ភ្នំពេញ ៖ លោក ស៊ិក ប៊ុនហុក ប្រធាន គ.ជ.ប បានផ្តល់ឱកាស និងជួបសំណេះសំណាលជាថ្មីម្តងទៀតជាមួយនិស្សិត គរុសិស្ស គរុនិស្សិត សាស្ត្រចារ្យ និងយុវជន១៦០០នាក់ នៅវិទ្យាស្ថានជាតិ អប់រំ ដើម្បីស្តាប់ការចែករំលែកបទពិសោធមេរៀនជីវិតល្អៗ និងការដឹកនាំការបោះឆ្នោតឱ្យស្របតាមគន្លងច្បាប់។
លោកប្រធានគ.ជ.ប បានលើកប្រធានបទ អ្វីទៅជាបទដ្ឋានជាតិ និងអន្តរជាតិ ដែលគ.ជ.ប ត្រូវអនុវត្តសម្រាប់ការបោះឆ្នោតតាមបែបប្រជាធិបតេយ្យ? គ.ជ.ប ត្រូវគោរពរដ្ឋធម្មនុញ្ញ មិនមែនគោរពតាមគេថាទេ ហើយគ.ជ.ប ក៏គោរពបាននូវបទដ្ឋានអន្តរជាតិផងដែរ។
លោកប្រធាន បានថ្លែងថា អ្វីដែលគ.ជ.ប បាននិងកំពុងបំពេញកិច្ចការបស់ខ្លួន សម្រាប់រៀបចំការបោះឆ្នោតជាតិនាថ្ងៃទី២៩ខែកក្កដា ខាងមុខនេះ គឺមិនខុសទេ ហើយក៏គ្មាននរណា ឬប្រទេសណាមករារាំងដំណើរការតាមបែបលទ្ធិប្រជាធិបតេយ្យនេះបានដែរ។ ចំពោះការអំពាវនាវមិនឲ្យប្រជាពលរដ្ឋប្រើសិទ្ធិ ឬនិយាយមាក់ងាយគណបក្សនយោបាយក្នុងការចូលរួមការបោះឆ្នោត គឺជាការផ្ទុយនឹងបទដ្ឋានជាតិ និងអន្តរជាតិ ហើយគ.ជ.ប នឹងចាត់វិធានការច្បាប់ទាំងឡាយ ដើម្បីធានាឲ្យខាងតែបានថា ការបោះឆ្នោតជ្រើសតាំងតំណាងរាស្ត្រ នីតិកាលទី៦ ត្រូវប្រព្រឹត្តទៅដោយត្រឹមត្រូវ និងយុត្តិធម៌ ហើយទទួលបានការជឿទុកចិត្តពីប្រជាពលរដ្ឋកម្ពុជា។
លោកប្រធានគ.ជ.បបានបញ្ជាក់ថា “គ.ជ.បមិននិយាយថាខ្លួនល្អទេ ប៉ុន្តែនឹងខិតខំធ្វើឲ្យឃើញថាល្អ ពីព្រោះគ.ជ.បមិនអាចគេចផុតពីភ្នែកច្រមុះដែលបាញ់តម្រង់មកមើលការបោះឆ្នោត ហើយគ.ជ.បគ្មានបំណងអាក្រក់ រឿងអ្វី មហាជនមើលឃើញអាក្រក់កើត។ គ.ជ.ប បានបំពេញការងារប្រកបដោយជោគជ័យ ដោយគ្មាននរណាប្រកែក កាលពីការបោះឆ្នោតឃុំសង្កាត់ រឿងអីការបោះឆ្នោតជាតិខាងមុខយើងធ្វើមិនជោគជ័យនោះ”។
គណៈកម្មាធិការជាតិរៀបចំការបោះឆ្នោត (គ.ជ.ប) នៅថ្ងៃទី៩ ខែឧសភា ឆ្នាំ៣០១៨នេះ បានចេញសេចក្តីប្រកាសព័ត៌មាន ដោយពន្យល់ពីបទដ្ឋានជាតិ និងអន្តរជាតិ ដែលស្ថាប័នរបស់ខ្លួន កំពុងអនុវត្តសម្រាប់ការ បោះឆ្នោតតាមបែបប្រជាធិបតេយ្យ៕ ដោយ៖បញ្ញាស័ក្តិ
