ភ្នំពេញ៖ អគ្គិភ័យបានឆាបឆេះយ៉ាងសន្ធោសន្ធៅទៅលើឃ្លាំងលក់គ្រឿងបន្លាស់រថយន្ត និងឃ្លាំងលក់រថយន្ត សរុបចំនួន៣កន្លែង នៅផ្លូវ២១៩ ភូមិ១៥ សង្កាត់ផ្សារដើមគរ ខណ្ឌទួលគោក រាជធានីភ្នំពេញ នៅវេលាម៉ោងប្រមាណជិត៤ទៀបភ្លឺថ្ងៃទី១០ ខែឧសភា ឆ្នាំ២០១៨នេះ បណ្តាលឲ្យសម្ភារៈខូចខាតរួមមានរថយន្តទំនើបៗចំនួន ៤គ្រឿង Audi, Land Cruiser, Rang Rover, Camry និងម៉ូតូចំនួន ២គ្រឿង គិតជាទឹកប្រាក់រាប់សែនដុល្លារ។
សមត្ថកិច្ចបានប្រាប់ឲ្យដឹងថា ទីតាំងដែលត្រូវបានអគ្គិភ័យឆាបឆេះនោះ មានឃ្លាំងស្តុបលក់គ្រឿងបន្លាស់រថយន្ត២ឃ្លាំង ត្រូវបានអគ្គិភ័យឆាបឆេះទាំងស្រុង ផ្ទះល្វែងចំនួន២ថ្មក្រោមឈើលើ ផ្ទះឈើចំនួន២ខ្នង និងគ្មានមនុស្សរងរបួសគ្រោះថ្នាក់ ដល់អាយុជីវិតមនុស្សទេ។ ដំបូងឡើយភ្លើងឆេះលើរបងឃ្លាំង ហើយម្ចាស់ឃ្លាំងក៏បានទាញទុយោទឹកទៅបាញ់តែបាញ់ពុំឈ្នះ ហើយភ្លើងក៏ចាប់ផ្តើមឆេះទៅដល់កេះឡាំង ដាក់គ្រឿងរថយន្ត ហើយឆេះឆ្លងដល់រថយន្តនៅក្បែរនោះបណ្តាលឲ្យឆេះយ៉ាងខ្លាំងតែម្តង។ ភ្លាមៗនោះកម្លាំងសមត្ថកិច្ចមូលដ្ឋានបានអន្តរាគមន៍ហៅរថយន្តពន្លត់អគ្គិភ័យ របស់ស្នងការនគរបាលរាជធានីភ្នំពេញ ដើម្បីចុះមកអន្តរាគមន៍បាញ់ពន្លត់ លុះក្រោយមកបន្តិចទៀតក៏មានរថយន្តមកពីកងពលតូចលេខ៧០ បានមកជួយអន្តរាគមន៍ តែដោយសារតែស្ថានភាពអគ្គិភ័យខ្លាំងពេក ទើបធ្វើឲ្យការអន្តរាគមន៍នោះពិបាកក្នុងការបាញ់ពន្លត់ ដោយសារតែទីតាំងខាងលើនេះពិបាកចូលទៅខាងក្នុង៕ ដោយ៖បញ្ញាស័ក្តិ
