នៅថ្ងៃទី ៧-៨ ខែឧសភា មេដឹកនាំកូរ៉េខាងជើងគីម បានធ្វើដំណើរទស្សនកិច្ចយ៉ាងសម្ងាត់ទៅកាន់ប្រទេសចិន ។ នេះជាដំណើរទស្សនកិច្ចរបស់លោករយៈពេល ៤០ថ្ងៃទៅកាន់ចិនរបស់គាត់ ។
គីម ជុងអ៊ុន ដើរចុះពីយន្តហោះពិសេស ក្នុងដំណើរទស្សនកិច្ចពីរថ្ងៃនៅប្រទេសចិន (៧-៨ ខែឧសភា) ។
ក្រសួងការបរទសចិនបានឲ្យដឹងថា ដំណើរទស្សនកិច្ចនេះអាស្រ័យដោយកូរ៉េខាងជើងម្ចាស់ការផ្តួចផ្តើម ។ សមត្ថកិច្ចចិនបានដំណើរការបិទផ្លូវមួយចំនួននៅទីក្រុង Dalian ក៏ដូចជាលុបចោលជើងហោះហើរមួយចំនួនមកកាន់ព្រលានយន្តហោះនេះក្នុងអំឡុងពីរថ្ងៃ ។
យន្តហោះដឹកលោកគីមជុងអ៊ុន និងមន្ត្រីជាន់ខ្ពស់របស់កូរ៉េខាងជើងបានចេញដំណើរពីទីក្រុងព្យុងយ៉ាងទៅកាន់ទីក្រុង Dalian ភាគឦសាន្តប្រទេសចិន នៅថ្ងៃទី៧ ខែឧសភា ហើយចាកចេញទៅវិញនៅវេលាម៉ោង ៣ល្ងាចនៅថ្ងៃទី ៨ ខែឧសភា ។
ការធ្វើដំណើរតាមយន្តហោះលើកដំបូងនេះ តាមកាសែត Nikkei របស់ជប៉ុនបង្ហាញឲ្យឃើញថា នេះជារបៀបហាត់សមមួយរបស់លោក គីម ជុងអ៊ុន បំណងត្រៀមទុកការធ្វើដំណើរឆ្ងាយក្នុងជំនួបកំពូលរវាងលោកជាមួយប្រធានាធិបតីអាមេរិកដូណាល់ ត្រាំ ។
សិង្ហបុរី ដែលអាចទីតាំងនៃជំនួបកំពូលអាមេរិក-កូរ៉េខាងជើង ស្ថិតនៅចម្ងាយពីទីក្រុងព្យុងយ៉ាង ៤.៧០០គីឡូម៉ែត្រ ដូច្នេះយន្តយោះពិសេសរបស់លោក គីម ជុងអ៊ុន នឹងពុំចាំឈប់សំចតដើម្បីបំពេញប្រេងឥន្ធនៈឡើយ ។
ចំណែកតាម New York Times វិញ បានលើកឡើងថា ការដែលលោក គីម ជុងអ៊ុន បានប្រើប្រាស់យន្តហោះដើម្បីទៅកាន់ក្រុង Dilian គឺដើម្បីឲ្យទាន់ពេលវេលាជួបពិភាក្សាជាមួយប្រធានរដ្ឋចិន ស៊ី ជិនពៀន ។
គួររំលឹកថា នៅថ្ងៃទី ៩ ខែឧសភា ម្សិលមិញនេះ ប្រធានាធិបតីអាមេរិក ដូណាល់ ត្រាំ ថ្វីត្បិតបាននិយាយថា ពេលវេលា និងទីកន្លែងសម្រាប់ជំនួបកំពូលរវាងលោក និងមេដឹកនាំកូរ៉េខាងជើង គីម ជុងអ៊ុន ត្រូវបានកំណត់ហើយក្តី ប៉ុន្តែលោកពុំបានបញ្ជាក់ឲ្យបានប្រាកដថា វានៅទីណា ហើយពេលវេលាណា ៕ សូយន