តាកែវ ៖ ករណីប្រជាពលរដ្ឋចំនួន ៥៦គ្រូសារ ដែលរស់នៅអមសងខាងផ្លូវជាតិលេខ២ កែងផ្លូវលេខ២៤ និងផ្លូវលេខ២៩ ដែលបានប្ដឹងលោកប្រធានសូរិយាដីក្រុងដូនកែវ ហ៊ួត ប៊ុនលីម ទៅលោកទេសរដ្ឋមន្ត្រី ជា សុផារ៉ា ពាក់ព័ន្ធការចេញប្លង់កម្មសិទ្ធិមិនប្រក្រតី លើដីផ្លូវសាធារណៈមួយកន្លែង ទៅឲ្យថៅកែសាំងម្នាក់ នៅក្នុងក្រុងដូនកែវនោះ លោកទេសរដ្ឋមន្ត្រី ជា សុផារ៉ា រដ្ឋមន្ត្រីក្រសួងរៀបចំដែនដី នគរូបនីយកម្ម និងសំណង់ បានផ្ញើលិខិតមួយច្បាប់ជូនលោក នួន សុធា ប្រធានមន្ទីររៀបចំដែនដីខេត្តតាកែវ ឲ្យរាយការណ៍បំភ្លឺមកក្រសួងជាបន្ទាន់។
យោងតាមលិខិតរបស់ក្រសួងរៀបចំដែនដី នគរូនីយកម្ម និងសំណង់ ដែលចុះហត្ថលេខាដោយលោក លឹម វ៉ាន់ រដ្ឋលេខាធិការតំណាងឲ្យលោកទេសរដ្ឋមន្ត្រី ជា សុផារ៉ា រដ្ឋមន្ត្រីក្រសួងរៀបចំដែនដី នគរូបនីយកម្ម និងសំណង់ បានជម្រាបមកលោក នួន សុធា ប្រធានមន្ទីររៀបចំដែនដី នគរូបនីយកម្ម សំណង់ និងសូរិយោដីថា “យោងតាមពាក្យបណ្ដឹងពីប្រជាពលរដ្ឋចំនួន៥៦គ្រួសារ ខ្ញុំសូមជម្រាបលោកប្រធានមន្ទីរ ជ្រាបថា ប្រជាពលរដ្ឋចំនួន៥៦គ្រួសារ ស្នើសុំប្ដឹងឈ្មោះ ហ៊ួត ប៊ុនលីម ប្រធានសូរិយាដីក្រុងដូនកែវដែល បានចេញប្លង់កម្មសិទ្ធិលើដីសធារណៈ ទៅឲ្យឈ្មោះ ណុប ម៉ារីយ៉ាន និងឈ្មោះ នួន ផុន នៅចំណុចផ្លូវជាតិលេខ២ កែងច្រមុះជ្រូក ផ្លូវលេខ២៤ និងផ្លូវលេខ២៩ ស្ថិតក្នុងភូមិថ្នល់បែក សង្កាត់រកាក្រៅ ក្រុងដូនកែវ ខេត្តតាកែវ។
បើយោងតាមពាក្យបណ្ដឹងខាងលើ និងចំណារបស់លោកទេសរដ្ឋមន្ត្រី ជា សុផារ៉ា កាលពីថ្ងៃទី៧ ខែមេសា ឆ្នាំ២០១៨កន្លងមក ក្រសួងសូមស្នើលោកប្រធានមន្ទីររៀបចំដែនដី នគរូបនីយកម្ម សំណង់ និងសូរយោដី ខេត្តតាកែវ ក្រសួងសូមជូន លោកប្រធាន រាយការណ៍បំភ្លឺ។
ទាក់ទងករណីនេះ លោក នួន សុធា បានថ្លែងថា លោកបានបំភ្លឺរួចហើយទាក់ទងទៅនិងលិខិតក្រសួង ដែលផ្ញើមកលោក ពាក់ព័ន្ធពាក្យបណ្ដឹងរបស់ប្រជាពលរដ្ឋ៥៦គ្រូសារនេះ។
យោងតាមពាក្យបណ្ដឹងទៅលោកទេសរដ្ឋមន្ដ្រី ជា សុផារ៉ា ក្រុមប្រជាពលរដ្ឋទាំង៥៦គ្រូសារ បានអះអាងថា ដីដែលលោកប្រធានភូមិបាលក្រុងដូនកែវ ចេញប្លង់កម្មសិទ្ធិនេះ ត្រូវបានលោកចៅសង្កាត់រកាក្រៅ ធ្វើលិខិតបញ្ជាក់អះអាងថា ជាដីសាធារណៈរបស់រដ្ឋ និងមានប្រព័ន្ធលូទឹកស្អុយហូខ្វាត់ខ្វែង ពីផ្ទះប្រជាពលរដ្ឋចូលមកក្នុងលូដីសាធារណៈនេះ។ ម្យ៉ាងទៀត ដីសាធារណៈនៅចំណុចនេះ ត្រូវបានអភិបាលខេត្តមុនៗ បានបដិសេដមិនឲ្យមានការចេញប្លង់កម្មសិទ្ធិថែមទៀតផង។
បើទោះបីជាអភិបាលខេត្តច្រើនជំនាន់ បានបដិសេដមិនចេញប្លង់កម្មនសិទ្ធិលើដីសាធារណៈ ដែលមានប្រព័ន្ធលូខ្វាត់ខ្វែង យ៉ាងណាក៏ដោយស្រាប់តែនៅខែមករា ឆ្នាំ២០១៨ លោក ហ៊ួត ប៊ុនលីម ប្រធានភូមិបាលក្រុងដូនកែវ បានចេញប្លង់កម្មសិទ្ធិមិនប្រក្រតីមួយ ទៅឲ្យប្ដីប្រពន្ធខាងលើ ដោយអាថកំបាំង និងបានចេញច្បាប់អនុញ្ញាតឲ្យសាងសង់សំណង់ជាច្រើនជាន់នៅលើដីនេះ ដែលនាំឲ្យមានការប្រឆាំងជំទាស់តវ៉ា ពីប្រជាពលរដ្ឋជាច្រើនគ្រូសារនៅតំបន់នោះ៕ ដោយ ៖ បញ្ញាស័ក្តិ
