វីដេអូឃ្លីបដ៏រន្ធត់មួយ បាននិងកំពុងរីករាលដាលយ៉ាងលឿន នៅក្នុងបណ្តាញសង្គមនៃប្រទេសចិន ដែលបានបង្ហាញឲ្យឃើញបុរសអាមេរិកាំងម្នាក់ ត្រូវបានបុរសជនជាតិចិនម្នាក់ ហក់ព្រលែង១ជើងដ៏ធ្ងន់ ចំកណ្តាលដើមទ្រូងកប់នឹងជញ្ជាំងថ្ម ខណៈដែលបុរសស្បែកខ្មៅនេះកំពុងធ្វើបាប និងវាយអ្នកសុំទាននៅលើចិញ្ចើមផ្លូវមួយ ក្នុងទីក្រុង Guangzhou ខេត្ត Guangdong ភាគខាងត្បូងនៃប្រទេសចិន ។
នៅក្នុងវីដេអូឃ្លីបនេះ ដែលត្រូវបានចែករំលែកនៅលើបណ្តាញសង្គមដូចជា Twitter របស់ចិន គឺ Weibo បុរសបរទេសនោះត្រូវបានឃើញបានវាយធ្វើបាប ទាត់ធាក់ ទៅលើអ្នកសុំទានម្នាក់កំពុងអង្គុយនៅលើចិញ្ចើមផ្លូវនៃទីក្រុង ។
ខណៈពេលនោះ ដោយសារតែមើលឃើញទង្វើរបស់បុរសបរទេសនេះ កាន់តែខ្លាំងៗទៅលើអ្នកសុំទាន បុរសម្នាក់ដែលមានការឈឺឆ្អាល បានសម្រេចចិត្តចូលអន្តរាគមន៍ ដោយស្ទុះហក់ធាក់ពីចម្ងាយ ទៅលើកណ្តាលដើមទ្រូងរបស់បុរសនេះយ៉ាងសាហាវ បណ្តាលឲ្យផ្ទប់នឹងជញ្ជាំងថ្មឈឺចុកឆ្អល់យ៉ាងដំណំ ។
ពុំមានព័ត៌មានណាមួយ បញ្ជាក់ពីមូលហេតុដែលនាំឲ្យបុរសស្បែកខ្មៅនោះ ធ្វើបាបទៅលើអ្នកសុំទានទេ ។
ទោះយ៉ាងណា អ្នកប្រើប្រាស់អ៊ីនធើរណេត បានសម្តែងការកោតសរសើរចំពោះបុរសនោះ ដែលចេះជួយឈឺឆ្អាលនិងហ៊ានចូលការពារដល់អ្នកទន់ខ្សោយ ឲ្យចៀសផុតគ្រោះថ្នាក់ពីការវាយប្រហាររបស់មនុស្សមានចិត្តកាចសាហាវបែបៗនេះ ៕ ចន្ទី