ខេត្តព្រៃវែង ៖ កូនប្រុសបង្កើតរបស់លោកឧត្ដមសេនីយ៍ត្រី ឌឹម យ៉ារ៉ុប ស្នងការរងខេត្តព្រៃវែង ថ្លើមធំប្រើអំណាចឪពុក ចាប់បង្ខាំងនារីម្នាក់ទុករំលោភ រួចលក់ឲ្យបុរសផ្សេង ដែលករណីនេះអាចឈានដល់អូសកឪពុកទម្លាក់សក្តិ ហើយដែលរឿងនេះកើតនៅខេត្តព្រៃវែង?
រឿងជាក់ស្ដែងវាអញ្ចេះទេគឺនារីរងគ្រោះម្នាក់បានទៅដាក់ពាក្យប្ដឹងនៅអធិការរដ្ឋាននគរបាលស្រុកកំពង់ត្របែកខេត្តព្រៃវែង កាលពីថ្ងៃទី០៩ខែឧសភាឆ្នាំ២០១៨ដោយបានប្ដឹងចោទប្រកាន់មកលើ បុរសជា នគរបាលខេត្តព្រៃវែងម្នាក់ឈ្មោះ ឌឹម មករា ឋានន្តរស័ក្ដិអនុសេនីយ៍ទោ និងជាកូនប្រុសបង្កើតរបស់លោក ឧត្ដមសេនីយ៍ត្រី ឌឹម យ៉ារ៉ុប ស្នងការរងខេត្តព្រៃវែង។
ក្នុងនោះ ស្ដ្រីរងគ្រោះមានស្រុកកំណើតនៅស្រុកកំពង់ត្របែក! រីឯជនរងបណ្ដឹងក៍នៅស្រុកកំពង់ត្របែកដូចគ្នា។ ជាមួយគ្នានោះនារីរងគ្រោះបានប្ដឹងចោទប្រកាន់ថា ឈ្មោះ ឌឹម មករា ខាងលើ បានចាប់រំលោភនាង និងបង្ខាំងនាងទុកសម្រាប់រំលោភអស់រយៈពេលជាង៤ខែ។ មិនតែប៉ុណ្ណោះជននេះរៀបគម្រោងលក់នាងឲ្យទៅប្រុសផ្សេង និងគំរាមបាញ់សំលាប់នាងទាំងពូជទៀតផង។
ពាក់ព័ន្ធករណីខាងលើលោក ឧត្ដមសេនីយ៍ទោ ស្រេង ជា ស្នងការខេត្តព្រៃវែង បានឲ្យដឹងនៅល្ងាចថ្ងៃទី៩ខែឧសភា នេះថា ចំពោះបណ្ដឹងមួយនេះ នារីរងគ្រោះទើបនឹងមកដាក់ពាក្យប្ដឹងនៅអធិការស្រុកកំពង់ត្របែក កាលពីម៉ោង១០ព្រឹកទី៩ខែឧសភា នេះទេ។លោកបន្តថា៖លោកបានបញ្ជាឲ្យកំលាំងនគរបាល ស្រុកនិងខេត្ត ចុះស្រាវជ្រាវយ៉ាងយកចិត្តទុកដាក់ បើឃើញថា កូនលោកស្នងការរងប្រព្រឹត្តដូចការចោទប្រកាន់នោះមែន លោកនិងចាត់ការតាមច្បាប់ដោយមិនយោគយល់ឡើយ៕ ដោយ៖បញ្ញាស័ក្តិ