ភ្នំពេញ៖ សមត្ថកិច្ចនគរបាលព្រហ្មទណ្ឌកម្រិតធ្ងន់រាជធានីភ្នំពេញ បានបញ្ជូនបុរសម្នាក់ ជាម្ចាស់ភាគហ៊ុនអាជីវកម្មអគ្គិសនីពត់សរបាទី ខេត្តតាកែវ ទៅកាន់សាលាដំបូងរាជធានីភ្នំពេញ ដោយជាប់ពាក់ព័ន្ធលើបណ្តឹងបទ រំលោភលើទំនុកចិត្ត នៅព្រឹកថ្ងៃទី៩ ខែឧសភា ឆ្នាំ២០១៨នេះ។
សង្ស័យរូបនេះមានឈ្មោះ សុខ ពី អាយុ៤៣ឆ្នាំ ស្នាក់នៅទីស្នាក់ភ្លើង ភូមិចំបក់ ឃុំពត់សរ ស្រុកបាទី ខេត្តតាកែវ ត្រូវបានលោក ងិន ពេជ្រ ព្រះរាជអាជ្ញារង នៃអយ្យការអមសាលាដំបូងរាជធានីភ្នំពេញ បានចេញដីកាឲ្យសមត្ថកិច្ចតាមចាប់ខ្លួន ហើយបន្ទាប់មកជននេះ ត្រូវបានកម្លាំងនគរបាល តាមចាប់ខ្លួន នៅស្រុកបាទី ខេត្តតាកែវ កាលពីថ្ងៃទី៨ ខែឧសភា ឆ្នាំ២០១៨។ ព្រះរាជអាជ្ញារង បានចេញដីកាបញ្ជាឲ្យជនសង្ស័យចូលបង្ហាញខ្លួននៅអយ្យការអមសាលាដំបូងរាជធានីភ្នំពេញ ឲ្យបានមុខថ្ងៃទី៥ខែមិថុនា ឆ្នាំ២០១៨ ដើម្បីសាកសួរលើបណ្តឹងព្រហ្មទណ្ឌ ពីបទ រំលោភលើទំនុកចិត្ត។
ជុំវិញការចាប់ខ្លួនរបស់សមត្ថកិច្ច តបតាមការប្តឹងផ្តល់ពីដើមបណ្តឹងខាងលើនេះ ត្រូវបានលោក សាន់ សឿន បងប្រុសបង្កើតជនសង្ស័យ បានប្រាប់ថា លោក និងប្អូនប្រុសមានឈ្មោះ សុខ ពី បានចាប់ដៃគូជាមួយឈ្មោះ ម៉ឺន សុខន អាយុ៥១ឆ្នាំ ជាមន្ត្រីនៅអគ្គិសនីកម្ពុជា ដើម្បីបើកអាជីវកម្ម ទិញភ្លើងពីរដ្ឋ ដើម្បីយកទៅចែកចាយលក់បន្ត ជូនប្រជាពលរដ្ឋ នៅ៤តំបន់រួមមាន៖ ទី១៖ នៅតំបន់ពត់ស ស្រុកបាទី ខេត្តតាកែវ ទី២៖ នៅតំបន់បឹងខ្សាង ស្រុកកណ្តាលស្ទឹង ខេត្តកណ្តាល ទី៣៖ នៅតំបន់ព្រែកអំពិល ស្រុកខ្សាច់កណ្តាល ខេត្តកណ្តាល និងទី៤៖ នៅតំបន់កំពង់ចម្លងបាក់ដាវ ខេត្តកណ្តាល។
ការរកស៊ីជាមួយគ្នាទាំង៣នាក់ មិនដែលមានបញ្ហានោះទេ ស្រាប់តែក្រោយមកឈ្មោះ ម៉ឺន សុខន ចង់លេបយកភាគហ៊ុនទាំងស្រុងនៅក្នុងអាជីវកម្មមួយនេះ ក៏លួចទៅធ្វើក្លែងឯកសារ ដើម្បីចង់បានអាជ្ញាប័ណ្ណទាំងមូល ព្រមទាំងដាក់ពាក្យប្តឹងទៅតុលាការ ឲ្យចាត់ការលើប្អូនប្រុសរបស់លោកតែម្តង។
ក្នុងពាក្យបណ្តឹងរបស់ឈ្មោះ ម៉ឺន សុខន បានប្តឹងចោទជនសង្ស័យថា បានលួចកឹបកេងលុយក្រុមហ៊ុនជាង១២ម៉ឺនដុល្លារ អំពីការលក់ភ្លើងអគ្គិសនីឲ្យអតិថិជន៕ ដោយ៖បញ្ញាស័ក្តិ