល់ទីក្រុងព្យុងយ៉ាង ប្រទេសកូរ៉េខាងជើងនៅថ្ងៃពុធនេះហើយ ដើម្បីបន្តរៀបចំកិច្ចប្រជុំកំពូលរវាងប្រធានាធិបតីអាមេរិច ដូណល់ ត្រាំ និងមេដឹកនាំកូរ៉េខាងជើង គីម ជុងអ៊ុន ដែលនឹងកើតឡើងក្នុងពេលខាងមុខនេះ។ នេះបើតាមការចេញផ្សាយរបស់ CNN។
មន្ត្រីរដ្ឋាភិបាលកូរ៉េខាងត្បូងម្នាក់បានថ្លែងប្រាប់អ្នកសារព៌តមាននៅក្នុងទីក្រុងតូក្យូ ប្រទេសជប៉ុនដូច្នេះថា គាត់រំពឹងថា លោក Mike Pompeo នឹងចាក់ចេញពីទីក្រុងព្យុងយ៉ាងជាមួយនឹងអ្នកទោសអាមេរិច ៣អ្នកដែលត្រូវបានឃុំខ្លួននៅក្នុងប្រទេសកូរ៉េខាងជើងអស់ជាច្រើនខែមកហើយ។
មន្ត្រីដដែលបានថ្លែងបន្តថា ការបរិច្ឆេត និងទីតាំងនៃជំនួបកំពូលរវាង ត្រាំ និងគីម ទំនងជានឹងត្រូវគេប្រកាសឲ្យដឹងបន្ទាប់ពីដំណើរទស្សនៈកិច្ចរបស់រដ្ឋមន្ត្រីការបរទេសអាមេរិច។
ចំនែកលោក ដូណាល់ ត្រាំវិញ បានថ្លែងនៅសេតវិមានអាមេរិចនៅថ្ងៃអង្គារម្សិលមិញថា “ទីកន្លែងនៃកិច្ចប្រជុំបានជ្រើសរើសរួចរាល់ហើយ ពេលវេលា និងការបរិច្ឆេត និងអ្វីៗផ្សេងទៀងគឺបានកំណត់រួចរាល់ ហើយពួកយើងទន្ទឹងរងចាំជោគជ័យដ៏អស្ចារ្យ។”
នៅពេលគេសួរថា តើលោក Mike Pompeo អាចនឹងត្រឡប់មកវិញជាមួយនឹងអ្នកទោសអាមេរិច៣នាក់ឬយ៉ាងណា? លោក ត្រាំហាក់ឆ្លើយស្ទាក់ស្ទើរ ដោយបញ្ជាក់ថា “ពួកយើងនឹងដឹងឆាប់ៗនេះ ហើយវាពិតជាល្អណាស់ បើពួកគេត្រឡប់មកវិញមែន”។
លោក Mike Pompeo ក៏បាននិយាយនៅក្នុងបណ្តាលទំនាក់ទំនងសង្គមរបស់លោកដូច្នេះថា លោកបានត្រឡប់ទៅកាន់ប្រទេសកូរ៉េខាងជើងតាមការអញ្ជើញរបស់មេដឹកនាំកូរ៉េខាងជើង។
ថ្លែងទៅកាន់អ្នកសារព៌តមានដែលបានធ្វើដំណើរទៅកូរ៉េខាងជើងជាមួយគ្នា លោក Mike Pompeo និយាយដូច្នេះថា គាត់នឹងលើកយកបញ្ហាអ្នកទោសអាមេរិចំនួន ៣នាក់ កំឡុងដំណើរទស្សនៈកិច្ចរបស់លោក ហើយលោកសង្ឃឹមថា កូរ៉េខាងជើងនឹងធ្វើរឿងត្រឹមត្រូវ ៕ សុភ័ក្ត្រ