តាមរយៈសារ Tweeter នៅថ្ងៃពុធទី៩ឧសភាម្សិលមិញ បានជូនដំណឹងអំពីការដោះលែងអ្នកទោសអាមេរិកទាំង៣រូបដែលកូរ៉េខាងជើង បានចាប់និងដាក់ឃុំឃាំងនៅក្នុងពន្ធនាគារ ។ ឥឡូវនេះពួកគេ កំពុងធ្វើដំណើរត្រឡប់មកកាន់មាតុភូមិអាមេរិកវិញ។
ពលរដ្ឋអាមេរិកទាំង ៣ រូបដែល ទើបបានកូរ៉េខាងជើង ដោះលែងអោយមានសេរីភាពវិញ។
ប្រធានាធិបតីអាមេរិក លោក Donald Trump បានលើកបញ្ជាក់ ពីទឹកចិត្តដ៏សប្បាយរីករាយរបស់លោកនៅក្នុងការជូនដំណឹង អំពីការវិលត្រឡប់មកពីកូរ៉េខាងជើងវិញ របស់ លោក Mike Pompeo រដ្ឋមន្ត្រីការបរទេសអាមេរិក ដែលកំពុងស្ថិតក្នុងយន្តហោះ ឆ្ពោះមកកាន់ទឹកដីអាមេរិកវិញ ដោយបាននាំមកជាមួយនូវពលរដ្ឋអាមេរិកទាំង ៣ រូបដែលកូរ៉េខាងជើង ទើបបានដោះលែងអោយមានសេរីភាពវិញ បន្ទាប់ពីបានជាប់ក្នុងពន្ធនាគារកូរ៉េខាងជើងជាយូរឆ្នាំរួចមក។
លោក Donald Trump ក៏បានគូសបញ្ជាក់ទៀត ថា”ជនជាតិអាមេរិកទាំង៣រូបនោះ ទំនងជាមានសុខភាពល្អ ដោយបានលើក សរសើរផងដែរ ចំពោះ”ប្រមុខការទូតអាមេរិក ដែលបានធ្វើការជួបប្រាស្រ័យដ៏ល្អប្រសើរ ជាមួយនឹងប្រមុខដឹកនាំកូរ៉េខាងជើងលោក គឺម ជុងអ៊ុន ។ លើសពីនេះ ប្រធានាធិបតីអាមេរិក ក៏បានថ្លែងសង្កត់ពាក្យទៀតថា “កាលបរិចេ្ឆទនិងទីកន្លែងជួបប្រាស្រ័យគ្នារវាងរូបលោកនឹងប្រមុខដឹកនាំកូរ៉េខាងជើង ក៏ត្រូវបានកំណត់រួចរាល់អស់ហើយដែរ។
គួររំលឹកថា អាមេរិក បានទាមទារជាយូរមកហើយ ឲ្យកូរ៉េខាងជើងធ្វើការដោះលែងពលរដ្ឋអាមេរិកទាំង៣នាក់នោះដែលមានដើមកំណើតកូរ៉េខាងត្បូង ។ ម្នាក់ដែលជាគ្រូគង្វាលគ្រឹះស្តសាសនានិងក៏ជាអ្នកជំនួញដែរនោះ ឈ្មោះ លោក kim Dong-Chul មានអាយុជាង៦០ឆ្នាំ ត្រូវបានរបបព្យុងយ៉ាង ផ្តន្ទាទោសនៅខែមេសាឆ្នាំ ២០១៦ ដាក់ពន្ធនាគារចំនួន ១០ឆ្នាំ ដោយបង្ខំអោយធ្វើពលកម្ម បន្ទាប់ពីការចាប់ខ្លួន ក្នុងបទចោទប្រកាន់ ធ្វើវទ្ធង្សនានិងចារកិច្ចប្រឆាំងកូរ៉េខាងជើងរួចមក។លោក Kim Hak-Song ដែលធ្វើការនៅសាកលវិទ្យាល័យវិទ្យាសាស្ត្រនិងបច្ចេកវិទ្យា( USTP) នៅទីក្រុងព្យុងយ៉ាង ត្រូវបានរបបព្យុងយ៉ាង ចាប់ខ្លួននៅខែឧសភា ២០១៧ នៅឯចំណតរថភ្លើងទីក្រុងព្យុងយ៉ាង ក្រោមបទចោទប្រកាន់ ថាបានប្រព្រឹត្តសកម្មភាពប្រទូស្តរាយប្រឆាំងរដ្ឋាភិបាលកូរ៉េខាងជើង។ចំណែកឯលោក Kim Sang-Duk វិញ ដែលបំរើការនៅសាកលវិទ្យាល័យ( USTP) ដែរនោះ ត្រូវបានអាជ្ញាធរកូរ៉េខាងជើងចាប់ខ្លួននៅខែមេសាឆ្នាំ ២០១៧ នៅព្រលានយន្តហោះធំនៅទីក្រុងព្យុងយ៉ាង ខណៈពេលដែលគាត់បម្រុងនឹងចាកចេញពីកូរ៉េខាងជើង ក្រោយពី បាន បង្រៀន អស់រយៈពេលជាច្រើនសប្តាហ៍កន្លងមក៕ សូយន