នាយករដ្ឋមន្ត្រីជប៉ុន Shinzo Abe និងភរិយា ត្រូវបានមេដឹកនាំអ៊ីស្រាអ៊ែល អញ្ជើញទៅកាន់គេហដ្ឋានឯកជន ដើម្បីពិសារភោជនីអាហារបែបស្និទ្ធស្នាលកក្រោយជំនួបកំពូលថ្ងៃទី ២ ខែឧសភា ។
នាយករដ្ឋមន្ត្រីជប៉ុន Shinzo Abe (ឆ្វេង) និង នាយករដ្ឋមន្ត្រីអ៊ីស្រាអ៊ែល Israel Benjamin Netanyahu និងភរិយា (ស្តាំ) កាលពីថ្ងៃទី ២ ខែឧសភា ហើយនឹងមេចុងភៅល្បីល្បាញ Segev Moshe (កណ្តាល)។
Segev Moshe មេចុងភៅល្បីល្បាញរបស់អ៊ីស្រាអែលជាអ្នករ៉ាប់រងអាហារជប់លៀងនេះ ប៉ុន្តែពុំមាននរណាសង្ស័យចំពោះស្នាដៃរបស់មេចុងភៅ និងជាតារាទូរទស្សន៍ល្បីល្បាញរូបនេះឡើយ ។ ហេតុនេះគេពិតជាស្រឡាំងកាំង ខណៈពេលលើកបង្អែមនៃចុងពិធីជប់លៀងបានបង្កនូវទំនាស់យ៉ាងធ្ងន់ធ្ងរ រវាងប្រទេសទាំងពីរ ។
តាមនោះមេចុងភៅរូបនេះ ប្រហែលជាចង់បង្ហាញពីភាពច្នៃប្រឌិតតែមួយគ្មានពីររបស់ខ្លួន ទើបសម្រេចយកបង្អែមសូកូឡា ដាក់ទៅក្នុងស្បែកជើងធ្វើពីលោហៈ រចនាតាមម៉ូតស្បែកជើង មានពណ៌ខ្មៅរលោង ។ ពួកអ្នកការទូតទាំងសងខាងពិតជាតក់ស្លុត និងស្លេកស្លាំង មន្ត្រីការទូតជប៉ុនបានថ្លែងថា ៖ គ្មានវប្បធម៌ប្រទេសណាលើពិភពលោក ដែលយកស្បែកជើងដាក់លើតុទាំងអស់ ទង្វើបែបនេះចំពោះប្រមុខដឹកនាំជប៉ុន វាពុំខុសអ្វីប្រសិនបើជប៉ុនទទួលមេដឹកនាំអ៊ីស្រាអែលដោយយកបង្អែមសូកូឡា ដាក់ទៅក្នុងចានមួយដែលមានរូបរាងដូចសត្វជ្រូក ។
បង្អែមដែលនាំឲ្យមានជម្លោះការទូត។
ទោះបីជាមានការបកស្រាយពន្យល់យ៉ាងណាក៏ដោយ ប៉ុន្តែភាគីជប៉ុនពុំអាចទទួលយកបានដោយហេតុថា កិច្ចការទាំងនោះពុំមែនសម្រេចដោយមេចុងភៅរូបនេះទេ វាជារឿងរបស់ក្រសួងការបរទេស និងនាយកខុទ្ទកាល័យនាយរដ្ឋមន្ត្រីជាអ្នករ៉ាប់រង ៕ សូយន