ភ្នំពេញ៖ ក្រសួងទេសចរណ៍កម្ពុជា និងស្ថានទូតឥណ្ឌាប្រចាំកម្ពុជា បានរៀបចំកម្មវិធីសន្និសីទផ្សព្វផ្សាយទេសចរណ៍ឥណ្ឌា នៅកម្ពុជា Incredible India Road Show 2018 ដើម្បីជំរុញវិស័យទេសចរណ៍បន្ថែមទៀត ជាពិសេសស្នើឲ្យមានការតភ្ជាប់ជើងហោះហើរត្រង់ គឺជាគន្លឹះក្នុងការដោះស្រាយបញ្ហា នៃការធ្វើដំណើររបស់ប្រជាជន នៃប្រទេសទាំងពីរ។
សន្និសីទផ្សព្វផ្សាយទេសចរណ៍ឥណ្ឌានៅកម្ពុជា នៅល្ងាចថ្ងៃទី៩ ខែឧសភា ឆ្នាំ២០១៨ នៅសណ្ឋាគារណាហ្គាវើលមានការចូលរួមពីក្រុមហ៊ុនទេសចរណ៍មកពីឥណ្ឌាចំនួន ១៥ក្រុមហ៊ុន និងក្រុមហ៊ុនទេសចរណ៍ និងអាកាសចរណ៍កម្ពុជាចំនួន ៧៩ក្រុមហ៊ុនបានមកជួបជុំគ្នាពិភាក្សា និងចាប់ដៃគូក្នុងការធ្វើធុរកិច្ចទេសចរណ៍ជាមួយគ្នា ដើម្បីរៀបចំកញ្ចប់ទស្សនកិច្ច សម្រាប់ទេសចរទៅទស្សនាឥណ្ឌា និងទេសចរឥណ្ឌាមកទស្សនានៅកម្ពុជាឲ្យកាន់តែច្រើនបន្ថែមទៀត ក្រោមវត្តមានលោក ថោង ខុន រដ្ឋមន្ត្រីក្រសួងទេសចរណ៍ លោកស្រី Rashmi Verma រដ្ឋលេខាធិការក្រសួងទេសចរណ៍ឥណ្ឌា និងលោកស្រី Manika Jain ឯកអគ្គរដ្ឋទូតឥណ្ឌានៅកម្ពុជា។
កាលពីឆ្នាំ២០១៦ ក្រោមកិច្ចសហប្រតិបត្តិការលើវិស័យទេសចរណ៍ ប្រទេសទាំងពីរបានធ្វើការផ្លាស់ប្ដូរ និងផ្សព្វផ្សាយវប្បធម៌ជាមួយគ្នា តាមរយៈក្រសួងទេសចរណ៍ និងស្ថានទូតឥណ្ឌាប្រចាំកម្ពុជា ដោយបានរៀបចំការសម្ដែងសិល្បៈរាមាយណៈ ដោយជោគជ័យ និងបានរៀបចំព្រឹត្តិការណ៍យោហ្គា (Yoga) ជារៀងរាល់ឆ្នាំចាប់តាំងពីឆ្នាំ២០១៥ មកដល់បច្ចុប្បន្ន។ ឆ្នាំនេះព្រឹត្តិការណ៍យោហ្គា នឹងធ្វើឡើងនៅថ្ងៃទី១៦ និង១៧ ខែមិថុនា ឆ្នាំ២០១៨ នៅភ្នំពេញ ខេត្តសៀមរាប ព្រះសីហនុ និងបាត់ដំបង ។
វិស័យទេសចរណ៍ ជាមាសបៃតង ក៏មានការរីកចម្រើនគួរជាទីមោទនៈ ហើយកំពុងក្លាយជាវិស័យអាទិភាពដ៏សំខាន់មួយ ក្នុងការកសាងសេដ្ឋកិច្ចសង្គម ជាក់ស្តែងឆ្នាំ២០១៧ កន្លងទៅ កម្ពុជាទទួលបានភ្ញៀវទេសចរអន្តរជាតិសរុបចំនួន ៥,៦លាននាក់ កើនឡើង១១,៨ភាគរយ ក្នុងនោះទេសចរឥណ្ឌាមានចំនួនជិត៦ម៉ឺននាក់ កើនឡើង២៩,១ភាគរយ ដោយឡែកសម្រាប់៣ ខែដើមឆ្នាំ២០១៨ កម្ពុជាទទួលបានទេសចរអន្តរជាតិចំនួនជាង១,៧ លាននាក់ កើន១៣,៩ភាគរយ ក្នុងនោះទេសចរឥណ្ឌាមានចំនួនជាង ១ម៉ឺន ៦ពាន់នាក់ កើនឡើង១៧ភាគរយ។ ឆ្នាំ២០១៨នេះ កម្ពុជារំពឹងនឹងទទួលទេសចរឥណ្ឌា ប្រមាណ ៨ ម៉ឺននាក់។ តាមការប៉ាន់ស្មាន នៅឆ្នាំ២០២០ កម្ពុជារំពឹងថានឹងទទួលបានទេសចរអន្តរជាតិ ប្រមាណ៧លាននាក់ ហើយនៅឆ្នាំ២០២៥ ទទួលបានប្រមាណ១០លាននាក់ និងនៅឆ្នាំ២០៣០ ប្រមាណ១៥ លាននាក់ ដែលនឹងបង្កើតចំណូលជូនជាតិប្រមាណ៥ពាន់លានដុល្លារ បង្កើតការងារប្រមាណជាង១លាននាក់។
លោករដ្ឋមន្ត្រី ក៏បានបញ្ជាក់ផងដែរថា ទន្ទឹមនឹងការកើនឡើងទេសចរឥណ្ឌាមកកម្ពុជា ក្នុងនោះយើងឃើញថា ទេសចរកម្ពុជាដែលធ្វើដំណើរទៅកាន់ឥណ្ឌា ក៏មានចំនួនកើនឡើងគួរឲ្យកត់សម្គាល់ផងដែរ ដោយក្នុងនោះភាគច្រើនជាទេសចរបែបសាសនា និងសុខភាព។ ដោយឡែកទេសចរឥណ្ឌាដែលមកកម្ពុជា ភាគច្រើនជាទេសចរ MICE រួមមានទេសចរអាពាហ៍ពិពាហ៍ និងទេសចរបែបសាសនា។ ឥណ្ឌាគឺជាទីផ្សារដ៏ធំមួយសម្រាប់កម្ពុជា ក្រសួងទេសចរណ៍កម្ពុជា និងក្រុមសិល្បករ សិល្បការិនីចូលរួម សកម្មភាពផ្សព្វផ្សាយនានាជាច្រើនទៀត ដូចជា ចូលរួម Roadshow ចូលរួមពិព័រណ៍ទេសចរណ៍ និងរៀបចំទទួលទស្សនកិច្ច FAM Trip ផងដែរ។ ព្រមជាមួយនេះក្រសួងទេសចរណ៍ នឹងជំរុញទេសចរណ៍សាសនារវាងប្រទេសទាំំងពីរផងដែរ។
លោករដ្ឋមន្ត្រី បានសំណូមពរឲ្យមានការតភ្ជាប់ជើងហោះហើរត្រង់ គឺជាគន្លឹះក្នុងការដោះស្រាយបញ្ហា នៃការធ្វើដំណើរបស់ប្រជាជននៃប្រទេសទាំងពីរ។ ដូចច្នេះសូមស្នើសុំឲ្យមានការហោះហើរត្រង់ រវាងគោលដៅទាំងពីរ ឲ្យបានកាន់តែឆាប់ ព្រោះការតភ្ជាប់ក្នុងតំបន់រវាងឥណ្ឌា និងអាស៊ាន និងគោលនយោបាយឆ្ពោះ ទៅទិសខាងកើតនៃប្រទសឥណ្ឌា ដោយគំរោងផ្លូវល្បឿនលឿនពីឥណ្ឌាមកប្រទេសថៃ បាននិងចាប់ផ្តើមសាងសង់ ប៉ុន្តែកម្ពុជាមិនស្ថិតក្នុងគំរោងនេះទេ ដូចនេះដើម្បីជំរុញកំណើនលំហូរទេសចររវាងកម្ពុជា និងឥណ្ឌា ការតភ្ជាប់ជើងហោះហើរត្រង់គឺជាកត្តាគន្លឹះជាយុទ្ធសាស្ត្រ និងសូមស្នើឲ្យមានការហោះហើរត្រង់ រវាងគោលដៅទាំងពីរឲ្យបានកាន់តែឆាប់។ ក្រសួងទេសចរណ៍នឹងសហការជាមួយក្រសួង និងភាគីពាក់ព័ន្ធទាំងអស់ ពិសេសជំរុញក្រុមហ៊ុនអាកាសចរនៅកម្ពុជាចាប់ផ្តើមភ្ជាប់ការហោះហើរពីកម្ពុជាទៅឥណ្ឌា៕ ដោយ៖បញ្ញាស័ក្តិ