ភ្នំពេញ ៖ ពាក់ព័ន្ធនឹងការអនុវត្តកិច្ចព្រមព្រៀងសហប្រតិបត្តិការក្នុងការបង្ការទប់ស្កាត់ និងប្រយុទ្ធប្រឆាំងអំពើជួញដូរមនុស្ស និងផែនការសកម្មភាព លោកស្រី ជូរ ប៊ុនអេង បានលើកឡើងថា ស្ត្រីខ្មែរច្រើនណាស់ដែលបានរងគ្រោះ និងជូញដូរដោយខុសច្បាប់នៅប្រទេសចិន ដូច្នេះភាគីកម្ពុជា និងចិន ស្វែងរកផែនការសម្រាប់ជួយសង្គ្រោះពួកគេ និងទប់ស្កាត់ទង្វើនេះមិនឲ្យមានបន្តទៀត ។
លោកស្រី ជូរ ប៊ុនអេង រដ្ឋលេខាធិការក្រសួងមហាផ្ទៃបានអះអាងថា ស្ត្រីខ្មែរដែលត្រូវបានគេជូញដូរ និងរងគ្រោះច្រើនជាងគេ នៅប្រទេសចិន នាពេលកន្លងមក គឺភាគច្រើនដោយសារការរៀបអាពាហ៍ពិពាហ៍ប្រថុយប្រថាន និងផ្ទុយពីឆន្ទៈ។ លោកស្រី បន្តថា ក្រុមស្ត្រីរងគ្រោះទាំងនោះ ត្រូវបានអាជ្ញាធរកម្ពុជា និងចិន ជួយសង្គ្រោះ ឲ្យមកប្រទេសកម្ពុជាវិញ ប្រមាណជិត៦០នាក់ កាលពីឆ្នាំ២០១៧ ។
លោកស្រី ជូរ ប៊ុនអេង បានថ្លែងបែបនេះ នៅព្រឹកថ្ងៃទី១០ ខែឧសភា ឆ្នាំ២០១៨នេះ នៅសណ្ឋាគារភ្នំពេញ មុននឹងបើកកិច្ចប្រជុំប្រចាំឆ្នាំលើកទី២ រវាងរាជរដ្ឋាភិបាល នៃព្រះរាជាណាចក្រកម្ពុជា និងរដ្ឋាភិបាល នៃសាធារណរដ្ឋប្រជាមានិតចិន ស្តីពីភាពរីកចំរើននៃការអនុវត្តកិច្ចព្រមព្រៀងសហប្រតិបត្តិការក្នុងការបង្ការទប់ស្កាត់ និងប្រយុទ្ធប្រឆាំងអំពើជួញដូរមនុស្ស និងផែនការសកម្មភាព ។
លោកស្រី ជូរ ប៊ុនអេង បានបន្តថា កិច្ចប្រជុំលើកទី២ ជាមួយភាគីចិននាពេលនេះ គឺជាការត្រួតពិនិត្យរួមគ្នាលើកិច្ចសហប្រតិបត្តិការ ដែលក្រុមអ្នកទទួលបន្ទុកអនុវត្តន៍កិច្ចព្រមព្រៀង របស់ប្រទេសទាំងពីរ បាននិងកំពុងធ្វើការងារយ៉ាងសកម្ម ក្នុងការប្រយុទ្ធប្រឆាំងអំពើជួញដូរមនុស្ស ។
លោកស្រី បានបន្តថា កិច្ចព្រមព្រៀងទ្វេភាគីនេះ គឺបានធ្វើឡើងរវាងរាជរដ្ឋាភិបាលកម្ពុជា និងរដ្ឋាភិបាល នៃសាធារណរដ្ឋប្រជាមានិតចិន ហើយត្រូវបានចុះហត្ថលេខានៅថ្ងៃទី១៣ ខែ តុលា ឆ្នាំ២០១៦ នៅវិមានសន្តិភាព ក្រោមអធិបតីភាព សម្តេចតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា និងឯកឧត្តម ស៊ី ជីនភីង ប្រធានាធិបតី នៃសាធារណរដ្ឋប្រជាមានិតចិន ។ កិច្ចប្រជុំលើកទី២នេះ គឺបានកំពុងធ្វើឡើងនៅប្រទេសកម្ពុជា ចំនួនបីថ្ងៃ គឺចាប់ពីថ្ងៃទី១០ដល់ថ្ងៃទី១២ ភាគីកម្ពុជាដឹកនាំដោយ លោកស្រី ជូរ ប៊ុន អេង និងភាគីចិនដឹកនាំដោយ លោក ស៊ីនស៊ីកូ អគ្គនាយករងនាយកដ្ឋាន ស៊ើបអង្កេតព្រហ្មទណ្ឌ ក្រសួងសន្តិសុខសាធារណរដ្ឋប្រជាមានិតចិន ៕ ដោយ៖បញ្ញាស័ក្តិ