ខេត្តមណ្ឌលគិរី ៖ សមត្ថកិច្ចនគរបាលខេត្តមណ្ឌលគិរី បានឲ្យដឹងថា មកដល់ម៉ោង ៩ព្រឹកថ្ងៃទី១០ ខែឧសភាឆ្នាំ២០១៨នេះ មានជនរងគ្រោះដែលសង្ស័យថា ពុលទឹកបានកើតក្នុង ភូមិចំនួន២ ក្នុងឃុំស្រែឈូក ស្រុកកែវសីមា ខេត្តមណ្ឌលគិរី មានចំនួនកើនឡើងដល់ ២៧នាក់ ។
មន្រ្តីជំនាញឲ្យដឹងថា អាការៈ របស់ជនរងគ្រោះដែលសង្ស័យថាបានពុលនោះ មានដូចជាក្អួតចង្អោរ និង ចុកពោះជាដើម។ ករណីនេះ អាជ្ញាធរស្រុកកែវសីមា ខេត្តមណ្ឌលគិរី ព្រមទាំងមន្ទីរសុខាភិបាល បានចុះដល់ទីតាំងដែលអ្នកជម្ងឺ កំពុងសង្គ្រោះបន្ទាន់និងបាននាំយកទៅព្យាបាលនៅមន្ទីរពេទ្យបង្អែកស្រុកស្នួលតែមួយកន្លែងវិញ។
ក្រុមគ្រូពេទ្យនៃមន្ទីរសុខាភិបាល បានបែងចែកគ្នាជាបីក្រុម ធ្វើដំណើរទៅភូមិងាយរងគ្រោះក្នុងទឹកដី ឃុំស្រែឈូកហើយដែរ តែលទ្ធផលយ៉ាងណានៅមិនទាន់ទទួលបាន។
ក្រុមគ្រូពេទ្យនៃមន្ទីរសុខាភិបាលបានបញ្ជាក់ថា ក្រោយសាកសួរជនរងគ្រោះ ពួកគាត់ប្រាប់ស្របគ្នាថា មុនកើតហេតុគឺពួកគាត់បរិភោគទឹក។ តែទោះជាយ៉ាងណា គេនៅមិនទាន់អាចសន្និដ្ឋានថា ជាករណី ពុលទឹកនោះទេ។
ព័ត៌មានចុងក្រោយនៅព្រឹកថ្ងៃទី១០ ខែឧសភា ឆ្នាំ២០១៨នេះ ជនរងគ្រោះបានបន្តកើតឡើងនៅភូមិព្រះ និង ភូមិរណែង ក្នុងឃុំស្រែឈូក បានកើនឡើងទៀត ហើយសមត្ថកិច្ចនិង គ្រូពេទ្យក៏កំពុង បន្តជួយសង្គ្រោះ ជនរងគ្រោះបន្តទៀតផងដែរសរុបតាំងពីម៉ោង ៩ព្រឹកថ្ងៃទី៩ រហូតដល់ម៉ោង ៧ព្រឹកថ្ងៃទី ១០ ខែឧសភា ជនរងគ្រោះសរុបចំនួន ៣៤នាក់ហើយ ដែលកំពុងទទួលបានការព្យាបាលពីក្រុមគ្រូពេទ្យជំនាញ៕ ដោយ៖ សមុទ្រឈើ
